Gargantua · 35

es motz entenduz, aulcuns d’entre eulx commencerent auoir frayeur, & ſe ſeignoient de toutes mains, penſans que ce feuſt vn Diable deſguiſé, & quelq’vn d’eulx, nommé Bon Ioan, capitaine des franctopins, tyra ſes heures de ſa braguette & cria aſſez hault, Agios ho theos. Si tu es de Dieu, ſy parle, ſi tu es de l’aultre, ſy t’en va. Et pas ne s’en alloit, ce que entendirent pluſieurs de la bande, & departoient de la compaignie, le tout notant & conſiderant Gymnaſte. Pourtant feiſt ſemblant deſcendre de cheual, & quand feut pendent du couſté du montouer, feiſt ſoupplement le tour de l’eſtriuiere, ſon eſpee baſtarde au couſté, et, par deſſoubz paſſé, ſe lança en l’air & ſe tint des deux piedz ſus la ſcelle, le cul tourné vers la teſte du cheual. Puis diſt. Mon cas va au rebours. Adoncq, en tel poinct qu’il eſtoit, feiſt la guambade ſus vn pied et, tournant à ſeneſtre, ne faillit oncq de rencontrer ſa propre aſſiete ſans en rien varier. Dont diſt Tripet, Ha, ne feray pas ceſtuy là pour ceſte heure, & pour cauſe. Bren, diſt Gymnaſte, i’ay failly, ie voys defaire ceſtuy ſault. Lors par grande force & agilité feiſt en tournant à dextre la gambade comme dauant. Ce faict, miſt le poulce de la dextre ſus l’arçon de la ſcelle & leua tout le corps en l’air, ſe ſouſtenant tout le corps ſus le muſcle, & nerf dudict poulce : & ainſi ſe tourna troys foys, à la quatrieſme, ſe renuerſant tout le corps ſans à rien toucher, ſe guinda entre les deux aureilles du cheual, ſoudant tout le corps en l’air ſus le poulce de la ſeneſtre : & en ceſt eſtat feiſt le tour du moulinet, puis, frappant du plat de la main dextre ſus le meillieu de la ſelle, ſe donna tel branle qu’il ſe aſſiſt ſus la crope, comme font les damoiſelles. Ce faict, tout à l’aiſe paſſe la iambe droicte par ſus la ſelle, & ſe miſt en eſtat de cheuaucheur ſus la croppe. Mais (diſt il) mieulx vault que ie me mette entre les arſons : adoncq, ſe appoyant ſus les poulces des deux mains à la crope dauant ſoy, ſe renuerſa cul ſus teſte en l’air & ſe trouua entre les arſons en bon maintien, puis d’vn ſobreſault leua tout le corps en l’air, & ainſi ſe tint piedz ioinctz entre les arſons, & là tournoya plus de cent tours, les bras eſtenduz en croix, & crioit ce faiſant à haulte voix. I’enrage, diables, i’enrage, i’enrage, tenez moy, diables, tenez moy, tenez. Tandis qu’ainſi voltigeoit, les marroufles en grand eſbahiſſement diſoient l’vng à l’aultre. Par la mer dé, c’eſt vn lutin ou vn diable ainſi deguiſé. Ab hoſte maligno, libera nos, domine : & fuyoient à la route, regardans darriere ſoy comme vn chien qui emporte vn plumail. Lors Gymnaſte, voyant ſon aduantaige, deſcend de cheual, deſguaigne ſon eſpee & à grands coups chargea ſus les plus huppés, & les ruoit à grands monceaulx, bleſſez, naurez, & meurtriz, ſans que nul luy reſiſtaſt, penſans que ce feuſt vn diable affamé, tant par les merueilleux voltigemens qu’il auoit faict, que par les propos que luy auoit tenu Tripet en l’appellant pauure diable. ſinon que Tripet en trahiſon luy voulut fendre la ceruelle de ſon eſpee lanſquenette, mais il eſtoit bien armé & de ceſtuy coup ne ſentit que le chargement, & ſoubdain ſe tournant, lancea vn eſtoc volant au dict Tripet, & ce pendent que icelluy ſe couuroit en hault, luy tailla d’vn coup l’eſtomac, le colon & la moytié du foye, dont tomba par terre, & tombant, rendit plus de quatre potees de ſouppes, & l’ame meſlee parmy les ſouppes. Ce fait, Gymnaſte ſe retyre, conſiderant que les cas de hazart iamais ne fault pourſuyure iuſques à leur periode & qu’il conuient à tous cheualiers reuerentement traicter leur bonne fortune, ſans la moleſter ny gehainer, & monſtant ſus ſon cheual, luy donne des eſperons, tyrant droict ſon chemin vers La Vauguyon, & Prelinguand auecques luy.