LeCinquiemeLivre · 43

es paroles & beuuettes acheuees, Bacbuc demanda, qui eſt celuy de vous, qui veut auoir le mot de la diue Bouteille ? Ie, diſt Panurge, voſtre humble & petit entonnouer. Mon amy, diſt-elle, ie n’ay à vous faire inſtruction qu’vne, c’eſt que venant à l’oracle ayez ſoin n’eſcouter le mot, ſinon d’vne aureille. C’eſt, diſt frere Iean, du vin à vne aureille. Puis le veſtit d’vne galleuerdine, l’encapitonna d’vn beau & blanc beguin, l’affeubla d’vne chauſſe d’hypocras, au bout de laquelle, en lieu de floc, miſt trois obeliſques, l’enguentela de deux braguettes antiques, le ceingnit de trois cornemeuſes liees enſemble, le baigna la face trois fois dedans la fontaine ſuſdite, en fin luy ietta au viſage vne poignee de farine, miſt trois plumes de coq ſus le coſté droit de la chauſſe hypocratique, le fiſt cheminer neuf fois autour de la fontaine, luy fiſt faire trois beaux petis ſaux, luy fiſt donner ſept fois du cul contre la terre, touſiours diſant ne ſçay quelles coniurations en langue Ethruſque, & quelquefois liſant en vn liure ritual, lequel pres elle portoit vne de ſes myſtagogues.

Somme ie penſe, que Numa Pompilius Roy ſecond des Romains, Cerites de Tuſcie, & le ſainct Capitaine Iuif, n’iniſtituerent onques tant de ceremonies, que lors ie vy, n’auſſi les vaticinateurs Memphitiques à Apis en Egipte, ne les Euboïens en la cité de Rhamnes à Rhamnaſie, n’a Iupiter Ammon, n’a Feronia n’vſerent les anciens d’obſeruances tant religieuſes, comme là ie conſiderois.

Ainſi accouſtré le ſepara de noſtre compagnie, & mena à main dextre par vne porte d’or, hors le temple, en vne chapelle ronde, faite de pierres Phengites, & ſpeculaires : par la ſolide ſpeculance deſquelles, ſans feneſtre n’autre ouuerture, eſtoit receuë lumiere du Soleil, là luyſant par le precipice de la roche, couurante le temple maior, tant facilement, & en telle abondance, que la lumiere ſembloit dedans naiſtre, non de hors venir. L’ouurage n’eſmoins admirable que fut iadis le ſacré temple de Rauenne, ou en Egypte celuy de l’Iſle Chemnis. Et n’eſt à paſſer en ſilence que l’ouurage d’icelle chapelle ronde eſtoit en telle ſymmetrie compaſſé, que le diametre du proiect, eſtoit la hauteur de la voute.

Au milieu d’icelle eſtoit vne fontaine de fin Alabaſtre, en figure heptagonne, à ouurage & infoliature ſinguliere, pleine d’eau tant clere, que pourroit eſtre vn element en ſa ſimplicité : dedans laquelle eſtoit à demy poſee la ſacree Bouteille, toute reueſtuë de pur criſtalin, en forme Ouale, excepté, que le limbe eſtoit quelque peu patent, plus qu’icelle forme ne porteroit.