ACTE CINQVIE’ME. · Scène PREMIERE.

STHENOBE’E, CHŒVR DE FILLES.[illisible]

STHENOBE’E.

A La fin i’ay trouué des bornes à mes maux,
Nos victimes ſeront de ſimples animaux :
Les Dieux ont moderé leur cruelle iuſtice,
Endymion n’aura que l’ombre du ſupplice :
Nos Taureaux ſeulement ſe verront eſgorgez,
Et lors mes deplaiſirs en ſeront allegez :
I’ay trouué du ſecours ; l’incomparable Iſmene

M’a tirée à la fin de cette dure peine.

ALCIONE’E.

Quelle Iſmene ?

STENOBE’E.

Quelle Iſmene ? Vne femme inconnue en ces lieux.
Et qui ſans doute ſort de la race des Dieux :
Enfin l’on peut iuger qu’elle eſt preſque diuine,
Et que des Immortels elle a prit origine.
Mes Filles, vous ſçauez quels eſtoient mes regrets,
Et vous avez ouy les propos indiſcrets,
Auſquels mes deſplaiſirs & mes maux m’ont contrainte ;
Alors que i’ay trouué pour alleger ma plainte,
Quand ie faiſois voler mes ſoupirs iuſqu’aux cieux,
Cette fameuſe Iſmene eſt paruë à mes yeux :
Vn lugubre torrent, de ſanglots & de larmes
M’ont empeſché de voir cette mere de charmes :
Mais lors qu’elle a parlé me ſurprenant ainſi,
Ses diſcours ont rendu mon mal bien adoucy.
Il n’eſtoit pas beſoing de luy dire la cauſe
Des maux que ie ſouffrois ; c’eſtoit trop peu de choſe
De paroiſtre à ses yeux auec tant de douleur :
Elle ſçauoit deſia le fonds de mon malheur.
Enfin ce grand ſçauoir, à qui rien ne ſeconde,
Fait voir qu’il n’eſt iamais de choſe ſi profonde
Qui ne luy ſoit connuë, aux lieux les plus cachez,
Quand on croit la fuyr, l’on s’en voit empeſchez,
Elle peut nous ſeruir, ou nous estre contraire,
L’on ne doit que taſcher de ne luy point déplaire :
Elle ſçait les malheurs qui doiuent arriuer,
Elle en peut garantir, elle peut en priuer.
Elle a ſçeu ma douleur ſans m’auoir iamais veuë,
Ainſi mes maux ont en l’allegeance impreueüe,
Elle m’a preſenté ce couſteau merueilleux,

Auſſi foible leger qu’il paroiſt à vos yeux :
Enfin elle m’a dit que cette foible lame
Feroit bien-toſt ceſſer les douleurs de mon ame :
Quand on le plongera dans ce cœur innocent,
Les charmes qu’elle y met le rendront impuiſſant :
Et que pour faire agir l’effet de ſa promeſſe,
Elle ſe veut meſler au milieu de la preſſe.
Elle m’a dit ſon nom, meſme en ſe nommant,
Elle a veu dans mes yeux beaucoup d’eſtonnement :
Car ce nom m’a ſurpriſe, ainſi qu’on le peut croire,
Puiſque ie n’auois point bannis de ma memoire
Tout ce qu’Endymion m’auoit dit auiourd’huy ;
Ne vous ſouuient il pas, mes filles, que c’eſt luy,
Qui nous auoit parlé d’vne certaine Iſmene ?

FELICIE.

Il eſt vray Sthenobée, ie ſuis bien certaine
Qu’il nous a dit encor…

ALCIONNÉE.

Ouy, ie me trompe fort,
S’il n’a dit qu’elle eſtoit maiſtreſſe de ſon fort,
S’eſtant abandonné ſous ſon art, ſes charmes,
Elle peut eſtre autheur de toutes ces allarmes.

STHENOBÉE.

Ie ne m’eſtonne pas ſi lon la voit courir
Dans ces lieux eſtrangers, afin d’y ſecourir
Le pauvre Endymion ; dont l’ame eſt aſſeruie
Sous les charmes puiſſants, dont elle s’eſt ſeruie :
Elle vient arreſter les maux qu’elle a cauſez.

FELICIE.

Donc les Albaniens en vain ſont diſpoſez ?
Grands Dieux ſoyez de meſme à nos vœux fauorables,[illisible]
Moderez le courroux dont vous fuſtes capables.

ALCIONNE’E.

Approchons de l’Autel, & faiſons nos deuoirs,
Laiſſant agir les Dieux de leurs diuins pouuoirs :
Et parſemons de fleurs cet Autel venerable,

STHENOBE’E.

Iſmene, en tes ſermens ſeras tu veritable ?

FELICIE.

I’entends les inſtrumens, auecque mille voix,
Dont les ſons eſclattants font retentir nos bois :
C’eſt ſans doute le peuple auecque la victime.

STHENOBE’E.

Ah ! malgré mon eſpoir ma douleur ſe r’anime :
La crainte & la frayeur me pourſuiuront touſiours,
Tant qu’Iſmene viendra me donner du ſecours :
Ie tremble, ie fremis, ie ſuis encor en doute ;
Ie les ſens approcher, Alcionnée eſcoute,
Ces peuples aueuglez viennent tous glorieux,
Qui font voler leurs cris iuſque dedans les Cieux.
Mais, bons Dieux, ie les vois ces peuples tyranniques,
Voyez leurs ornemens pompeux & magnifiques ?
La victime paroiſt, & ne diriez vous pas
Qu’elle a peu de ſoucy de ſon prochain treſpas ?
Ce port maieſtueux, & cette mine auguſte ?
Mes Filles, aduouez, que ma douleur eſt iuſte.

Le peuple ſort de derriere les arbres, les vns portant des inſtrumens, les autres des vazes auec de l’encens, les autres des flambeaux chantant des hymnes à la gloire de la Deeſſe ; & Thymœtes parmy les autres portant la tiare, & le manteau de Sacrificateur, & Endymion au milieu habillé en victime.