Gargantua · 52

estoit ſeulement le moyne à pouruoir. Lequel Gargantua vouloit faire abbé de Seuillé : mais il le refuſa. Il luy voulut donner l’abbaye de Bourgueil, ou de ſainct Florent, laquelle mieulx luy duiroit, ou toutes deux s’il les prenoit à gré. Mais le moyne luy fiſt reſponce peremptoire que de moyne il ne vouloit charge ny gouuernement. Car comment (diſoit il) pourroy ie gouuerner aultruy, qui moy meſmes gouuerner ne ſçaurois ? Si vous ſemble que ie vous aye faict, & que puiſſe à l’aduenir faire ſeruice agreable, oultroyez moy de fonder vne abbaye à mon deuis. La demande pleut à Gargantua, & offrit tout ſon pays de Theleme iouſte la riuiere de Loyre, à deux lieues de la grande foreſt du Port Huault. Et requiſt à Gargantua qu’il inſtituaſt ſa religion au contraire de toutes aultres. Premierement doncques (diſt Gargantua) il n’y fauldra ia baſtir murailles au circuit : car toutes aultres abbayes ſont fierement murees. Voyre, diſt le moyne. Et non ſans cauſe : ou mur y a & dauant & derriere, y a force murmur, enuie & conſpiration mutue. D’auantaige, veu que en certains conuentz de ce monde eſt en vſance : que ſi femme aulcune y entre (i’entends des preudes & pudicques) on nettoye la place par laquelle elles ont paſſé, feut ordonné que, ſi religieux ou religieuſe y entroit par cas fortuit, on nettoiroit curieuſement tous les lieulx par leſquelz auroient paſſé. Et parce que es religions de ce monde tout eſt compaſſé, limité & reiglé par heures, feut decreté que là ne ſeroit horrologe ny quadrant aulcun. Mais ſelon les occaſions & oportunitez ſeroient toutes les œuures diſpenſees. Car (diſoit Gargantua) la plus vraye perte du temps qu’il ſceuſt eſtoit de compter les heures. Quel bien en vient il ? Et la plus grande reſuerie du monde eſtoit ſoy gouuerner au ſon d’vne cloche, & non au dicté de bon ſens & entendement.

Item, parce qu’en icelluy temps on ne mettoit en religion des femmes, ſi non celles que eſtoient borgnes, boyteuſes, boſſues, laydes, defaictes, folles, inſenſees, maleficiees & tarees : ny les hommes, ſinon catarrez, mal nez, niays & empeſche de maiſon.

Apropos (diſt le moyne), vne femme, qui n’eſt ny belle ny bonne, à quoy vault toille ? A mettre en religion, diſt Gargantua. Voyre (diſt le moyne), & à faire des chemiſes. Feut ordonné que là ne ſeroient repceues ſinon les belles, bien formees & bien naturees : & les beaulx, bien formez & bien naturez. Item, parce que es conuentz des femmes ne entroient les hommes ſinon à l’emblee & clandeſtinement : feut decreté que ia ne ſeroient là les femmes au cas que n’y feuſſent les hommes : ny les hommes en cas que n’y feuſſent les femmes.

Item, parce que tant hommes que femmes vne foys repceuez en religion apres l’an de probation eſtoient forcez & aſtrinctz y demeurer perpetuellement leur vie durante, feuſt eſtably que tant hommes que femmes là repceuz, ſortiroient quand bon leurs ſembleroit franchement & entierement.

Item parce que ordinairement les religieux faiſoient troys veuz : ſçauoir eſt de chaſteté, pauureté & obedience : fut conſtitué, que là honorablement on peult eſtre marié, que chaſcun feut riche, & veſquiſt en liberté. Au reguard de l’eage legitime, les femmes y eſtoient repceues depuis dix iuſques à quinze ans : les hommes depuis douze iuſques à dix & huict.

S’abiller à mode nouuelle,
Porter moytié drap, moytié toille.

(Coquillart, Droits nouveaux, t. I, p. 81)