LeCinquiemeLivre · 39

onseqvemment eſtoit figuré le Hourt, & l’aſſaut que donnoit le bon Bacchus contre les Indians. Là conſiderois que Silenus chef de l’auantgarde ſuoit à groſſes gouttes, & ſon Aſne aigrement tourmentoit : l’Aſne de meſmes ouuroit la gueule horriblement, s’eſmouchoit, deſmarchoit, s’eſcarmouchoit, en façon eſpouuantable, comme s’il euſt vn Freſlon au cul.

Les Satyres Capitaines, Sergens de bandes, Caps d’Eſcadre, Corporals, auec cornaboux ſonnant les orties furieuſement tournoyoient autour de l’armee à ſaux de cheures, à bons, à pets, à ruades, & penades, donnans courage aux compagnons de vertueuſement combatre : tout le monde en figure cryoit Euohe. Les Menades premieres faiſoient incurſion ſur les Indians auec cris horribles, & ſons eſpouuantables de leurs tymbous & boucliers : tout le Ciel en retentiſſoit, comme deſignoit l’Emblemature : A fin que plus tant n’admiriez l’art d’Apelles, Ariſtides Thebain, & autres qui ont painct les tonnerres, eſclairs, foudres, vents, paroles, meurs & les eſprits.

Conſequemment eſtoit l’oſt des Indians comme aduerty que Bacchus mettoit leur pays en vaſtation. En front eſtoient les Elephans chargez de Tours auec gens de guerre en nombre infiny : mais toute l’armee eſtoit en routte & contre eux, & ſus eux le tournoient & marchoient leurs Elephans, par le tumulte horrible des Bacchides, & la terreur Panique qui leur auoit le ſens tollu : Là euſſiez veu Silenus ſon Aſne aigrement talonner, & s’eſcrimer de ſon baſton à la vieille eſcrime, ſon Aſne voltiger apres les Elephans la gueule bee comme s’il brailloit, & braillant martiallement (en pareille braueté, que iadis eſueilla la nymphe Lotis en plains Bacchanales, quant Priapus plein de Priapiſme la vouloir dormant Priapiſer ſans la prier) ſonnaſt l’aſſaut.

Là euſſiez veu Pan ſauteler auec ſes iambes tortes, autour des Menades, auec ſa fluſte ruſtique les exciter à vertueuſement combatre. Là euſſiez auſſi veu en apres vn ieune Satyre mener priſonniers dixſept Roys : vne Bacchide tirer auec ſes Serpens quarante & deux Capitaines : vn petit Faune porter douze enſeignes prinſes ſur les ennemis : & le bon homme Bacchus ſur ſon char ſe pourmener en ſeureté parmy le camp, riant, ſe gaudiſſant & beuuant d’autant à vn chaſcun. En fin eſtoit repreſenté en figure Emblematique le trophee de la victoire & triomphe du bon Bacchus.

Son char triomphant eſtoit tout couuert de Lierre, prins & cueily en la montagne Meros, & ce pour la rarité, laquelle hauſſe le pris de toutes choſes, en Indie expreſſement, d’icelles herbes. En ce depuis l’imita Alexandre le grand en ſon triomphe Indique, & eſtoit le char tyré par Elephans ioints enſemble. En ce depuis l’imita Pompee le grand à Rome, en ſon triomphe Aphricain. Deſſus eſtoit le noble Bacchus beuuant en vn canthare. En ce depuis l’imita Caius Marius, apres la vidoire des Cymbres, qu’il obtint pres Aix en Prouence. Toute ſon armee eſtoit couronnee de Lierre : leurs tyrſes, boucliers & tymbons en eſtoient couuers. Il n’eſtoit l’Aſne de Silenus qui n’en fuſt capparaçonné.

Es coſtez du char eſtoient les Roys Indians, prins & liez à groſſes chaiſnes d’or : toute la brigade marchoit auec pompes diuines en ioye & lieſſe indicible, portant infinis trophees, fercules & deſpouilles des ennemis, en ioyeux Epinicies, & petites chanſons villatiques & dithyrambes reſonnans. Au bout eſtoit deſcript le pays d’Egipte auec le Nil & ſes Crocodiles, Cercopitheces, Ibides, Singes, Trochiles, Ichneumones, Hipopotames, & autres belles à luy domeſtiques. Et Bacchus marchoit en icelle contree à la conduite de deux beufs, ſus l’vn deſquels eſtoit eſcript en lettres d’or, Apis, ſus l’autre, Oſyris, pource qu’en Egipte, auant la venue de Bacchus, n’auoit eſte veu beuf ny vache.