LeCinquiemeLivre · 21

e vy apres grand nombre de ſes officiers ſuſdits, leſquels blanchiſſoient les Ethiopiens en peu d’heure, du fond d’vn panier leur frottant ſeulement le ventre.

Autres à trois couples de Regnards ſouz vn ioug aroient le riuage areneux, & ne perdoient leur ſemence.

Autres lauoient les tuilles, & leur faiſoient perdre couleur.

Autres tiroient eau des Pumices, que vous appeliez Pierre-ponce, la pillant long temps en vn mortier de marbre, & luy changeoient ſubſtance.

Autres tondoient les Aſnes, & y trouuoient toiſon de laine bien bonne.

Autres cueilloient des Eſpines raiſins, & figues des chardons.

Autres tiroient laict des boucs, & dedans vn crible le receuoient, à grand profit de meſnage.

Autres lauoient les teſtes des Aſnes, & n’y perdoient la laixiue.

Autres chaſſoient aux vents auec des rets, & y prenoient Eſcreuiſſes Decumanes.

I’y vy vn ieune Spodizateur, lequel artificiellement tiroit des peds d’vn Aſne mort, & en vendoit l’aune cinq ſols.

Vng autre putrefioit des Sechaboth. O la belle viande.

Mais Panurge rendit vilainement ſa gorge, voyant vn Archaſdarpenim, lequel faiſoit putrefier grande doye d’vrine humaine en fiant de cheual, aucc force merde Chreſtienne. Fy le vilain. Il toutesfois nous reſpondit que d’icelle ſacree diſtilation abbreuuoit les Roys & grans Princes, & par icelle leur allongeoit la vie d’vne bonne toile ou deux.

Autres rompoient les Andouilles au genoil.

Autres eſcorchoient les Anguilles par la queuë, & ne crioient leſdictes Anguilles auant que d’eſtre eſcorchees, comme font celles de Melun.

Autres de neant faiſoient choſes grandes, & grandes choſes faiſoient à neant retourner.

Autres coupoient le feu auec vn coufteau, & puiſoient l’eau auec vn rets.

Autres faiſoient de veſſies lanternes, & de nues poiſles d’airain. Nous en veiſmes douze autres banquetans ſouz vne fueillade, & beuuans en belles & amples retumbes vins de quatre ſortes, frais & delicieux à tous, & à toute reſte : & nous fut dit, qu’ils haulſoient le temps ſelon la maniere du lieu : & qu’en ceſte maniere Hercules iadis haulſa le temps auec Atlas.

Autres faiſoient de neceſſité vertu, & me ſembloit l’ouurage bien beau, & à propos.

Autres faiſoient Alchimie auec les dens : en ce faiſant empliſſoient aſſez mal les ſelles percees.

Autres dedans vn long parterre ſongneuſement meſuroient les ſaux des puſles : & ceſtuy acte m’affermoient eſtre plus que neceſſaire, au gouuernement des Royaumes, conduictes des guerres, adminiſtrations des Republiques : alleguant que Socrates, lequel premier auoit des cieux en terre tiré la Philoſophie, & d’oiſiue & curieuſe, l’auoit rendue vtile & profitable, employoit la moitié de ſon eſtude à meſurer le ſaux des puſſes, comme atteſte Ariſtophanes le Quinteſſential.

Ie vy deux Giborins à part ſur le haut d’vne tour, leſquels faiſoient ſentinelle, & nous fut dit, qu’ils gardoient la Lune des loups.

I’en rencontray quatre autres, en vn coin de iardin, amerement diſputans, & preſts à ſe prendre au poil l’vn l’autre : demandant dont ſourdoit leur different, entendy, que ia quatre iours eſtoient paſſez, depuis qu’ils auoient commencé diſputer, de trois hautes & plus que Phiſicales propoſitions : à la reſolution deſquelles, ils ſe promettoient montaignes d’or. La premiere eſtoit de l’ombre d’vn Aſne couillard : l’autre de la fumee d’vne Lanterne : la tierce, du poil de Cheure, ſcauoir ſi c’eſtoit laine. Puis nous fut dit, que choſe eſtrange ne leur ſembloit eſtre, deux contradictoires vrayes en mode, en forme, en figure & en temps. Choſe pour laquelle les Sophiſtes de Paris pluſtoſt ſe feroient deſbaptiſer, que la confeſſer.

Nous curieuſement conſiderans les admirables operations de ces gens, ſuruint la Dame auec ſa noble compagnie, ia reluiſant le clair Heſperus. A ſa venue fuſmes derechef en nos ſens eſpouuentez, & eſblouys en noſtre veuë. Incontinent noſtre effray apperceut, & nous diſt : Ce que fait les humains penſemens eſgarer par les abiſmes d’admiration n’eſt la ſouueraineté des effects, leſquels apertement ils eſprouuent naiſtre des cauſes naturelles, moyennent l’induſtrie des ſages artiſans : c’eſt la nouueauté de l’experience entrant en leurs ſens, non preuoyans la facilité de l’œuure, quant iugement ſerain aſſocie eſtude diligent. Pourtant ſoyez en cerueau, & de toute frayeur vous deſpouillez, ſi d’aucune eſtes faiſis à la conſideration de ce que voyez par mes officiers eſtre fait. Voyez, entendez, contemplez à voſtre libre arbitre, tout ce que ma maiſon contient : vous peu à peu emancipans du ſeruage d’ignorance. Le cas bien me ſiet en volonté. Pour de laquelle vous donner enſeignement non feint, en contemplation des ſtudieux deſirs, deſquels me ſemblez auoir en vos cœurs fait inſigne mont-ioye, & ſuffiſante preuue, ie vous retiens preſencement en eſtat & office de mes abſtracteurs. Par Geber mon premier Tabachin y ſerez deſcris au partement de ce lieu. Nous la remerciaſmes humblement, ſans mot dire, acceptaſmes l’offre du bel eſtat, qu’elle nous donnoit.

Vous ſeriez en peu d’heure femme.

… Idem jungat vulpes, et mulgeat hircos.

(Virgile, Églogues, III, 91)

Si le temps eſt bas, ie le hauſſe,
En bien beuuant, voire du bon.