LeCinquiemeLivre · 47

’icy, reſpondit Bacbuc, ne ſois en eſmoy, à tout ſera ſatisfaift, ſi de nous eſtes contens. Cà bas en ces regions circoncentrales nous eſtabliſſons le bien ſouuerain, non en prendre, & receuoir, ains en eſlargir & donner, & heureux nous reputons, non ſi d’autruy prenons & receuons beaucoup, comme parauenture decretent les feſtes de voſtre monde, ains ſi à autruy touſiours eſlargiſſons, & donnons beaucoup. Seulement vous prie, vos noms, & païs icy en ce liure ritual par eſcrit nous laiſſer. Lors ouurit vn beau & grand liure, auquel nous dictans, vne de ſes myſtagogues excepuant, furent, auecques vn ſtile d’or, quelques traits proiectez, comme ſi lon euſt eſcrit, mais de l’eſcriture rien ne nous apparoiſſoit.

Cela fait, nous emplit trois oires de l’eau phantaſtique, & manuellement nous les baillant, diſt : allez, amis, en protection de ceſte ſphere intellectuale, de laquelle en tous lieux eſt le centre, & n’a en lieu aucun circonferance, que nous appellons dieu. Et venus en voſtre monde portez teſmoignage que ſous terre ſont les grands treſors, & choſes admirables, & non à tort. Ceres ia reueree par tout l’vniuers, par ce qu’elle auoit monſtré, & enſeigné l’art d’agriculture, & par inuention de bled, aboly entre les humains le brutal aliment de gland, a tant & tant lamenté, de ce que ſa fille fut en nos regions ſubterraines rauie : certainement preuoyant que ſous terre plus trouueroit ſa fille de biens & excellences, qu’elle ſa mere n’auoit faict deſſus. Qu’eſt deuenu l’art d’euoquer des cieux la foudre, & le feu celeſte iadis inuenté par le ſage Prometheus ? vous certes l’auez perdu, il eſt de voſte hemiſphere departy, icy ſous terre eſt en vſage. Et à tort quelquefois vous eſbahiſſez voyans villes conflagrer & ardre par foudre & feu Etheré, & ignorans de qui, & par qui, & quelle part tiroit certuy eſclandre horrible à voſtre aſpect, mais à nous familier & vtile. Vos Philoſophes qui ſe complaignent toutes choſes eſtre par les anciens eſcriptes, rien ne leur eſtre laiſſé de nouueau à inuenter, ont tort trop euident. Ce que du ciel vous apparoiſt, & appeliez Phenomenes, ce que la terre vous exhibe, ce que la mer & autres fleuues contiennent, n’eſt comparable à ce qui eſt en terre caché. Pourtant eſt equitablement le ſoubterrain dominateur preſques en toutes langues nommé par epithete de richeſſes. Ils quant leur eſtude addonneront & labeur à bien rechercher par imploration de Dieu ſouuerain, lequel iadis les Egyptiens nommoient en leur langue l’abſcond, le muſſé, le caché, & par ce nom l’inuoquant ſupplioient à eux ſe manifeſter & deſcouurir, leur eſlargiſſant cognoiſſance & de ſoy & de ſes creatures, par auſſi conduits de bonne Lanterne. Car tous Philoſophes & ſages Antiques à bien ſeurement & plaiſamment parfaire le chemin de la congnoiſſance diuine & chaſſe de ſapience, ont eſtimé deux choſes neceſſaires, guyde de Dieu, & compagnie d’homme. Ainſi entre les Philoſophes, Zoroaſter print Arimaſpes pour compagnon de les peregrinations : Eſculapius, Mercure : Orpheus, Muſee : Pythagoras, Agleopheme : entre les Princes & gens belliqueux. Hercules eut en ſes plus difficiles entreprinſes pour amy ſingulier Theſeus : Vlyſſes, Diomedes : Eneas, Achates. Vous autres en auez autant fait, prenans pour guide voſtre illuſtre dame Lanterne. Or allez de par Dieu qui vous conduie.

Fin du cinqieme liure des faicts & dicts heroïques
du noble Pantagruel.