Gargantua · 26

es fouaciers retournez à Lerné, ſoubdain, dauant boyre ny manger, ſe tranſporterent au capitoly, & là dauant leur roy nommé Picrochole, tiers de ce nom, propoſerent leur complainte, monſtrans leurs paniers rompuz, leurs bonnetz foupiz, leurs robbes deſſirees, leurs fouaces deſtrouſſees, & ſingulierement Marquet bleſſé enormement, diſans le tout auoir eſté faict par les bergiers & meſtaiers de Grandgouſier, pres le grand carroy par de là Seuillé.

Lequel incontinent entra en courroux furieux, & ſans plus oultre ſe interroguer quoy ne comment, feiſt crier par ſon pays ban & arriere ban, & que vn chaſcun, ſur peine de la hart, conuint en armes en la grand place deuant le chaſteau, à heure de midy.

Pour mieulx confermer ſon entrepriſe, enuoya ſonner le tabourin à l’entour de la ville : luy meſmes, ce pendent qu’on apreſtoit ſon diſner, alla faire affuſter ſon artillerie, deſployer ſon enſeigne & oriflant, & charger force munitions, tant de harnoys d’armes que de gueulles.

En diſnant bailla les comiſſions, & feut par ſon edict conſtitué le ſeigneur Trepelu ſus l’auant guarde, en laquelle furent contez ſeize mille quatorze hacquebutiers, trente cinq mille & vnze auanturiers.

Al’artillerie fut commis le grand eſcuyer Toucquedillon, en laquelle feurent contees neuf cens quatorze groſſes pieces de bronze, en canons, doubles canons, baſelicz, ſerpentines, couleuurines, bombardes, faulcons, paſſeuolans, ſpiroles & aultres pieces. L’arriere guarde feut baillee au duc Racquedenare. En la bataille ſe tint le roy & les princes de ſon royaulme.

Ainſi ſommairement acouſtrez, dauant que ſe mettre en voye, enuoyerent troys cens cheuaulx legiers, ſoubz la conduicte du capitaine Engouleuent, pour deſcouurir le pays & ſçauoir ſi embuche aulcune eſtoyt par la contree. Mais apres auoir diligemment recherché, trouuerent tout le pays à l’enuiron en paix & ſilence, ſans aſſemblee quelconque.

Ce que entendent, Picrochole commenda q’vn chaſcun marchaſt ſoubz ſon enſeigne haſtiuement.

Adoncques ſans ordre & meſure prindrent les champs les vns parmy les aultres, gaſtans & diſſipans tout par ou ilz paſſoient, ſans eſpargner ny pauure, ny riche, ny lieu ſacré, ny prophane : emmenoient beufz, vaches, thoreaux, veaulx, geniſſes, brebis, moutons, cheures & boucqs : poulles, chappons, poulletz, oyſons, iards, oyes : porcs, truyes, guoretz : abaſtans les noix, vendeangeans les vignes, emportans les ſeps, croullans tous les fruictz des arbres. C’eſtoit vn deſordre incomparable de ce qu’ilz faiſoient.

Et ne trouuerent perſonne qui leurs reſiſtaſt, mais vn chaſcun ſe mettoit à leur mercy, les ſuppliant eſtre traictez plus humainement, en conſideration de ce qu’ilz auoient de tous temps eſté bons & amiables voiſins, & que iamais enuers eulx ne commirent exces ne oultraige pour ainſi ſoubdainement eſtre par iceulx mal vexez, & que Dieu les en puniroit de brief. Es quelles remonſtrances rien plus ne reſpondoient, ſinon qu’ilz leurs vouloient aprendre à manger de la fouace.