SERMON POUR LE PREMIER DIMANCHE DE CARÉME

13 février 1622

Fili, accedens ad servitutem Dei, prapara animam tuam ad tentationem.

Mon fils, venant au service de Dieu, prepare ton ame à la tentation.

Eccui., n, r.

C'est un advertissement du Sage : Mon fils, dit-il, qui as dessein de servir Dieu, prepare ton ame à [a tentation ; car c'est une verité infaillible que nul n'est exempt de tentation lors qu'il est bien resolu de servir Dieu. Cela estant, Nostre Seigneur a voulu luy mesme y estre sujet pour nous monstrer comme nous devons resister à la tentation. Ainsy que les Evangelistes nous racontent *, il fut conduit par l'Esprit au desert pour estre tenté ; sur lequel mystere je tireray des documens pour nostre instruction particuliere, le plus familierement qu'il me sera possible.

Premierement je remarque que, bien que nul ne puisse estre exempt de tentation, nul pourtant ne la doit rechercher ni aller de soy mesme au lieu où elle se trouve; car indubitablement, celuy qui la cherchera perira en icelle *. C'est pourquoy les Evangelistes disent que Nostre Seigneur fut conduit par l’Esprit au desert pour estre tenté ; ce ne fut donques point par son choix (je dis quant à sa nature humaine) qu'il alla au lieu de la tentation, ains porté par l’obeissance qu'il devoit à son Pere celeste *.

Je trouve dans la Sainte Escriture deux jeunes princes