Gargantua · 34

n ceſte meſme heure, Gargantua, qui eſtoyt yſſu de Paris ſoubdain les lettres de ſon pere leues, ſus ſa grand iument venant, auoit ia paſſé le pont de la nonnain, luy, Ponocrates, Gymnaſte & Eudemon, leſquelz pour le ſuiure auoient prins cheuaulx de poſte : le reſte de ſon train venoit à iuſtes iournees, amenent tous ſes liures & inſtrument philoſophique. Luy arriué à Parillé, fut aduerty par le meſtayer de Gouguet comment Picrochole s’eſtoit remparé à La Rocheclermaud, & auoit enuoyé le capitaine Tripet auec groſſe armee aſſaillir le boys de Vede, & Vaugaudry, & qu’ilz auoient couru la poulle iuſques au preſſouer Billard : & que c’eſtoit choſe eſtrange & difficile à croyre des exces qu’ilz faiſoient par le pays. Tant qu’il luy feiſt paour, & ne ſçauoit bien que dire ny que faire. Mais Ponocrates luy conſeilla qu’ilz ſe tranſportaſſent vers le ſeigneur de La Vauguyon, qui de tous temps auoit eſté leur amy & confederé, & par luy ſeroient mieulx aduiſez de tous affaires, ce qu’ilz feirent incontinent, & le trouuerent en bonne deliberation de leur ſecourir : & feut de opinion que il enuoyroit quelq’vn de ſes gens pour deſcouurir le pays & ſçauoir en quel eſtat eſtoient les ennemys, affin de y proceder par conſeil prins ſcelon la forme de l’heure preſente. Gymnaſte ſe offrir d’y aller, mais il feut conclud que pour le meilleur il menaſt auecques ſoy quelq’vn qui congneuſt les voyes & deſtorſes & les riuieres de l’entour.

Adoncques partirent luy & Prelinguand, eſcuyer de Vauguyon, & ſans effroy eſpierent de tous couſtez. Ce pendent Gargantua ſe refraiſchit & repeut quelque peu auecques ſes gens, & feiſt donner à ſa iument vn picotin d’auoyne, c’eſtoient ſoiſante & quatorze muys troys boiſſeaux. Gymnaſte & ſon compaignon tant cheuaucherent qu’ilz rencontrerent les ennemys tous eſpars & mal en ordre, pillans & deſrobans tout ce qu’ilz pouoient : & de tant loing qu’ilz l’aperceurent, accoururent ſus luy à la foulle pour le deſtrouſer. Adonc il leurs cria, meſſieurs, ie ſuys pauure Diable, ie vous requiers qu’ayez de moy mercy. I’ay encores quelque eſcu, nous le boyrons, car c’eſt aurum potabile, & ce cheual icy ſera vendu pour payer ma bien venue : cela faict, retenez moy des voſtres, car iamais homme ne ſceut mieulx prendre, larder, rouſtir & apreſter, voyre, par Dieu, demembrer, & gourmander poulle que moy qui ſuys icy, & pour mon proficiat ie boy à tous bons compaignons. Lors deſcouurit ſa ferriere et, ſans mettre le nez dedans, beuuoyt aſſez honneſtement. Les maroufles le regardoient, ouurans la gueule d’vn grand pied & tirans les langues comme leuriers, en attente de boyre apres : mais Tripet, le capitaine, ſus ce poinct accourut veoir que c’eſtoit.

Aluy Gymnaſte offrit ſa bouteille, diſant. Tenez, capitaine, beuuez en hardiment, i’en ay faict l’eſſay, c’eſt vin de La Faye moniau.

Quoy, diſt Tripet, ce gauſtier icy ſe guabele de nous. Qui es tu ? Ie ſuis (diſt Gymnaſte) pauure Diable. Ha, diſt Tripet, puiſque tu eſt pauure Diable, c’eſt raiſon que paſſes oultre, car tout pauure Diable paſſe partout ſans peage ny gabelle, mais ce n’eſt de couſtume que pauures Diables ſoient ſi bien monſtez : pourtant, monſieur le Diable, deſcendez que ie aye le rouſſin, et, ſi bien il ne me porte, vous maiſtre Diable, me porterez. Car i’ayme fort qu’vn Diable tel m’emporte.