LeCinquiemeLivre · 16

vs l’inſtant nous prinſmes la routte d’Outre, & contaſmes nos aduentures à Pantagruel, qui en eut commiſeration bien grande, & en fiſt quelques elegies par paſſetemps. Là arriuez nous refraiſchiſmes vn peu, & puiſaſmes eau freſche, prinſmes auſſi du bois pour nos munitions. Et nous ſembloient les gens du païs à leur phiſionomie bons compagnons & de bonne chere. Ils eſtoient tous oultres & tous pedoient de graiſſe & apperceuſmes ce, que n’auois encores veu en païs autre, qu’ils deſchiquetoient leur peau, pour y faire bouffer la graiſſe, ne plus ne moins que les ſallebrenaux de ma patrie deſcouppent le hault de leurs chauſſes pour y faire bouffer le taffetas. Et diſoient ce ne faire pour gloire & oſtentation, mais autrement ne pouuoient en leur peau. Ce faiſant auſſi, plus ſoudain deuenoient grands, comme les iardiniers inciſent la peau des ieunes arbres, pour pluſtoſt les faire croiſtre. Pres le haure eſtoit vn cabaret beau & magnifique en exterieure apparence, auquel accourir voyans nombre grand de peuple Outré, de tous ſexes, toutes aages, & tous eſtats, penſions que là fut quelque notable feſtin & banquet. Mais nous fut dit, qu’ils eſtoient inuicez aux creuailles de l’hoſte, & y alloient en diligence proche parens & alliez. N’entendans ce gergon, & eſtimans qu’en iceluy pays le feſtin on nommaſt creuailles, comme deça nous appellons enfianſailles, eſpouſailles, velenailles, tondailles, meſtiuales, fuſmes aduertis que l’hoſte en ſon temps auoit eſté bon raillard, grand grignoteur, beau mangeur de ſouppes Lionnoiſes, notable compteur de horloge, eternellement diſnant, comme l’hoſte de Rouillac, & ayans ia par dix ans pedé graiſſe en abondance eſtoit venu en ſes creuailles : & ſelon l’vſage du pays finoit ſes iours en creuant, plus ne pouuant le perytoine & peau par tant d’annees deſchiquetee, clorre & retenir ſes trippes, qu’elles ne effondraient par dehors, comme d’vn tonneau deffoncé. Et quoy, diſt Panurge, bonnes gens, ne luy ſauriez vous bien appoinct auecques bonnes groſſes ſangles, ou bons gros cercles de cormier, voire de fer, ſi beſoin eſt, le ventre relier : ainſi lié ne ietteroit ſi aiſement ſes fons hors, & ſi toſt ne creueroit. Ceſte parolle n’eſtoit acheuee, quant nous entendiſmes en l’air vn ſon haut & ſtrident, comme ſi quelque gros cheſne eſclatoit en deux pieces : lors fut dit par les voiſins, que ſes creuailles eſtoient faictes, & que ceſtuy eſclat eſtoit le ped de la mort. Là me ſouuint du venerable Abbé de Caſtilliers celuy qui ne daignoit biſcoter les chambrieres niſi in pontificalibus, lequel importuné de ſes parens & amis de reſigner, ſur ſes vieux iours ſon Abbaye, diſt & proteſta, que point ne ſe deſpouilleroit deuant ſoy coucher : & que le dernier ped que feroit ſa paternité, ſeroit vn ped d’Abbé.