Gargantua · 55

v millieu de la baſſe court eſtoit vne fontaine magnificque de bel Alabaſtre. Au deſſus les troys Graces, auecques cornes d’abondance. Et gettoient l’eau par les mamelles, bouche, aureilles, yeulx, & aultres ouuertures du corps.

Le dedans du logis ſus ladicte baſſe court eſtoit ſus gros pilliers de Caſſidoine & Porphyre, à beaux ars d’antique. Au dedans deſquelz eſtoient belles gualeries, longues & amples, aornees de pinctures, de cornes de cerfs, licornes, Rhinoceros, Hippopotames, dens de Elephans, & aultres choſes ſpectables. Le logis des dames comprenoit depuis la tour Artice iuſques à la porte Meſembrine. Les hommes occupoient le reſte. Deuant ledict logis des dames, affin qu’elles euſſent l’eſbatement, entre les deux premieres tours, au dehors, eſtoient les lices, l’hippodrome, le theatre, & natatoires, auecques les bains mirificques à triple ſolier, bien garniz de tous aſſortemens, & foyzon d’eau de Myre. Iouxte la riuiere eſtoit le beau iardin de plaiſance. Au millieu d’icelluy le beau Labirynte. Entre les deux aultres tours eſtoient les ieux de paulme & de groſſe balle. Du couſté de la tour Cryere eſtoit le vergier, plein de tous arbres fructiers, tous ordonnees en ordre quincunce. Au bout eſtoit le grand parc, foizonnant en toute ſauuagine. Entre les tierces tours eſtoient les butes pour l’arquebuſe, l’arc, & l’arbaleſte. Les offices hors la tour Heſperie, à ſimple eſtaige. L’eſcurye au dela des offices ; la faulconnerie au dauant d’icelles, gouuernee par aſturciers bien expers en l’art, & eſtoit annuellement fournie par les Candiens, Venitiens & Sarmates, de toutes ſortes d’oiſeaux paragons.

Et aultres : tant bien faictz & domeſticquez que, partans du chaſteau pour s’eſbatre es champs, prenoient tout ce que rencontroient. La venerie eſtoit vn peu plus loing, tyrant vers le parc.

Toutes les ſalles, chambres & cabinetz, eſtoient tapiſſez en diuerſes ſortes, ſelon les ſaiſons de l’annee. Tout le paué eſtoit couuert de drap verd. Les lictz eſtoient de broderie. En chaſcune arriere chambre eſtoit vn miroir de chriſtallin, enchaſſé en or fin, au tour garny de perles, & eſtoit de telle grandeur qu’il pouuoit veritablement repreſenter toute la perſonne. A l’iſſue des ſalles du logis des dames, eſtoient les parfumeurs & teſtonneurs, par les mains deſquelz paſſoient les hommes, quand ilz viſitoient les dames. Iceulx fourniſſoient par chaſcun matin les chambres des dames d’eau roſe, d’eau de naphe, & d’eau d’ange, & à chaſcune la precieuſe caſſollette, vaporante de toutes drogues aromatiques.