Gargantua · 21

es premiers iours ainſi paſſez & les cloches remiſes en leur lieu, les citoyens de Paris, par recongnoiſſance de ceſte honneſteté, ſe offrirent d’entretenir & nourrir ſa iument tant qu’il luy plairoit. Ce que Gargantua print bien à gré. Et l’enuoyerent viure en la foreſt de Biere. Ie croy qu’elle n’y ſoyt plus maintenant.

Ce faict, voulut de tout ſon ſens eſtudier à la diſcretion de Ponocrates, mais icelluy, pour le commencement, ordonna qu’il feroit à ſa maniere accouſtumee : affin d’entendre par quel moyen, en ſi long temps, ſes antiques precepteurs l’auoient rendu tant fat, niays & ignorant.

Il diſpenſoit doncques ſon temps en telle façon, que ordinairement il s’eſueilloit entre huyt & neuf heures, feuſt iour ou non : ainſi l’auoient ordonné ſes regens antiques, alleguans ce que dict Dauid : Vanum eſt vobis ante lucem ſurgere.

Puis ſe guambayoit, penadoit, & paillardoit parmy le lict quelque temps pour mieulx eſbaudir ſes eſperitz animaulx, & ſe habiloit ſelon la ſaiſon, mais voluntiers portoit il vne grande & longue robbe de groſſe frize fourree de renards : apres ſe peignoit du peigne de Almain, c’eſtoit des quatre doigtz & le poulce. Car ſes precepteurs diſoient que ſoy aultrement pigner, lauer, & nettoyer eſtoit perdre temps en ce monde.

Puis fiantoit, piſſoyt, rendoyt ſa gorge, rottoit, pettoyt, baiſloyt, crachoyt, touſſoyt, ſangloutoyt, eſternuoit, & ſe moruoyt en archidiacre, & deſieunoyt pour abatre la rouzee & mauluais aer : belles tripes frites, belles charbonnades, beaulx iambons, belles cabirotades & forces ſoupes de prime.

Ponocrates luy remonſtroit que tant ſoubdain ne debuoit repaiſtre au partir du lict, ſans auoir premierement faict quelque exercice. Gargantua reſpondit. Quoy ? N’ay ie faict ſuffiſant exercice ? Ie me ſuis vaultré ſix ou ſept tours parmi le lict dauant que me leuer. Ne eſt ce aſſez ? Le pape Alexandre ainſi faiſoit, par le conſeil de ſon medicin Iuif : & veſquit iuſques à la mort en deſpit des enuieux : mes premiers maiſtres me y ont acouſtumé, diſans que le deſieuner faiſoit bonne memoire, pour tant y beuuoient les premiers. Ie m’en trouue fort bien & n’en diſne que mieulx.

Et me diſoit Maiſtre Tubal (qui feut premier de ſa licence à Paris) que ce n’eſt tout l’aduantaige de courir bien touſt, mais bien de partir de bonne heure : auſſi n’eſt ce la ſanté totale de noſtre humanité boyre à tas, à tas, à tas, comme canes, mais ouy bien de boyre matin.

Vnde verſus

Leuer matin n’eſt poinct bon heur,
Boire matin eſt le meilleur.

Apres auoir bien à poinct deſieuné, alloit à l’egliſe, & luy pourtoit on dedans vn grand penier vn gros breuiaire empantophlé, peſant, tant en greſſe que en fremoirs & parchemin, poy plus poy moins, vnze quintaulx ſix liures. Là oyoit vingt & ſix ou trente meſſes, ce pendent venoit ſon diſeur d’heures en place empaletocqué comme vne duppe, & treſbien antidoté ſon alaine à force ſyrop vignolat. Auecques icelluy marmonnoit toutes ces kyrielles : & tant curieuſement les eſpluchoit qu’il n’en tomboit vn ſeul grain en terre.

Au partir de l’egliſe, on luy amenoit ſur vne traine à beufz vn faratz de patenoſtres de Sainct Claude, auſſi groſſes chaſcune qu’eſt le moulle d’vn bonnet, et, ſe pourmenant par les cloiſtres, galeries ou iardin, en diſoit plus que ſeze hermites.

Puis eſtudioit quelque meſchante demye heure, les yeulx aſſis deſſus ſon liure, mais (comme dict le Comicque) ſon ame eſtoit en la cuyſine.

Piſſant doncq plein vrinal, ſe aſſeoyt à table. Et par ce qu’il eſtoit naturellement phlegmaticque, commençoit ſon repas par quelques douzeines de iambons, de langues de beuf fumees, de boutargues, d’andouilles, & telz aultres auant coureurs de vin.

Ce pendent quatre de ſes gens luy gettoient en la bouche, l’vn apres l’aultre, continuement, mouſtarde à pleines palerees. Puis beuuoit vn horrificque traict de vin blanc pour luy ſoulaiger les roignons. Apres, mangeoit, ſelon la ſaiſon, viandes à ſon appetit, & lors ceſſoit de manger quand le ventre luy tiroit.

Aboyre n’auoit poinct fin ny canon, car il diſoit que les metes & bournes de boyre eſtoient quand, la perſonne beuuant, le liege de ſes pantoufles enfloit en hault d’vn demy pied.

Rien ne ſert de courir ; il faut partir à point.

(La Fontaine, Le Lièvre & la Tortue)

Leuer matin n’eſt poinct bon heur,
Boire matin eſt le meilleur.

Mais venir à poinct eſt meilleur.

(Voyez Pierre Grosnet)