Gargantua · 10

e blanc doncques ſignifie ioye, ſoulas, & lieſſe : & non à tort le ſignifie, mais à bon droict & iuſte tiltre. Ce que pourrez verifier ſi arriere miſes voz affections, voulez entendre ce que preſentement vous expoſeray.

Ariſtoteles dict que ſuppoſent deux choſes contraires en leur eſpece : comme bien & mal : vertu & vice : froid & chauld : blanc & noir : volupté & doleur : ioye & dueil, & ainſi de aultres, ſi vous les coublez en telle façon, q’vn contraire d’vne eſpece conuienne raiſonnablement à l’vn contraire d’vne aultre, il eſt conſequent que l’autre contraire compete auecques l’autre reſidu. Exemple : Vertus & Vice ſont contraires en vne eſpece, auſſy ſont Bien & Mal. Si l’vn des contraires de la premiere eſpece conuient à l’vn de la ſeconde comme vertus & bien : car il eſt ſceut que vertus eſt bonne, ainſi feront les deux reſiduz, qui ſont mal & vice, car vice eſt mauluais.

Ceſte reigle logicale entendue, prenez ces deux contraires, ioye & triſteſſe : puis ces deux, blanc & noir. Car ilz ſont contraires phyſicalement. Si ainſi doncques eſt que noir ſignifie dueil, à bon droict blanc ſignifiera ioye.

Et n’eſt ceſte ſignifiance par impoſition humaine inſtituee, mais receue par conſentement de tout le monde, que les philoſophes nomment ius gentium, droict vniuerſel, valable par toutes contrees.

Comme aſſez ſcauez, que tous peuples, toutes nations (ie excepte les antiques Syracuſans & quelques Argiues : qui auoient l’ame de trauers) toutes langues, voulens exteriorement demonſtrer leur triſteſſe, portent habit de noir : & tout dueil eſt faict par noir. Lequel conſentement vniuerſel n’eſt faict que nature n’en donne quelque argument & raiſon : laquelle vn chaſcun peut ſoubdain par ſoy comprendre ſans aultrement eſtre inſtruict de perſonne, laquelle nous appellons droict naturel.

Par le blanc, à meſmes induction de nature, tout le monde a entendu ioye, lieſſe, ſoulas, plaiſir, & delectation.

Au temps paſſé les Thraces & Cretes ſignoient les iours bien fortunez & joyeux, de pierres blanches : les triſtes & defortunez, de noires.

La nuyct n’eſt elle funeſte, triſte, & melancholieuſe ? Elle eſt noire & obſcure par priuation. La clarté n’eſiouit elle toute nature ? Elle eſt blanche plus que choſe que ſoit. A quoy prouuer ie vous pourrois renuoyer au liure de Laurens Valle contre Bartole, mais le teſmoignage euangelicque vous contentera. Math. xvij, eſt dict que à la tranſfiguration de noſtre ſeigneur : veſtimenta eius facta ſunt alba ſicut lux, ſes veſtemens feurent faictz blancs comme la lumiere. Par laquelle blancheur lumineuſe donnoit entendre à ſes troys apoſtres l’idee & figure des ioyes eternelles. Car par la clarté ſont tous humains eſiouiz. Comme d’vne vieille que n’aoit dens en gueulle, encores diſoit elle : Bona lux. Et Thobie (cap. v) quand il eut perdu la veue, lors que Raphael le ſalua, reſpondit : « Quelle ioye pourray ie auoir, qui poinct ne voy la lumiere du ciel ? » En telle couleur teſmoignerent les anges la ioye de tout l’vniuers à la Reſurrection du Saulueur Joan. xx. & à ſon aſcenſion, Act. i. De ſemblable parure veit Sainct Jean Euangeliſte Apocal. iiij, &. vij. les fideles veſtuz en la celeſte & beatifiee Hieruſalem.

Liſez les hiſtoires antiques, tant Grecques que Romaines, vous trouuerez que la ville de Albe (premier patron de Rome) feut & conſtruicte & appellee à l’inuention d’vne truye blanche.

Vous trouuerez que, ſi à aulcun, apres auoir eu des ennemis victoire, eſtoit decreté qu’il entraſt à Rome en eſtat triumphant, il y entroit ſur vn char tiré par cheuaulx blancs. Autant celluy qui y entroit en ouation. Car par ſigne ny couleur ne pouuoyent plus certainement exprimer la ioye de leur venue que par la blancheur.

Vous trouuerez que Pericles duc des Atheniens voulut celle part de ſes genſdarmes eſquelz par ſort eſtoient aduenus les febues blanches, paſſer toute la iournee en ioye, ſolas, & repos : ce pendent que ceulx de l’autre part batailleroient. Mille aultres exemples & lieux à ce propos vous pourrois ie expoſer, mais ce n’eſt icy le lieu.

Moyennant laquelle intelligence pouez reſouldre vn probleme, lequel Alexandre Aphrodiſe a reputé inſolube. Pourquoy le Leon, qui de ſon ſeul cry & rugiſſement eſpouante tous animaulx, ſeulement crainct & reuere le coq blanc ? Car (ainſi que dict Proclus, lib. De ſacrificio & magia) c’eſt parce que la preſence de la vertus du Soleil, qui eſt l’organe & promptuaire de toute lumiere terreſtre & ſyderale, plus eſt ſymboliſante & competente au coq blanc : tant pour icelle couleur que pour ſa proprieté & ordre ſpecificque, que au Leon. Plus dict, que en forme Leonine ont eſté diables ſouuent veuz, leſquelz à la preſence d’vn coq blanc ſoubdainement ſont diſparuz.

Ce eſt la cauſe pourquoy Galli (ce ſont les Francoys ainſi appellez par ce que blancs ſont naturellement comme laict, que les Grecz nomment gala) voluntiers portent plumes blanches ſus leurs bonnetz. Car par nature ilz ſont ioyeux, candides, gratieux & bien amez : & pour leur ſymbole & enſeigne ont la fleur plus que nulle autre blanche, c’eſt le lys.

Si demandez comment par couleur blanche nature nous induict entendre ioye & lieſſe : ie vous reſponds, que l’analogie & conformité eſt telle. Car comme le blanc exteriorement diſgrege & eſpart la veue, diſſoluent manifeſtement les eſpritz vilifz, ſelon l’opinion de Ariſtoteles en ſes problemes, & des perſpectifz, & le voyez par experience quand vous paſſez les montz couuers de neige : en ſorte que vous plaignez de ne pouuoir bien reguarder, ainſi que Xenophon eſcript eſtre actuenu à ſes gens : & comme Galen expoſe amplement lib. x. de vfu partium : tout ainſi le cueur par ioye excellente eſt interiorement eſpart, & patiſt manifeſte reſolution des eſperitz vitaulx. Laquelle tant peut eſtre acreue, que le cueur demoureroit ſpolié de ſon entretien, & par conſequent ſeroit la vie eſtaincte, par ceſte perichairie, comme dict Galen lib. xij. Metho. la v. de locis affectis, & li. ij. de ſymptomaton cauſes. Et comme eſtre au temps paſſé aduenu teſmoignent Marc Tulle, li. j. Queſtio. Tuſcul., Verrius, Ariſtoteles, Tite Liue, apres la bataille de Cannes, Pline. lib. vij, c. xxxij et liij, A. Gellius, li. iij, xv. & aultres, à Diagoras Rodien, Chilo, Sophocles, Diony, tyrant de Sicile, Philippides, Philemon, Polycrata, Philiſtion, M. Iuuenti & aultres qui moururent de ioye. Et comme dict Auicenne in ij. canone, & lib. De viribus cordis, du zaphran, lequel tant eſiouiſt le cueur qu’il le deſpouille de vie, ſi on en prend en doſe exceſſifue, par reſolution & dilatation ſuperflue. Icy voyez Alex. Aphrodiſien, lib. primo problematum c. xix.. Et pour cauſe. Mais quoy, i’entre plus auant en ceſte matiere que ne eſtabliſſois au commencement, icy doncques calleray mes voilles, remettant le reſte au liure en ce conſommé du tout. Et diray en vn mot que le bleu ſignifie certainement le ciel & choses celeſtes, par meſmes ſymboles que le blanc ſignifioit ioye et plaisir.