Gargantua · 15

tant ſon pere aperceut que vrayement il eſtudioit tres bien & y mettoit tout ſon temps, touteſfoys qu’en rien ne prouffitoit. Et que pis eſt, en deuenoit fou, niays, tout reſueux & raſſoté.

Dequoy ſe complaignant à Don Philippe des Marays, Viceroy de Papeligoſſe, entendit que mieulx luy vauldroit rien n’aprendre que telz liures ſoubz telz precepteurs aprendre. Car leur ſçauoir n’eſtoit que beſterie, & leur ſapience n’eſtoit que moufles, abaſtardiſant les bons & nobles eſperitz & corrompent toute fleur de ieuneſſe. Qu’ainſi ſoit, prenez (diſt il) quelcun de ces ieunes gens du temps preſent, qui ait ſeulement eſtudié deux ans, en cas qu’il ne ait meilleur iugement, meilleures parolles, meilleur propos que voſtre filz, & meilleur entretien & honneſteté entre le monde, reputez moy à iamais vn taillebacon de la Brene. Ce que à Grandgouſier pleuſt tres bien, & commanda qu’ainſi feuſt faict.

Au ſoir, en ſoupant, ledict des Marays introduict un ſien ieune paige de Villegongys, nommé Eudemon, tant bien teſtonné, tant bien tiré, tant bien eſpouſſeté, tant honneſte en ſon maintien, que trop mieulx reſſembloit quelque petit angelot qu’vn homme. Puis diſt à Grandgouſier :

Voyez vous ce ieune enfant ? Il n’a encor douze ans, voyons, ſi bon vous ſemble, quelle difference y a entre le ſçauoir de voz reſueurs mateologiens du temps iadis & les ieunes gens de maintenant. L’eſſay pleut à Grandgouſier, & commanda que le paige propozaſt.

Alors Eudemon, demandant congié de ce faire audict viceroy ſon maiſtre, le bonnet au poing, la face ouuerte, la bouche vermeille, les yeulx aſſeurez & le reguard aſſis ſuz Gargantua, auecques modeſtie iuuenile ſe tint ſus ſes pieds, & commença le louer & magnifier premierement de ſa vertus & bonnes meurs, ſecondement de ſon ſçauoir, tiercement de ſa nobleſſe, quartement de ſa beaulté corporelle. Et pour le quint doulcement l’exhortoit â reuerer ſon pere en toute obſeruance, lequel tant s’eſtudioit à bien le faire inſtruire, en fin le prioit qu’il le voulſiſt retenir pour le moindre de ſes ſeruiteurs. Car aultre don pour le preſent ne requeroit des cieulx, ſinon qu’il luy feuſt faict grace de luy complaire en quelque ſeruice agreable.

Le tout feut par icelluy proferé auecques geſtes tant propres, pronunciation tant diſtincte, voix tant eloquente, & languaige tant aorné & bien latin, que mieulx reſembloit vn Gracchus, vn Ciceron ou vn Emilius du temps paſſé, qu’vn iouuenceau de ce ſiecle.

Mais toute la contenence de Gargantua fut qu’il ſe print à plorer comme vne vache & ſe cachoit le viſaige de ſon bonnet, & ne fut poſſible de tirer de luy vne parolle non plus q’vn pet d’vn aſne mort.

Dont ſon pere fut tant courrouſſé, qu’il voulut occire maiſtre Iobelin. Mais ledict des Marays l’en guarda par belle remonſtrance qu’il luy feiſt, en maniere que fut ſon ire moderee. Puis commenda qu’il feuſt payé de ſes guaiges, & qu’on le feiſt bien chopiner ſophiſticquement, ce faict, qu’il allaſt à tous les diables. Au moins (diſoit il) pour le iourd’huy ne couſtera il gueres à ſon houſte, ſi d’auenture il mouroit ainſi, ſou comme vn Angloys.

Maiſtre Iobelin party de la maiſon, conſulta Grandgouſier auecques le vice roy quel precepteur l’on luy pourroit bailler, & feut auiſé entre eulx que à ceſt office ſeroit mis Ponocrates, pedaguoge de Eudemon, & que tous enſemble iroient à Paris, pour congnoiſtre quel eſtoit l’eſtude des iouuenceaulx de France pour icelluy temps.