LeCinquiemeLivre · 17

yans ſerpé nos ancres & gumenes feiſmes voile au doux Zephyre. Enuiron 222 mile, ſe leua vn furieux turbillon de vens diuers, autour duquel auec le trinquet & boulingues quelque peu temporiſaſmes, pour ſeulement n’eſtre dicts mal obeiſſans au Pilot, lequel nous aſſeuroit veuë la douceur d’iceux vens, veu auſſi leur plaiſant combat, enſemble la ſerenité de l’air, & tranquilité du courant, n’eſtre ny en eſpoir de grand bien, ny en crainte de grand mal. Partant à propos nous eſtre la ſentence du philoſophe, qui commandoit, ſouſtenir & abſtenir, c’eſt à dire, temporiſer. Tant toutesfois dura ce turbillon, qu’à noſtre requeſte importune, le Pilot eſſaya le rompre, & ſuiure noſtre routte premiere. De faict leuant le grand artemon, & à droitte calamite du Bouſſole dreſſant le gouuernail, rompit, moyennant vn rude cole ſuruenant, le turbillon ſuſdict. Mais ce feut en pareil deſconfort comme ſi euitans Charybde, feuſſions tombez en Scylle. Car à deux mile du lieu feurent nos naufs encarrees par-my les arenes, telles que ſont les Rats ſainct Maixant.

Toute noſtre chorme grandement ſe contriſtoit, & force vent à traucrs les meianes : mais frere Iean onques ne s’en donna melancholie, ains conſoloit maintenant l’vn, maintenant l’autre par douces parolles : leur remonſtrant, que de brief aurions ſecours du Ciel, & qu’il auoit veu Caſtor ſus le bout des antennes. Pluſt à Dieu, diſt Panurge, eſtre à ceſte heure à terre, & rien plus, & que chaſcun de vous autres, qui tant aimez la marine euſſiez deux cens mille eſcus, ie vous mettrois vn veau en muë, & refraiſchirois vn cent de fagots pour voſtre retour. Allez, ie conſens iamais ne me marier, faictes ſeulement que ie ſois mis en terre, & que i’aie cheual pour m’en retourner : de valet ie me paſſeray bien. Ie ne ſuis iamais ſi bien traité, que quand ie ſuis ſans valet : Plaute iamais n’en mentit, diſant le nombre de nos croix, c’eſt à dire, afflictions, ennuits, faſcheries, eſtre ſelon le nombre de nos valets, voire fuſſent-ils ſans langue, qui eſt la partie plus dangereuſe & male, qui ſoit à vn valet, & pour laquelle ſeule furent inuentees les tortures, queſtions, & gehennes ſur les valets, ailleurs non : combien que les cotteurs de Droict, en ce temps, hors ce Royaume, le ayent tiré à conſequence alogique, c’eſt à dire deſraiſonnable. En icelle heure vint vers nous droit aborder vne nauire chargée de tabourins : en laquelle ie recognu quelques paſſagers de bonne maiſon, entre autres Henry Cotiral, compaignon vieux : lequel à ſa ceinture vn grand viet-d’aze portoit, comme les femmes portent patenoſtres : & en main ſeneſtre tenoit vn gros, gras, vieux & ſalle bonnet d’vn taigneux : en ſa dextre tenoit vn gros trou de chou. De prime face qu’il me recognut s’eſcria de ioye, & me diſt : En ay-ie ? voyez-cy, monrtrant le viet-d’aze, le vray Algamana : ceſtuy bonnet doctoral eſt noſtre vnique Elixo : & cecy, monſtrant le trou de chou, c’eſt Lunaria maior. Nous la ferons à voſtre retour. Mais, di-ie, d’où venez, où allez, qu’apportez, auez ſenty la marine ? Il me reſpond, de la Quinte, en Touraine, Alchimie, iuſques au cul. Et quels gens, di-ie, auez là auec vous ſus le tillac ? Chantres, reſpondit-il, Muſiciens, Poëtes, Aſtrologues, Rimaſſeurs, Geomantiens, Alchimiſtes, Horlogiers, tous tiennent de la Quinte : ils en ont lettres d’auertiſſement belles & amples. Il n’eut acheué ce mot, quant Panurge indigné & faſché diſt, vous donques qui faictes tout iuſques au beau temps, & petis enfans, pourquoy icy ne prenez le Cap, & ſans delay, en plain courant, nous reuoquez ? I’y allois, diſt Henry Cotiral : à ceſte heure, à ce moment, preſentement ſerez hors du fond. Lors feiſt deffoncer 7532810. gros tabourins d’vn collé, ceſtuy coſté dreſſa vers le guillardet, & eſtroitement lierent en tous les endroits les gumenes, print noſtre Cap en pouppe & l’attacha aux bitons. Puis en premier hourt nous ſerpa des arenes auec facilité grande, & non ſans eſbattement. Car le ſon des tabourins, adioint le doux murmur du grauier, & le celeuſme de la Chorme nous rendoient harmonie peu moindre que celle des aſtres rotans, laquelle dit Platon auoir par quelques nuicts ouye dormant.

Nous abhorrans d’eſtre enuers eux ingrats pour ce bien fait reputez, leurs departions de nos andouilles, ampliſſions leurs tabourins de ſauciſſes, & tirions ſur le tillac ſoixante & deux aires de vin, quant deux grans Phyſiteres impetueuſement aborderent leur nauf, & leur ietterent dedans plus d’eau, que n’en contient la Vienne, depuis Chinon iuſques à Saulmur : & en emplirent tous leurs tabourins, & mouillerent toutes leurs antennes, & leurs baignoient les chauſſes par le collet. Ce que voyant Panurge, entra en ioye tant exceſſiue, & tant exerçea ſa ratelle, qu’il en eut la colique plus de deux heures. Ie leur voulois, dit-il, donner leur vin, mais ils ont eu leur eau bien à propos. D’eaue douce ils n’ont cure, & ne s’en ſeruent qu’à lauer les mains. De bourach leur ſeruira ceſte belle eau ſallee, de nitre & ſel Ammoniac, en la cuiſine de Geber. Autre propos ne nous fut loiſible auec eux tenir, le tourbillon premier nous tolliſſant liberté de timon. Et nous pria le Pilot que laiſſiſſions d’orenauent la mer nous guider, ſans d’autre choſe nous empeſcher, que de faire chere lie : & pour l’heure nous conuenoit coſtoyer ceſtuy turbillon, & obtemperer au courant, ſi ſans danger voulions au royaume de la Quinte paruenir.

… Lingua mali pars pessima servi.

(Juvénal, Satires, IX, 120)

Voila les compagnons & correcteurs des Rois
Que le bon Rabelais a ſurnommez Saulciſſes.