Lettres · 33

rancoys par la grace de Dieu Roy de France, au Præuoſt de Paris, Bailly de Rouen, Seneſchaulx de Lyon, Tholouſe, Bordeaulx, & de Poictou, & a tous noz Iuſticiers, & officiers, ou a leurs Lieutenans, & a chaſcun d’eulx ſi comme a luy apartiendra ſalut. De la partie de noſtre aimé & feal maiſtre Françoys Rabelais docteur en Medicine de noſtre Vniuerſité de Montpellier, nous a eſté expoſé, que icelluy ſuppliant ayant par cy dauant baillé a imprimer pluſieurs liures, meſmement deux volumes des faictz & dictz Heroïcques de Pantagruel, non moins vtiles que delectables, les Imprimeurs auroient iceulx liures corrumpu & peruerty en pluſieurs endroictz, au grand deplaiſir & detriment dudict ſuppliant, & præiudice des lecteurs, dont ſe ſeroit abſtenu de mectre en public le reſte & ſequence des dictz faictz & dictz Heroïcques. Eſtant toutesfoys importuné iournellement par les gens ſcauans & ſtudieux de noſtre Royaulme & requis de mectre en l’vtilité comme en impreſſion la dicte ſequence : Nous auroit ſupplié de luy octroyer priuilege a ce que perſonne n’euſt a les imprimer ou mectre en vente fors ceulx qu’il feroit imprimer par libraires exprés, & aux quelz il bailleroit ſes propres & vrayes copies. Et ce pour l’eſpace de dix ans conſecutifz, commancans au iour & dacte de l’impreſſion de ſes dictz liures. Pour quoy nous ces choſes conſiderées deſirans les bonnes letres eſtre promeues par noſtre Royaulme a l’vtilité & erudition de noz ſubiectz, auons audict ſuppliant donné priuilege, congé, licence, & permiſſion de faire imprimer & mectre en vente par telz libraires experimentez qu’il aduiſera, ſes dictz liures & oeuures conſequens, des faictz Heroïcques de Pantagruel, commancans au troiſieſme volume, auec pouoir & puiſſance de corriger & reuoir les deux premiers par cy dauant par luy compoſez : & les mectre ou faire mectre en nouuelle impreſſion & vente, faiſans inhibitions & deffences de par nous ſur certaines & grands peines, confiſcation des liures ainſi par eulx imprimez, & d’admende arbitraire a tous imprimeurs & aultres qu’il appartiendra de non imprimer & mectre en vente les liures cy deſſus mentionnez, ſans le vouloir & conſentement dudict ſuppliant dedans le terme de ſix ans conſecutifz, commancans au iour & dacte de l’impreſion de ſes dictz liures, ſur poine de confiſcation des dictz liures imprimez, & d’admende arbitraire. De ce faire vous auons chaſcun de vous ſi comme a luy apartiendra donné, & donnons plein pouoir, commiſſion & auctorité, mandons & commandons a tous noz iuſticiers, officiers & ſubiectz, que de noz præſens congé, priuilege, & commiſſion, ilz facent, ſeuffrent, & laiſſent iouyr & vſer le dict ſuppliant paiſiblement, & a vous en ce faiſant eſtre obey. Car ainſi nous plaiſt il eſtre faict. Donné a Paris, le dixneufieſme iour de Septembre, l’an de grace, Mil cinq cens quarante cinq, & de noſtre regne le xxxi. Ainſi ſigné par le conſeil Delaunay. Et ſeellé ſur ſimple queue de cire iaulne.