Gargantua · 51

este concion faicte par Gargantua, feurent liurez les ſeditieux par luy requis : exceptez Spadaſſin, Merdaille & Menuail : leſquelz eſtoient fuyz ſix heures dauant la bataille, l’vn iuſques au col de Laignel, d’vne traicte, l’aultre iuſques au val de Vyre, l’aultre iuſques à Logroine, ſans derriere ſoy reguarder ny prandre alaine par chemin, & deux fouaciers, leſquelz perirent en la iournee. Aultre mal ne leurs feiſt Gargantua, ſinon qu’il les ordonna pour tirer les preſſes à ſon imprimerie : laquelle il auoit nouuellement inſtituee.

Puis ceulx qui là eſtoient mors il feiſt honorablement inhumer en la vallee des Noirettes & au camp de Bruſleuieille. Les naurés il feiſt panſer & traicter en ſon grand Noſocome. Apres aduiſa es dommaiges faictz en la ville & habitans : & les feiſt rembourcer de tous leurs intereſtz à leur confeſſion & ſerment. Et y feiſt baſtir vn fort chaſteau : y commettant gens & guet pour à l’aduenir mieulx ſoy defendre contre les ſoubdaines eſmeutes.

Au departir remercia gratieuſement tous les ſoubdars de ſes legions qui auoient eſté à ceſte defaicte, & les renuoya hyuerner en leurs ſtations & guarniſons. Exceptez aulcuns de la legion Decumane, leſquelz il auoit veu en la iournee faire quelques proueſſes : & les capitaines des bandes, leſquelz il amena auecques ſoy deuers Grandgouſier.

Ala veue & venue d’iceulx, le bon homme feut tant ioyeux que poſſible ne ſeroit le deſcripre. Adonc leur feiſt vn feſtin, le plus magnificque, le plus abundant & plus delitieux que feuſt veu depuis le temps du roy Aſſuere. A l’iſſue de table, il diſtribua à chaſcun d’iceulx tout le parement de ſon buffet, qui eſtoit au poys de diſhuyt cent mille quatorze bezans d’or en grands vaſes d’antique, grands poutz, grans baſſins, grands taſſes, couppes, potetz, candelabres, calathes, nacelles, violiers, drageouoirs & aultre telle vaiſſelle, toute d’or maſſif, oultre la pierrerie, eſmail & ouuraige, qui, par eſtime de tous, excedoit en pris la matiere d’iceulx. Plus, leurs feiſt comter de ſes coffres à chaſcun douze cens mille eſcutz contens. Et d’abundant à chaſcun d’iceulx donna à perpetuité (excepté s’ilz mouroient ſans hoirs) ſes chaſteaulx & terres voizines, ſelon que plus leurs eſtoient commodes. A Ponocrates donna la Rocheclermaud, à Gymnaſte le Couldray, à Eudemon Montpenſier, le Riuau, à Tolmere, à Ithybole, Montſoreau, à Acamas Cande, Varenes, à Chironacte, Grauot à Sebaſte, Quinquenays, à Alexandre, Ligré, à Sophrone, & ainſi de ſes aultres places.