Gargantua · 28

e pendent que le moine s’eſcarmouchoit comme auons dict contre ceulx qui eſtoient entrez le clous, Picrochole à grande haſtiueté paſſa le gué de Vede auec ſes gens, & aſſaillit La roche Clermauld, auquel lieu ne luy feut faicte reſiſtance quelconques, & par ce qu’il eſtoit ia nuict, delibera en icelle ville ſe heberger ſoy & ſes gens, & refraiſchir de ſa cholere pungitiue.

Au matin, print d’aſſault les boulleuars & chaſteau, & le rempara tres bien, & le proueut de munitions requiſes, penſant là faire ſa retraicte ſi d’ailleurs eſtoit aſſailly, car le lieu eſtoit fort & par art & par nature à cauſe de la ſituation & aſſiete.

Or laiſſons les là & retournons à noſtre bon Gargantua, qui eſt à Paris, bien inſtant à l’eſtude de bonnes lettres & exercitations athletiques, & le vieux bon homme Grandgouſier ſon pere, qui apres ſouper ſe chauffe les couiles à vn beau, clair & grand feu, & attendent graiſler des chaſtaines, eſcript au foyer auec vn baſton bruſlé d’vn bout dont on eſcharbotte le feu : faiſant à ſa femme & famille de beaulx contes du temps iadis.

Vn des bergiers qui guardoient les vignes, nommé Pillot, ſe tranſporta deuers luy en icelle heure, & raconta entierement les exces & pillaiges que faiſoit Picrochole Roy de Lerné en ſes terres & dommaines, & comment il auoit pillé, gaſté, ſaccagé tout le pays, excepté le clous de Seuillé que frere Iean des entommeures auoit ſaulué à ſon honneur, & de preſent eſtoit ledict roy en La roche Clermaud : & là en grande inſtance ſe remparoit, luy & ſes gens.

Holos, holos, diſt Grandgouſier, qu’eſt cecy, bonnes gens ? Songe ie, ou ſi vray eſt ce qu’on me dict ? Picrochole, mon amy ancien, de tout temps, de toute race & alliance, me vient il aſſaillir ? Qui le meut ? Qui le poinct ? Qui le conduict ? Qui l’a ainſi conſeillé ? Ho, ho, ho, ho, ho. Mon dieu mon ſaulueur, ayde moy, inſpire moy, conſeille moy à ce qu’eſt de faire.

Ie proteſte, ie iure dauant toy : ainſi me ſoys tu fauorable, ſy iamais à luy deſplaiſir, ne à ſes gens dommaige, ne en ſes terres ie feis pillerie, mais bien au contraire, ie l’ay ſecouru de gens, d’argent, de faueur & de conſeil, en tous cas que ay peu congnoiſtre ſon aduentaige. Qu’il me ayt doncques en ce poinct oultraigé, ce ne peut eſtre que par l’eſprit maling. Bon dieu, tu congnois mon couraige, car à toy rien ne peut eſtre celé. Si par cas il eſtoit deuenu furieux & que, pour luy rehabilliter ſon cerueau tu me l’euſſe icy enuoyé, donne moy & pouuoir & ſçauoir le rendre au ioug de ton ſainct vouloir par bonne diſcipline.

Ho, ho, ho, mes bonnes gens, mes amys & mes feaulx ſeruiteurs, fauldra il que ie vous empeſche à me y ayder ? Las, ma vieilleſſe ne requerroit dorenauant que repous, & toute ma vie n’ay rien tant procuré que paix ; mais il fault, ie le voy bien, que maintenant de harnoys ie charge mes pauures eſpaules laſſes & foibles, & en ma main tremblante ie preigne la lance & la maſſe pour ſecourir & guarantir mes pauures ſubiectz. La raiſon le veult ainſi, car de leur labeur ie ſuis entretenu & de leur ſueur ie ſuis nourry, moy, mes enfans & ma famille.

Ce non obſtant, ie n’entreprendray guerre que ie n’aye eſſayé tous les ars & moyens de paix, là ie me reſouls.

Adoncques feiſt conuoquer ſon conſeil & propouſa l’affaire tel comme il eſtoit, & fut conclud qu’on enuoiroit quelque homme prudent deuers Picrochole, ſçauoir pourquoy ainſi ſoubdainement eſtoit party de ſon repous, & enuahy les terres, es quelles n’auoit droict quicquonques. D’auantaige, qu’on enuoyaſt querir Gargantua & ſes gens, affin de maintenir le pays & defendre à ce beſoing. Le tout pleut à Grandgouſier, & commenda que ainſi feuſt faict. Dont ſus l’heure enuoya le Baſque ſon laquays querir à toute diligence Gargantua. Et luy eſcripuoit comme s’enſuit.

Auecques leurs comperes
Et voisins, en hyuer,
En brazillant les poires,
S’artoyent à deuiſer ;
Chacun faiſant du temps paſſé
Quelque beau compte ;
Se recreans, sans mal talent,
Honneſtement.