LeCinquiemeLivre · 22

a dame, ces propos acheuez, ſe retourna vers ſes gentils-hommes, & leurs diſt : L’orifice du ſtomach, commun ambaſſadeur pour l’auitaillement de tous membres, tant inferieurs, que ſuperieurs, nous importune leur reſtaurer, par appoſition de idoines alimens, ce que leur eſt deſcheut, par action continue de la naifue chaleur en l’humidité radicale. Spodizateurs, Ceſinins, Nemains, & Perazons par vous ne tienne que promptement ne ſoient tables dreſſees, friſonnantes de toute legitime eſpece de reſtaurans. Vous auſſi nobles Preguſtes, accompagnez de mes gentils Maſſiteres, l’eſpreuue de voſtre induſtrie paſſementee de ſoin & diligence fait, que ne vous puis donner ordre, que de ſorte ne ſoyez en vos offices, & vous teniez touſiours ſur vos gardes. Seulement vous ramente faire, ce que faites. Ces mots acheuez ſe retira auec part de ſes damoiſelles quelque peu de temps, & nous fut diſt, que c’eſtoit pour ſoy baigner : comme eſtoit la couſtume des anciens, autant vſitee, comme eſt entre nous de preſent lauer les mains, auant le paſt. Les tables feurent promptement dreſſees, puis feurent couuertes de nappes treſprecieuſes. L’ordre du ſeruice fut tel, que la dame ne mangea rien, fors celeſte ambroſie, rien ne beut que Nectar diuin. Mais les ſeigneurs & dames de ſa maiſon furent, & nous auec eux ſeruiz de viandes rares, friandes & precieuſes, ſi onques en ſongea Appicius.

Sus l’iſſue de table fut apporté vn pot pourry, ſi par cas famine n’euſt donné trefues, & eſtoit de telle amplitude & grandeur, que la plataine d’or, laquelle Pythius Bithinus donna au Roy Daire, à peine l’euſt couuert. Le pot pourry eſtoit plain de potages d’eſpeces diuerſes, ſallades, fricaſſees, ſaulgrenees, cabirotades, rouſty, boully, carbonnades, grandes pieces de bœuf ſallé, iambons de antiquailles, ſaulmates deifiques, paſtiſſeries, tarteries, vn monde de coſcotons à la moreſque : formages, ioncades, gelees, fruicts de toutes fortes. Le tout me ſembloit bon & friant : ie toutefois n’y taſtay, pour eſtre bien remply & refait. Seulement ay vous aduertir, que là vy des partez en parte, choſe aſſes rare, & les partez en parte eſtoient partez en pot. Au fond d’iceluy i’apperceu forces dez, cartes, tarots, luettes, eſchets, & tabliers, auec plaine taſſe d’eſcuz au ſoleil, pour ceux qui iouer voudroient.

Au deſſous finablement i’aduiſay nombre de mulles bien phalerees, auec houſſes de velours, haquenees de meſme à vſance d’hommes & femmes, lectieres bien veloutees pareillement ne ſçay combien, & quelques coches à la ferraroiſe, pour ceux qui voudroient aller hors à l’eſbat.

Cela ne me ſembla eſtrange, mais ie trouuay bien nouuelle la maniere comment la dame mangeoit. Elle ne maſchoit rien, non qu’elle n’euſt dens forces & bonnes, non que ſes viandes ne requiſſent maſtication, mais telle eſtoit ſon vſage & couſtume. Les viandes, deſquelles ſes Preguſtes auoient fait eſſay, prenoient ſes Maſſiteres, & noblement les luy maſchoient, ayans le goſier doublé de ſatin cramoiſi, à petites nerueures, & canetille d’or, & les dens d’Iuoire bel & blanc : moyennent leſquelles, quant ils auoient bien à poinct maſché les viandes, ils les luy coulloient par vn embut d’or fin iuſques dedens l’eſtomach. Par meſme raiſon nous fut dict, qu’elle ne fiantoit ſinon par procuration.