Gargantua · 25

n ceſtuy temps, qui fut la ſaiſon de vendanges, au commencement de automne, les bergiers de la contree eſtoient à guarder les vines & empeſcher que les eſtourneaux ne mangeaſſent les raiſins.

Onquel temps les fouaciers de Lerné paſſoient le grand quarroy, menans dix ou douze charges de fouaces à la ville.

Leſdictz bergiers les requirent courtoiſement leurs en bailler pour leur argent, au pris du marché.

Car notez que c’eſt viande celeſte manger à deſieuner raiſins auec fouace fraiche, meſmement des pineaulx, des fiers, des muſcadeaulx, de la bicane, & des foyrars pour ceulx qui ſont conſtipez de ventre. Car ilz les font aller long comme vn vouge : & ſouuent, cuidans peter, ilz ſe conchient, dont ſont nommez les cuideurs des vendanges.

Aleur requeſte ne feurent aulcunement enclinez les fouaciers, mais (que pis eſt) les oultragerent grandement, les appelans Trop diteulx, Breſchedens, Plaiſans rouſſeaulx, Galliers, Chienlictz, Auerlans, Limeſſourdes, Faictneans, Friandeaulx, Buſtarins, Taluaſſiers, Rienneuaulx, Ruſtres, Challans, Hapelopins, Trainneguainnes, gentilz Flocquetz, Copieux, Landores, Malotruz, Dendins, Baugears, Tezez, Gaubregeux, Goguelus, Claquedans, Boyers d’etrons, Bergiers de merde, & aultres telz epithetes diffamatoires, adiouſtans que poinct à eulx n’apartenoit manger de ces belles fouaces : mais qu’ilz ſe debuoient contenter de gros pain ballé, & de tourte.

Auquel oultraige vn d’entr’eulx, nommé Frogier, bien honneſte homme de ſa perſonne & notable bacchelier, reſpondit doulcement. Depuis quand auez vous prins cornes, qu’eſtes tant rogues deuenuz ? Dea, vous nous en ſouliez voluntiers bailler, & maintenant y refuſez. Ce n’eſt faict de bons voiſins, & ainſi ne vous faiſons nous, quand venez icy achapter noſtre beau frument, duquel vous faictez voz gaſteaux & fouaces : encores par le marché vous euſſions nous donné de noz raiſins : mais, par la mer dé, vous en pourriez repentir & aurez quelque iour affaire de nous. Lors nous ferons enuers vous à la pareille, & vous en ſoubuienne.

Adoncq Marquet, grand baſtonnier de la confrairie des fouaciers, luy diſt. Vrayement, tu es bien acreſté à ce matin : tu mangeas her ſoir trop de mil. Vien ça, vien ça, ie te donnerai de ma fouace. Lors Forgier en toute ſimpleſſe approcha, tirant vn vnzain de ſon baudrier, penſant que Marquet luy deuſt depoſcher de ſes fouaces, mais il luy bailla de ſon fouet à trauers les iambes ſi rudement que les noudz y apparoiſſoient : puis voulut gaigner à la fuyte : mais Forgier s’eſcria au meurtre & à la force tant qu’il peut, enſemble luy getta vn gros tribard qu’il portoit ſoubz ſon eſcelle, & le attainct par la ioincture coronale de la teſte, ſus l’artere crotaphique, du couſté dextre : en telle ſorte que Marquet tomba de ſa iument : mieulx ſembloit homme mort que vif.

Ce pendent les meſtaiers, qui là auprés challoient les noiz, accoururent auec leurs grandes gaules & frapperent ſus ces fouaciers comme ſus ſeigle verd. Les aultres bergiers & bergieres, ouyans, le cry de Forgier, y vindrent auec leurs fondes & braſſiers, & les ſuyuirent à grands coups de pierres tant menuz qu’il ſembloit que ce feuſt greſle. Finablement les aconceurent & ouſterent de leurs fouaces enuiron quatre ou cinq douzeines, toutesfoys ilz les payerent au pris acouſtumé & leurs donnerent vn cens de quecas & troys panerees de francs aubiers. Puis les fouaciers ayderent à monter Marquet, qui eſtoit villainement bleſſé, & retournerent à Lerné ſans pourſuiure le chemin de Pareillé, menaſſans fort & ferme les bouiers, bergiers & meſtaiers de Seuillé & de Synays.

Ce faict, & bergiers & bergieres feirent chere lye auecques ces fouaces & beaulx raiſins, & ſe rigollerent enſemble au ſon de la belle bouzine, ſe mocquans de ces beaulx fouaciers glorieux, qui auoient trouué male encontre par faulte de s’eſtre ſeignez de la bonne main au matin. Et auec gros raiſins chenins eſtuuerent les iambes de Forgier mignonnement, ſi bien qu’il feut tantoſt guery.