LeCinquiemeLivre · 36

n fin des degrez rencontraſmes vn portal de fin iaſpe, tout compaſſé & baſty à ouurage & forme dorique : en la face duquel eſtoit, en letres Ioniques d’or treſpeur eſcrite ceſte ſentence Ἐν οἴνῳ ἀλήθεια. c’eſt à dire, en vin verité. Les deux parties eſtoient d’arain, comme Corinthian, maſſiues, faites à petites vinettes, enleuees, & eſmaillees mignonnement, ſelon l’exigence de la ſculpture : & eſtoient enſemble iointes, & refermees eſgalement en leur mortaiſe, ſans clauier, & ſans catenat, ſans lyaiſon aucune. Seulement y pendoit vn Diamant Indique, de la groſſeur d’vne febue Egyptiatique, enchaſſé en or obrize, à deux pointes, en figure exagone, & en ligne directe : à chaſcun collé vers le mur, pendoit vne poignee de Scordeon.

Là nous diſt noſtre noble Lanterne, qu’euſſions ſon excuſe pour legitime, ſi elle deſiſtoit plus auant nous conduire : Seulement qu’euſſions à obtemperer és Inſtructions de la Pontife Bacbuc : Car entrer dedans ne luy eſtoit permis, pour certaines cauſes, leſquelles taire meilleur eſtoit à gens viuans vie mortelle, qu’expoſer. Mais en tout euenement, nous commanda eſtre en cerueau, n’auoir frayeur ne peur aucune, & d’elle ſe confier pour la retraite : puis tira le Diamant pendant à la commiſſure des deux portes, & à dextre le ietta dedans vne capſe d’argent, à ce expreſſement ordonnee : tira auſſi de l’eſſueil de chaſcune porte vn cordon de ſoye cramoiſine longue d’vne toiſe & demie, auquel pendoit le Scordon, l’attacha à deux boucles d’or, expreſſement pour ce pendantes aux collez, & ſe retira à part.

Soudainement les deux portes, ſans que perſonne y touchaſt, de ſoy-meſme s’ouurirent, & s’ouurant firent, non bruit ſtrident, non fremiſſement horrible, comme font ordinairement portes de bronze, rudes & peſantes, mais doux & gratieux murmur, retentiſſant par la voulte du temple, duquel ſoudain Pantagruel entendit la cauſe, voyant ſous l’extremité de l’vne & l’autre porte, vn petit cylindre, lequel par ſus l’eſſueil ioignoit la porte, & ſe tournant ſelon qu’elle ſe tiroit vers le mur, deſſus vne dure pierre d’Ophytes, bien torſe & eſgalement polie, par ſon frottement faiſoit ce doux & harmonieux murmur.

Bien ie m’eſbahiſſois comment les deux portes, chaſcune par ſoy, ſans l’oppreſſion de perſonne eſtoient ainſi ouuertes : pour ceſtuy cas merueilleux entendre, apres que tous fuſmes dedans entrez ie proiettay ma veuë entre les portes, & le mur, conuoiteux de ſcauoir par quelle force, & par quel inſtrument eſtoient ainſi refermees : doutant que noſtre amiable Lanterne euſt à la concluſion d’icelles appoſé l’herbe dite Ethiopis, moyennant laquelle on ouure toutes choſes fermees : mais i’apperçeu que la part en laquelle les deux portes ſe fermoient, en la mortaiſe interieure, eſtoit vne lame de fin acier, enclauee ſur la bronze Corinthiane.

I’apperçeu d’auantage deux tables d’Aimant Indique, amples & eſpoiſſes de demye paume, à couleur cerulee, bien licees & bien polies : d’icelles toute l’eſpoiſſeur eſtoit dedans le mur du temple engrauee, à l’endroit auquel les portes entierement ouuertes, auoient le mur pour fin d’ouuerture.

Par, donques, la rapacité violente de l’Aimant, les lames d’Acier, par occulte & admirable inſtitution de nature, patiſſoient ceſtuy mouuement : conſequemment les portes y eſtoient lentement rauies & portees, non touſiours toutesfois, mais ſeulement l’Aimant ſuſdit oſté : par la prochaine ſeſſion duquel l’Acier eſtoit de l’obeiſſance qu’il a naturellement à l’Aimant abſout & diſpenſé, oſtees auſſi les deux poignees de Scordeon, leſquelles noſtre ioyeuſe Lanterne auoit, par le cordon cramoiſin, eſlongnees & ſuſpendues, par ce qu’il mortifie l’Aimant & deſpouille de celle vertu attractiue. En l’vne des tables ſuſdites à dextre, eſtoit exquiſitement inſculpé en lettres Latines antiquaires ce vers Iambique ſenaire.

Ducunt volentem fata, nolentem trahunt.

Les deſtinees meuuent celuy qui conſent, tirent celuy qui refuſe. En l’autre ie veis à feneſtre en maiuſcules lettres elegantement inſculpé ceſte ſentence.

Toutes choſes ſe meuuent à leur fin.

Que ſert-il de luter contre les deſtinées ?
Le ſage en eſt conduit, le rebelle entraiſné.