Gargantua · 20

e Sophiſte n’eut ſi touſt acheué que Ponocrates & Eudemon s’eſclafferent de rire tant profondement, que en cuiderent rendre l’ame à Dieu, ne plus ne moins que Craſſus, voyant vn aſne couillart qui mangeoit des chardons, & comme Philemon, voyant vn aſne qui mangeoit les figues qu’on auoit apreſté pour le diſner, mourut de force de rire. Enſemble eulx, commença rire Maiſtre Ianotus, à qui mieulx mieulx, tant que les larmes leurs venoient es yeulx, par la vehemente concution de la ſubſtance du cerueau : à laquelle furent exprimees ces humiditez lachrymales, & tranſcoullees iouxte les nerfz optiques. En quoy par eulx eſtoyt Democrite heraclitizant & Heraclyte democritizant repreſenté.

Ces rys du tout ſedez, conſulta Gargantua auecques ſes gens ſur ce qu’eſtoit de faire. Là feut Ponocrates d’aduis qu’on feiſt reboyre ce bel orateur. Et veu qu’il leurs auoit donné de paſſetemps & plus faict rire que n’euſt Songecreux, qu’on luy baillaſt les dix pans de ſaulcice mentionnez en la ioyeuſe harangue, auecques vne paire de chauſſes, troys cens de gros boys de moulle, vingt & cinq muitz de vin, vn lict, à triple couche de plume anſerine, & vne eſcuelle bien capable & profonde, leſquelles diſoit eſtre à ſa vieilleſſe neceſſaires.

Le tout fut faiſt ainſi que auoit eſté deliberé, excepté que Gargantua, doubtant que on ne trouuaſt à l’heure chauſſes commodes pour ſes iambes : doubtant auſſy de quelle façon mieulx duyroient audict orateur, ou à la martingualle qui eſt vn pont leuis de cul, pour plus aiſement fianter, ou à la mariniere pour mieulx ſoulaiger les roignons, ou à la Souice pour tenir chaulde la bedondaine, ou à queue de merluz de peur d’eſchauffer les reins : luy feiſt liurer ſept aulnes de drap noir, & troys de blanchet pour la doubleure. Le boys feut porté par les guaingnedeniers, les maiſtres es ars porterent les ſaulcices & eſcuelles. Maiſtre Ianot voulut porter le drap.

Vn deſdictz maiſtres, nommé Maiſtre Iouſſe Bandouille, luy remonſtroit que ce n’eſtoit honeſte ny decent ſon eſtat, & qu’il le baillaſt à quelq’vn d’entre eulx.

Ha (diſt Ianotus) Baudet, Baudet, tu ne concluds poinct in modo & figura. Voylà de quoy ſeruent les ſuppoſitions & parua logicalia. Panus pro quo ſupponit ? Confuſe (diſt Bandouille) & diſtributiue. Ie ne te demande pas (diſt Ianotus), Baudet, quo modo ſupponit, mais pro quo : c’eſt Baudet, pro tibiis meis. Et pour ce le porteray ie egomet, ſicut ſuppoſitum portat adpoſitum. Ainſi l’emporta en tapinois, comme feiſt Patelin ſon drap.

Le bon feut quand le touſſeux, glorieuſement, en plein acte tenu chez les Mathurins, requiſt ſes chauſſes & ſaulcices : car peremptoirement luy feurent deniez, par autant qu’il les auoit eu de Gargantua, ſelon les informations ſur ce faictes. Il leurs remonſtra que ce auoit eſté de gratis & de ſa liberalité, par laquelle ilz n’eſtoient mie abſoubz de leurs promeſſes.

Ce nonobſtant, luy fut reſpondu qu’il ſe contentaſt de raiſon, & que aultre bribe n’en auroit.

Raiſon ? (diſt Ianotus), nous n’en vſons poinct ceans. Traiſtres malheureux, vous ne valez rien. La terre ne porte gens plus meſchans que vous eſtes, ie le ſçay bien : ne clochez pas deuant les boyteux. I’ai exercé la meſchanceté auecques vous. Par la ratte Dieu, ie aduertiray le Roy des enormes abus que ſont forgez ceans, & par voz mains & meneez. Et que ie ſoye ladre s’il ne vous faict tous vifz bruſler comme bougres, traiſtres, hereticques & ſeducteurs, ennemys de dieu & de vertus.

Aces motz, prindrent articles contre luy, luy, de l’aultre coſté, les feiſt adiourner. Somme, le proces fut retenu par la court, & y eſt encores. Les magiſtres, ſur ce poinct, feirent veu de ne ſoy deſcroter, maiſtre Ianot, auecques ſes adherens feiſt veu de ne ſe mouſcher, iuſques à ce qu’en feuſt dict par arreſt definitif.

Par ces veuz ſont iuſques à preſent demourez & croteux & morueux, car la court n’a encores bien grabelé toutes les pieces. L’arreſt ſera donné es prochaines Calendes Grecques. C’eſt à dire : iamais. Comme vous ſçauez qu’ilz font plus que nature & contre leurs articles propres. Les articles de Paris chantent que dieu ſeul peult faire choſes infinies. Nature rien ne faict immortel : car elle mect fin & periode à toutes choſes par elle produictes. Car omnia orta cadunt, %c. Mais ces aualleurs de frimars font les proces dauant eux pendens & infiniz, & immortelz. Ce que faiſans, ont donné lieu & verifié le dict de Chilon Lacedemonien, conſacré en Delphes, diſant miſere eſtre compaigne de proces & gens playdoiens miſerables. Car plus toſt ont fin de leur vie que de leur droict pretendu.

Dea, il s’en vint en tapinois
A tout mon drap ſous ſon aiſſelle.