LeCinquiemeLivre · 37

eves ces inſcriptions, iettay mes yeux à la contemplation du manifique temple, & conſiderois l’incredible compacture du paué, auquel, par raiſon, ne peut eſtre ouurage comparé quiconque, ſoit, ou ait eſté deſſous le firmament, fuſt-ce celuy du temple de Fortune en Preneſte, au temps de Sylla, ou le paué des Grecs appelle Aſarotum, lequel fiſt Soſiſtratus en Pergame. Car il eſtoit ouurage teſſeré, en forme de petits carreaux, tous de pierres fines, & polies, chaſcune en ſa couleur naturelle : L’vne de Iaſpe rouge, tainct plaiſamment de diuerſes macules : l’autre d’Ophite : l’autre de Porphyre : l’autre de Licoptalmie, ſemé de ſcintiles d’or menues comme atomes : l’autre d’Agathe à onde de petis flammeaux, confus & ſans ordre, de couleur laictee : l’autre de Calcedoine treſcher : l’autre de Iaſpe verd, auec certaines veines rouges & Iaunes : & eſtoient en leur aſſiete departies par ligne diagonale.

Deſſus le portique, la ſtructure du paué eſtoit vne emblemature, à petites pierres rapportees, chaſcune en ſa naïfue couleur, ſeruans au deſſain des figures, & eſtoit comme ſi par deſſus le paué ſuſdit, on euſt ſemé vne Ionchee de Pampre, ſans trop curieux agenſement : Car en vn lieu ſembloit eſtre eſpandu largement, en l’autre moins : & eſtoit ceſte infoliature inſigne en tous endroits, mais ſingulierement y apparoiſſoient, au demy-iour, aucuns limaſſons, en vn lieu rampans ſus les raiſins, en autre, petis liſars courans à trauers le Pampre, en autre apparoiſſoient les raiſins à demy, & raiſins totalement meurs : par tel art & engin de l’Architecte compoſez & formez, qu’ils euſſent auſſi facilement deceu les eſtourneaux & autres petis oiſelets, que fiſt la peincture de Xeuxis Heracleotain, quoy que ſoit ils nous trompoient treſbien : Car à l’endroit, auquel l’Architecte auoit le pampre bien eſpois ſemé, craignans nous offenſer les pieds, nous marchions haut à grandes eniambees, comme on fait paſſant quelque lieu inegal & pierreux. Depuis ietay mes yeux à contempler la voulte du temple, auec les parois, leſquels eſtoient tous incruſtez de marbre, & porphire, à ouurage moſayque : auec vne mirifique emblemature, depuis vn bout iuſques à l’autre, en laquelle eſtoit, commençant à la par feneſtre de l’entree, en elegance incroiable, repreſentee, la bataille, que le bon Bacchus gagna contre les indians, en la maniere, que s’enſuit.