LeCinquiemeLivre · 47bis

…Ainſi entre les Perſes Zoroaſtes print Ariſmaſpe pour compaignon de toute ſa miſterieuſe philoſophie, Hermes le Treſmegiſte entre les Egiptiens eut Eſculape, Orpheus en Trace eut Muſé : illecques auſſi Aglaophemus eut Pytagore, entre les Atheniens Platon eut premierement Dyon de Sarraguſſe en Cicille lequel defunct print ſecondement Xenocrace, Appolonius eut Damis. Quant doncques voz philoſophes, Dieu guydent, accompaignens à quelque claire lanterne ſe adonnerent à ſongneuſement rechercher & inueſtiger comme eſt le naturel des humains, & de ceſte qualité ſont Heſrodothe & Homere appellez alpheſtes c’eſt à dire rechercheurs & inuenteurs, trouuerent vray eſtre la reſponce faicte par le ſaige Tales à Amaſis Roy des Egiptiens quant par luy interrogé en quelle choſe plus eſtoit de prudence, reſpondit : on temps. Car par temps ont eſté & par temps ſeront toutes choſes latentes inuentees & c’eſt la cauſe pourquoy les anciens ont appelle Saturne le Temps, pere de Verité, & Verité fille eut Temps. Infaliblement auſſi trouueront tout le ſauoir & d’eulx & de leurs predeceſſeurs à peine eſtre la minime partie de ce qui eſt & ne le ſcauent. De ces troys hoires que preſentement ie vous liure vous en prendrés iugement congnoiſſant comme dict le prouerbe aux oncles le lyon. Par la rarefaction de noſtre eaue dedans encloſe, interuenant la chaleur des corps ſupperieurs & ferueur de la mer ſallee ainſi qu’eſt la naturelle tranſmutation des elemens vous ſera air dedans treſſallubre engendré, lequel de vent clair cerain delicieulx vous ſeruira, car vent n’eſt que air flottant & vndoyant : ceſtuy vent moyennant yrez à droicte routte ſans terre prendre ſi vouliez iuſques au port de Olonne en Talmondois, en laſchant à trauers voz velles par ce petit ſoubſpiral d’or que y voyés appoſé, comme vne fleute, aultant que penſerez vous ſuffire pour tout au lanternent nauiger à touſiours en plaiſir & ſeureté ſans dangier ne tempeſte. De ce ne doubtez. Et ne penſez la tempeſte yſſir & proceder du vent : le vent vient de la tempeſte exitee du bas de l’abiſme : ne penſez auſſi la pluye venir par impotence des vertus retentiues des cieulx & grauité des nues ſuſpendues : elle vient par euocation des ſoubzterrennes régions, comme par euocation des corps ſuperieurs elle de bas en hault eſtoit inperceptiblement tirée, & vous le teſmongne le roy poete chantant & diſant que l’abiſme inuocque l’abiſme. Des troys oyres, les deux ſont plaines de l’eaue ſuſdicte, la tierce eſt extraicte du puys des ſaiges Indiens lequel on nomme le tonneau des Brachmanes.

Trouuerez dauantaige voz naufz bien duement pourueues de tout ce qu’il vous pourroit eſtre vtille & neceſſaire pour le reſte de voſtre meſnaige. Ce pendant que icy auez ſeiourné ie y ay faict ordre treſbon donner. Allez, amys, en gayetté d’eſprit & portez celle lettre à voſtre roy Gargantua, le ſaluez de par nous enſemble les princes & officiers de ſa noble court.

Ces motz paracheuez elle nous bailla vnes letres cloſes & ſcellees & nous, apres action de graces immortelles, feiſt yſſir par vne porte adiacente à la chappelle diaphane où la Bacbuc les ſemonnoit de propoſer queſtions aultant deux foys qu’eſt hault le mont Olympe. Par vng pais plain de toutes delices, plaiſant, tempéré plus que Tempé en Theſſalye, ſalubre plus que celle partie d’Egipte laquelle a ſon aſpeſt vers Libie, irrigu & verdoyant plus que Thermiſchrie, fertille plus que celle partie du mont Thaure laquelle a ſon aſpect vers aquilon, plus que l’iſle Hiperborree en la mer Iudaique, plus que Caliges on mont Caſpit, flairant ſerain & gratieulx aultant qu’eſt le pais de Touraine, en fin trouuaſmes noz nauires au port.

FIN.