Gargantua · 9
es couleurs de Gargantua feurent blanc & bleu, comme cy deſſus auez peu lire. Et par icelles vouloit ſon pere qu’on entendiſt que ce luy eſtoit vne ioye celeſte. Car le blanc luy ſignifioit ioye, plaiſir, delices, & reſiouiſſance, & le bleu, choſes celeſtes.
I’entends bien que liſans ces motz, vous mocquez du vieil beuueur, & reputez l’expoſition des couleurs par trop indague, & abhorrente : & dictes que blanc ſignifie foy : & bleu, fermeté. Mais ſans vous mouuoir, courroucer, eſchaufer, ny alterer (car le temps eſt dangereux) reſpondez moy ſi bon vous ſemble. D’aultre contraincte ne vſeray enuers vous, ny aultres quelz qu’ilz ſoient. Seulement vous diray vn mot de la bouteille.
Qui vous meut ? qui vous poinct ? qui vous dict que blanc ſignifie foy : & bleu fermeté ? Vn (dictes vous) liure trepelu qui ſe vend par les biſouars & porteballes, au tiltre : Le blaſon des couleurs. Qui l’a faict ? Quiconques il ſoit, en ce a eſté prudent qu’il n’y a poinct mis ſon nom. Mais au reſte, ie ne ſcay quoy premier en luy ie doibue admirer, ou ſon oultrecuidance, ou ſa beſterie.
Son oultrecuidance, qui ſans raiſon, ſans cauſe, & ſans apparence, a auſé preſcripre de ſon autorité priuee quelles choſes ſeroient denotees par les couleurs : ce que eſt l’vſance des tyrans qui voulent leurs arbitre tenir lieu de raiſon : non des ſaiges & ſcauans qui par raiſons manifeſtes contentent les lecteurs.
Sa beſterie : qui a exiſtimé que ſans aultres demonſtrations & argumens valables le monde reigleroit ſes deuiſes par ſes impoſitions badaudes.
De faict (comme dict le prouerbe, à cul de foyrad touſiours abonde merde) il a trouué quelque reſte de niays du temps des haultz bonnetz : leſquelz ont eu foy à ſes eſcripts. Et ſelon iceulx ont taillé leurs apophthegmes & dictez : en ont encheueſtré leurs muletz : veſtu leurs pages, eſcartelé leurs chauſſes, brodé leurs guandz : frangé leurs lictz : painct leurs enſeignes : compoſé chanſons : & (que pis eſt) faict impoſtures & laſches tours clandeſtinement entre les pudicques matrones.
En pareilles tenebres ſont comprins ces glorieux de court & tranſporteurs de noms : leſquelz voulens en leurs diuiſes ſignifier eſpoir, font protraire vne ſphere : des pennes d’oiſeaulx, pour poines : de l’ancholie, pour melancholie : la Lune bicorne, pour viure en croiſſant : vn banc rompu, pour bancque roupte : non & vn alcret, pour non durhabit : vn lict ſans ciel, pour vn licentié. Que ſont homonymies tant ineptes, tant fades, tant ruſticques & barbares, que l’on doiburoit atacher vne queue de renard au collet, & faire vn maſque d’vne bouze de vache à vn chaſcun d’iceulx qui en vouldroit dorenauant vſer en France apres la reſtitution des bonnes lettres.
Par meſmes raiſons (ſi raiſons les doibz nommer, & non reſueries) ferois ie paindre vn penier : denotant qu’on me faict pener. Et vn pot à mouſtarde, que c’eſt mon cueur à qui moult tarde. Et vn pot à piſſer, c’eſt vn official. Et le fond de mes chauſſes, c’eſt vn vaiſſeau de petz. Et ma braguette, c’eſt le greffe des arreſtz. Et vn eſtront de chien, c’eſt vn tronc de ceans, ou giſt l’amour de m’amye.
Bien aultrement faiſoient en temps iadis les ſaiges de Égypte, quand ilz eſcripuoient par lettres qu’ilz appelloient hieroglyphiques. Leſquelles nul n’entendoit qui n’entendiſt, & vn chaſcun entendoit qui entendiſt la vertu, proprieté, & nature des choſes par icelles figurees. Deſquelles Orus Apollon a en Grec compoſé deux liures, & Polyphile au ſonge d’amours en a d’auantaige expoſé. En France vous en auez quelque tranſon en la deuiſe de monſieur l’Admiral : laquelle premier porta Octauian Auguſte.
Mais plus oultre ne fera voile mon equif entre ces gouffres & guez mal plaiſans. Ie retourne faire ſcale au port dont ſuis yſſu. Bien ay ie eſpoir d’en eſcripre quelque iour plus amplement : & monſtrer tant par raiſons philoſophicques, que par auctoritez receues & approuuees de toute ancienneté, quelles & quantes couleurs ſont en nature : & quoy par vne chaſcune peut eſtre deſigné, ſi dieu me ſaulue le moulle du bonnet, c’eſt le pot au vin, comme diſoit ma mere grand.