Gargantua · 37

ssvz la riue de Vede, peu de temps apres aborderent au chaſteau de Grandgouſier qui les attendoit en grand deſir. A ſa venue, ilz le feſtoyerent à tour de bras : iamais on ne veit gens plus ioyeux, car Supplementum Supplementi chronicorum dict que Gargamelle y mourut de ioye : ie n’en ſçay rien de ma part, & bien peu me ſoucie ny d’elle ny d’aultre. La verité fut que Gargantua, ſe refraiſchiſſant d’habillemens & ſe teſtonnant de ſon pigne (qui eſtoit grand de cent cannes, appoincté de grandes dents de elephans toutes entieres) faiſoit tomber à chaſcun coup plus de ſept balles de bouletz qui luy eſtoient demourez entre ſes cheueulx à la demolition du boys de Vede. Ce que voyant, Grandgouſier, ſon pere, penſoit que feuſſent pous & luy diſt. Dea, mon bon filz, nous as tu aporté iuſques icy des eſparuiers de Montagu ? Ie n’entendoys que là tu feiſſe reſidence. Adonc Ponocrates reſpondit. Seigneur, ne penſez que ie l’aye mis au colliege de pouillerie qu’on nomme Montagu, mieulx le euſſe voulu mettre entre les guenaux de ſainct Innocent, pour l’enorme cruaulté & villennie que ie y ay congneu. Car trop mieulx, ſont traictez les forcez entre les Maures & Tartares, les meurtriers en la priſon criminelle, voyre certes les chiens en voſtre maiſon, que ne ſont ces malautruz audict colliege. Et ſi i’eſtois roy de Paris, le diable m’emport ſi ie ne metoys le feu dedans & faiſoys bruſler & principal & regens qui endurent ceſte inhumanité dauant leurs yeulx eſtre exercee.

Lors leuant vn de ces boulletz, diſt. Ce ſont coups de canon que n’a guieres a repceu voſtre filz Gargantua paſſant dauant le boys de Vede, par la trahiſon de vos ennemys. Mais ilz en eurent telle recompenſe qu’ilz ſont tous periz en la ruine du chaſteau : comme les Philiſtins par l’engin de Sanſon, & ceulx que opprima la tour de Siloé, deſquelz eſt eſcript, Luce xiij. Iceulx ie ſuis d’aduis que nous pourſuyuons, ce pendent que l’heur eſt pour nous.

Car l’occaſion a tous ſes cheueulx au front, quand elle eſt oultre paſſee, vous ne la pouez plus reuocquer, elle eſt chauue par le darriere de la teſte & iamais plus ne retourne.

Vrayement, diſt Grandgouſier, ce ne ſera pas à ceſte heure, car ie veulx vous feſtoyer pour ce ſoir, & ſoyez les tres bien venuz. Ce dict, on apreſta le ſoupper, & de ſurcroiſt feurent rouſtiz ſeze beufz, troys geniſſes, trente & deux veaux, ſoixante & troys cheureaux moiſſonniers, quatre vingt quinze moutons, troys cens gourretz de laict à beau mouſt, vnze vingt perdrys, ſept cens becaſſes, quatre cens chappons de Loudunoys & Cornouaille, ſix mille poulletz & autant de pigeons, ſix cens gualinottes, quatorze cens leuraux, troys cens & troys hoſtardes, & mille ſept cens hutaudeaux : de venaiſon l’on ne peut tant ſoubdain recouurir, fors vnze ſangliers qu’enuoya l’abbé de Turpenay, & dix & huict beſtes fauues que donna le ſeigneur de Grandmont : enſemble ſept vingt faiſans qu’enuoya le ſeigneur des Eſſars, & quelques douzaines de Ramiers, de oiſeaux de riuiere, de Cercelles, Buours, Courtes, Pluuiers, Francolys, Crauans, Tyranſons, Vanereaux, Tadournes, pochecullieres, pouacres, Hegronneaux, Foulques, Aigrettes, Cigouingnes, Cannes petieres, Oranges, Flammans (qui ſont phœnicopteres) Terrigoles, poulles de Inde, force Coſcoſſons, & renfort de potages. Sans poinct de faulte y eſtoit de viures abondance, & feurent apreſtez honneſtement par Fripeſaulce, Hoſchepot & Pilleuerius, cuiſiniers de Grandgouſier. Ianot, Micquel & Verrenet apreſterent fort bien à boyre.