Gargantua · 19
hen, hen, hen, Mna dies, Monſieur, Mna dies. Et vobis, Meſſieurs. Ce ne ſeroyt que bon que nous rendiſſiez noz cloches, car elles nous font bien beſoing. Hen, hen, haſch. Nous en auions bien aultreſfoys refuſé de bon argent de ceulx de Londres en Cahors, ſy auions nous de ceulx de Bourdeaulx en Brye, qui les vouloient achapter pour la ſubſtantificque qualité de la complexion elementaire que eſt intronificquee en la terreſterité de leur nature quidditatiue pour extraneizer les halotz & les turbines ſuz noz vignes, vrayement non pas noſtres, mais d’icy aupres. Car, ſi nous perdons le piot, nous perdons tout, & ſens & loy. Si vous nous les rendez à ma requeſte, ie y guaigneray ſix pans de ſaulcices, & vne bonne paire de chauſſes, que me feront grant bien à mes iambes, ou ilz ne me tiendront pas promeſſe. Ho par Dieu, Domine, vne pair de chauſſes eſt bon. Et vir ſapiens non abhorrebit eam. Ha, ha, il n’a pas pair de chauſſes qui veult, ie le ſçay bien quant eſt de moy. Aduiſez, Domine : il y a dixhuyt iours que ie ſuis à matagraboliſer ceſte belle harangue. Reddite que ſunt Ceſaris Ceſari, & que ſunt dei deo. Ibi iacet lepus.
Par ma foy, Domine, ſi voulez ſouper auecques moy in camera, par le corps Dieu, charitatis, nos faciemus bonum cherubin. Ego occidi vnum porcum, & ego habet bon vino. Mais de bon vin on ne peult faire mauluais latin.
Or ſus, de parte dei, date nobis clochas noſtras. Tenez, ie vous donne de par la faculté vng ſermones de Vtino que vtinam vous nous baillez nos cloches, Vultis etiam pardonos ? Per diem vos habebitis, & nihil poyabitis.
O Monſieur, Domine, clochidonnaminor nobis. Dea, eſt bonum vrbis. Tout le monde s’en ſert. Si voſtre iument s’en trouue bien, auſſi faict noſtre faculté, que comparata eſt iumentis inſipientibus, & ſimilis facta eſt eis, pſalmo neſcio quo, ſi l’auoys ie bien quotté en mon paperat, & eſt vnum bonum Achilles, hen, hen, ehen, haſch.
Ça ie vous prouue que me les doibuez bailler. Ego ſic argumentor.
Omnis clocha clochabilis, in clocherio clochando, clochans clochatiuo, clochare facit clochabiliter clochantes. Pariſius habet clochas. Ergo gluc, ha, ha, ha. C’eſt parlé cela. Il eſt in tertio prime en Darii ou ailleurs. Par mon ame, i’ay veu le temps que ie faiſois diables de arguer. Mais de preſent ie ne fais plus que reſuer. Et ne me fault plus dorenauant que bon vin, bon lict, le dos au feu, le ventre à table, & eſcuelle bien profonde.
Hay, domine, ie vous pry, in nomine patris & filii & ſpiritus ſancti, Amen, que vous rendez noz cloches : & Dieu vous guard de mal, & noſtre dame de ſanté, qui vivit & regnat per omnia ſecula ſeculorum, Amen. Hen, haſch, haſch, grenhenhaſch.
Verum enim vero quando quidem dubio procul. Edepol quoniam ita certe meus deus fidus, vne ville ſans cloches eſt comme vn aueugle ſans baſton, vn aſne ſans cropiere, & vne vache ſans cymbales. Iuſques à ce que nous les ayez rendues nous ne ceſſerons de crier apres vous, comme vn aueugle qui a perdu ſon baſton, de braiſler, comme vn aſne ſans cropiere, & de bramer, comme vne vache ſans cymbales.
Vn quidam latiniſateur demourant pres l’Hoſtel Dieu, diſt vne foys, allegant l’autorité d’vng Taponnus, ie faulx, c’eſtoit Pontanus, poete ſeculier, qu’il deſiroit qu’elles feuſſent de plume & le batail feuſt d’vne queue de renard : pource qu’elles luy engendroient la chronique aux tripes du cerueau, quand il compoſoit ſes vers carminiformes. Mais nac petitin petetac, ticque, torche, lorne, il feut declairé hereticque. Nous les faiſons comme de cire. Et plus n’en dict le depoſant. Valete & plaudite. Calepinus recenſui.
Certes hoc vinum eſt bonus !
..........
Eſcolier, i’appris que le vin
Aide bien au mauuais latin.
Barbara celarent Darii erio baralipton.
Plus n’a beſoing, tant ſa force amolit,
Que de profonde eſcuelle & de mol lict.
Cretin, Epiſtre à vne dame de Lyon, Édit. de Coustelier, 1723, p. 243)
Boire ſouuent de grand randon,
Le dos au feu, le ventre à table,
Auant partir de la maison,
C’eſt opiate prouffitable.
(Cl. Marot, Remede contre la peſte, épigr. CCLXXI, t. III)
Ayant le dos au feu & le ventre à la table.
(Vau de vire II)
Donez des horions, pati, patac.
Tricque, tricque, tricque, tricque,
Tricque, tricque, tricque, tricque.
Trac, tricque, tricque, tricque,
Chipe, chope, torche, lorgne.
……Ainſi ces gens à ſe picquer ardents
S’en vindrcnt du parler à tic tac, torche, lorgne,
Qui caſſe le muſeau, qui ſon riual éborgne.