LeCinquiemeLivre · 42

vis nous commanda eſtre hanaps, taſſes & gobelets preſentez, d’or, d’argent, de criſtalin, de porcelaine : & fuſmes gratieuſement inuitez à boire de la liqueur ſourdante d’icelle fontaine : Ce que fiſmes treſvolontiers : car pour plainctiue eſtoit vne fontaine fantaſtique, d’eſtoffe & ouurage plus precieux, plus rare & mirifique, qu’onques n’en ſongea dedans les limbes Pluto. Le ſoubaſtement d’icelle eſtoit de treſpur & treſlimpide alabaſtre, haulteur ayant de trois palmes, peu plus, en figure heptagonne, eſgalement party par dehors, auec ſes ſtylobates, arulettes, cimaſultes & vndiculations doriques à l’entour. Par dedans eſtoit ronde exactement. Sus le poinct moyen de chaſcun angle & marge eſtoit aſſiſe vne coulomne ventricule, en forme d’vn Cycle d’yuoire ou alabaſtre, les modernes architectes l’appellent portri, & eſtoient ſept en nombre total, ſelon les ſept angles. La longueur d’icelles, depuis les baſes iuſques aux architraues, eſtoit de ſept palmes, peu moins, à iuſte & exquiſe dimention d’vn diametre, paſſant par le centre de la circonferance & rotondité interieure.

Et eſtoit l’aſſiete en telle compoſition, que proiettans la veuë derriere l’vne quelle que fuſt en ſa cuue, pour regarder les autres oppoſites, trouuions le cone Pyramidal de noſtre ligne viſuale finer au centre ſuſdit, & là receuoir, de deux oppoſites, rencontre d’vn triangle equilateral : duquel deux lignes partiſſoient eſgalement la colomne, celle que voulions meſurer, & paſſante d’vn coſté & d’autre, deux colomnes franches à la premiere, tierce partie d’interualle, rencontroient leur ligne baſique & fondamentale : laquelle par ligne conſulte, pourtraicte iuſques au centre vniuerſal, eſgalement mipartie, rendoit en iuſte depart la diſtance des ſept colomnes oppoſites par ligne directe, principiante à l’angle obtus de la marge : comme vous ſçauez qu’en toute figure angulaire impare, vn angle touſiours eſt au milieu des deux autres trouué intercalant. En quoy nous eſtoit tacitement expoſé, que ſept demis diametres font en proportion geometrique amplitude & diſtance, peu moins, telle qu’eſt la circonferance de la figure circulaire, de laquelle ils ſeroient extraits, ſçauoir eſt, trois entiers auec vne huitieſme & demie, peu plus, ou vne ſeptieſme & demie, peu moins, ſelon l’antique aduertiſſement d’Euclides, Ariſtoteles, Archimedes & autres. La premiere colomne, ſçauoir eſt, celle laquelle à l’entree du temple s’obiettoit à noſtre veuë, eſtant de Saphir azuré & celeſte. La ſeconde de Hiacinthe, naïfuement la couleur, auec lettres Grecques A I. en diuers lieux, repreſentant de celle fleur en laquelle fut d’Aiax le ſang colerique conuerty. La tierce de Diamant Anachite, brillant & reſplendiſſant comme foudre. La quarte de Rubis baillay, maſculin, & Amethiſtizant, de maniere que ſa flamme & lueur finiſſoit en pourpre & violet, comme eſt l’Amethiſte. La quinte d’Emeraude, plus cinq cens fois manifique qu’onques ne fut celle de Serapis dedans le labyrinthe des Egyptiens, plus floride & plus luyſante que n’eſtoient celles qu’en lieu des yeux on auoit oppoſé au Lion marbrin giſant pres le tombeau du roy Hermias. La ſexte d’Agathe plus ioyeuſe, & variante en diſtinctions de macules & couleurs, que ne fut celle que tant chere tenoit Pirrhus Roy des Epyrothes. La ſeptieſme de Sienite tranſparente, en blancheur de Berylle, auec reſplendeur comme miel Hymetian, & dedans y apparoiſſoit la Lune, en figure & mouuement telle qu’elle eſt au ciel, pleine, ſilente, croiſſante, ou decroiſſante.

Qui ſont pierres, par les antiques Caldeans attribuees aux ſept planettes du ciel. Pour laquelle choſe par plus rude Minerue entendre, ſus la premiere de Saphir, eſtoit au deſſus du chapiteau à la viue & centrique ligne perpendiculaire elleuee en plomb Elician bien precieux, l’image de Saturne tenant ſa faux, ayant aux pieds vne Gruë d’or artificiellement eſmaillee ſelon la competance des couleurs naifuement deuz à Toiſeau Saturnin. Sus la ſeconde de Hiacinthe, tournant à gauſche, eſtoit Iupiter en eſtain Iouetian, ſus la poictrine vn Aigle d’or eſmaillé, ſelon le naturel. Sus la troiſieſme Phebus en obrize, en ſa main dextre vn coq blanc. Sus la quatrieſme en airain Corinthien Mars, à ſes pieds vn Lion. Sus la cinquieſme Venus en cuyure, matiere pareille à celle dont Ariſtonides fiſt la ſtatue d’Athamas expriment en rougiſſante blancheur la honte qu’il auoit contemplant Learche ſon fils mort d’vne cheute à ſes pieds. Sus la ſixieſme, Mercure en hydrargyre, fixe, maleable & immobile, à ſes pieds vne Cigogne. Sus la ſeptieſme Luna en argent, à ſes pieds vn Leurier. Et eſtoient ſtatues de telle hauteur qui eſtoit la tierce partie des colomnes ſubiettes, peu plus, tant ingenieuſement repreſentees, ſelon le portraict des Mathematiciens, que le canon de Polycletus, lequel faiſant fut dit l’art apprendre, de l’art auoir fait, à peine y euſt eſté receu à comparaiſon.

Les baſes des colomnes, les chapiteaux, les architraues, zoophores & cornices, eſtoient à ouurage Phrygien, maſſifues d’or, plus pur & plus fin, que n’en porte le Leede pres Montpelier, Ganges en Indie, le Pau en Italie, l’Hebrus en Thrace, le Tage en Eſpagne, le Padol en Lydie. Les arceaux entre les colomnes ſurgeans, de la propre pierre d’icelles iuſques à la prochaine par ordre : ſçauoir eſt de Saphir vers le Hiacinthe, de Hiacinthe vers le Diamant, & ainſi conſecutiuement. Deſſus les arces & chapiteaux de colomne en face interieure eſtoit vne croppe erigee pour couuerture de la fontaine, laquelle derriere l’aſſiette des planettes commençoit en figure heptagone, & lentement finiſſoit en figure ſpherique : & eſtoit de Criſtal tant emundé, tant diaphane & tant poly, entier & vniforme en toutes ſes parties, ſans venes, ſans nuees, ſans glaſſons, ſans capilamans, que Xenocrates onques n’en vid qui fuſt à luy parangonner. Dedans la corpulance d’icelle, eſtoient par ordre en figure & characteres exquis, artificiellement inſculpez les douze ſignes du zodiaque, les douze mois de l’an, auec leurs proprietez, les deux Solſtices, les deux Equinoxes, la Ligne eclyptique, auec certaines plus inſignes eſtoilles fixes, autour du pole Antarcique, & ailleurs, par tel art & expreſſion que ie penſois eſtre ouurage du Roy Necepſus, ou de Petoſiris antique Mathematicien.

Sus le ſommet de la croppe ſuſdite, correſpondant au centre de la fontaine, eſtoient trois vnions eleichies, vniformes de figure turbinee en totale perfection lachrimale, toutes enſemble coherentes en forme de fleur de lis, tant grandes, que la fleur excedoit vne palme. Du calice d’icelles ſortoit vn Carboucle gros comme vn œuf d’Autruche, taillé en forme heptagonne (c’eſt nombre fort aimé de nature) tant prodigieux & admirable, que leuans nos yeux pour le contempler, peu s’en faillit, que perdiſſions la veuë. Car plus flamboyant, ne plus croiſſant eſt le feu du Soleil, ne l’eſclair, lors il nous apparoiſſoit : tellement qu’entre iuſtes eſtimateurs, iugé facilement ſeroit, plus eſtre en ceſte fontaine, & lampes cy deſſus deſcriptes, de richeſſes & ſingularitez, que n’en contiennent l’Aſie, l’Afirique & l’Europe enſemble. Et euſt auſſi facilement obſcurcy le pantharbe de Iarchas magicien Indic, que ſont les eſtoilles par le Soleil & clair midy.

Aille maintenant ſe vanter Cleopatra Royne d’Egypte, auec ſes deux vnions pendens à ſes aureilles, deſquels l’vn, preſent Antonius triumuir, elle par force de vinaigre fondit en eau, eſtant à l’eſtimation de cent fois Sexſterces.

Aille Pompeie Plautine auec ſa robbe toute couuerte d’Emeraudes & marguerites, en tiſſure alternatiue, laquelle tiroit en admiration tout le peuple de la ville de Rome. Laquelle on diſoit eſtre foſſe, & magazin des vainqueurs larrons de tout le monde.

Le coulement & laps de la fontaine eſtoit par trois tubules & canals faits de marguerites fines, en l’aſſiette de trois angles equilateraux promarginaires cy deſſus expoſez : & eſtoient les canals produits en ligne Limaciale biparciente. Nous auions iceux conſideré, ailleurs tournions noſtre veuë, quant Bacbuc nous commanda entendre à l’exciture de l’eau, lors entendiſmes vn ſon à merueille harmonieux, obtus toutesfois, & rompu, comme de loin venant & ſoubterrain. En quoy plus nous ſembloit delectable, que ſi apert euſt eſté, & de pres ouy : De ſorte qu’autant comme par les feneſtres de nos yeux, nos eſprits s’eſtoient oblectez à la contemplation des choſes ſuſdites, autant en reſtoit-il aux aureilles à l’audiance de ceſte harmonie. Adonc nous diſt Bacbuc : Vos Philoſophes nient eſtre par vertu de figures mouuement fait, oyez icy & voyez le contraire. Par la ſeule figure Limaciale que voyez biparciente, enſemble vne quintuple infoliature mobile à chaſcune rencontre interieure : telle qu’eſt en la veine caue, au lieu qu’elle entre le dextre ventricule du cœur, eſt ceſte ſacree fontaine excolee, & par icelle vne armonie telle, que elle monte iuſques à la mer de voſtre monde. Puis commanda qu’on nous fiſt boire.

Car pour clerement vous aduertir, nous ne ſommes du calibre d’vn tas de veaux, qui, comme les paſſereaux, ne mangent ſinon qu’on leur tappe la queuë, pareillement ne boiuent ne mangent, ſinon qu’on les rue à grands coups de leuier : iamais perſonne n’eſconduiſons nous inuitant courtoiſement à boire. Puis nous interrogua Bacbuc, demandant que nous en ſembloit. Nous luy fiſmes reſponſe que ce nous ſembloit bonne & freſche eau de fontaine, limpide & argentine, plus que n’eſt Argirondes en Etoile, Peneus en Theſſalie, Axius en Mydonie, Cidnus en Cilicie, lequel voyant Alexandre Macedon tant beau, tant clair, & tant froid en cœur d’eſté, compoſa la volupté de ſoy dedans baigner, au mal qu’il preuoyoit luy aduenir de ce tranſitoire plaiſir. Ha ! diſt Bacbuc, voila que c’eſt, non conſiderer en ſoy, n’entendre les mouuemens que faict la langue muſculeuſe, lors que le boire deſſus coule pour deſcendre en l’eſtomac. Gens peregrins, auez vous les goſiers enduits, pauez & eſmaillez, comme eut iadis Pythillus, dit Theutes, que de ceſte liqueur deifique onques n’auez le gouſt de ſaueur recongneu ? apportez icy, diſt à ſes damoiſelles, mes deſcrottoires que ſçauez, à fin de leur racler, eſmonder, & nettoyer le palat.

Furent donques apportez beaux, gros & ioyeux iambons, belles, groſſes & ioyeuſes langues de bœuf fumees, ſaumades belles & bonnes, ceruelats, boutargues, bonnes & belles ſauciſſes de venaiſon, & tels autres ramonneurs de goſier : par ſon commandement nous en mangeaſmes iuſques là, que confeſſions nos eſtomachs eſtre treſbien eſcurez de ſoif nous importunant aſſez faſcheuſement. Donc nous diſt : iadis vn Capitaine Iuif docte & cheualeureux, conduiſant ſon peuple par les deſers en extreme famine, impetra des cieux la manne laquelle leur eſtoit de gouſt tel par imagination que parauant realement leur eſtoient les viandes : Icy de meſmes beuuans de ceſte liqueur mirifique ſentirez gouſt de tel vin, comme l’aurez imaginé. Or imaginez, & beuuez. Ce que nous fiſmes : puis s’eſcria Panurge diſant, Par dieu, c’eſt ici vin de beaune, meilleur qu’onques iamais ie beus, ou ie me donne à nonante & ſeize diables. O pour plus longuement le gouſter, qui auroit le col long de trois coudees, comme deſiroit Philoxenus, ou comme vne Gruë, ainſi que ſouhaittoit Melanthius.

Foy de Lanternier, s’eſcria frere Iean, c’eſt vin de Grece, gallant & voltigeant. O pour dieu, amye, enſeignez moy la maniere comment tel le faictes ! A moy, diſt Pantagruel, il me ſemble que ſont vins de Mireuaux. Car auant boire ie l’Imaginois. Il n’a que ce mal qu’il eſt frais, mais ie dis frais, plus que glaſſe, que l’eau de Nonacris & Derce, plus que la fontaine de Conthoperie en Corinthe, laquelle glaſſoit l’eſtomach & parties nutritiues de ceux qui en beuuoient, Beuuez, diſt Bacbuc, vne, deux ou trois fois. De rechef changeans d’Imagination telle trouuerez au gouſt, ſaueur ou liqueur comme l’aurez imaginé. Et doreſnauant diſtes qu’à Dieu rien ſoit impoſſible. Onques, reſpondi-ie, ne fut dit de nous, nous maintenons qu’il eſt tout puiſſant.