Gargantua · 54

Cy n’entrez pas, Hypocrites, bigotz,
Vieulx matagotz, marmiteux, borſouflez,
Torcoulx, badaux, plus que n’eſtoient les Gotz
Ny Oſtrogotz, precurſeurs des magotz,
Haires, cagotz, caffars empantouflez,
Gueux mitouflez, frapars eſcorniflez,
Befflez, enflez, fagoteurs de tabus,
Tirez ailleurs pour vendre vos abus.
Vos abus meſchans
Rempliroient mes camps
De meſchanceté,
Et par faulſeté
Troubleroient mes chants
Vos abus meſchans.
Cy n’entrez pas, maſchefains practiciens,
Clers, baſauchiens, mangeurs du populaire,
Officiaulx, ſcribes, & phariſiens,
Iuges, anciens, qui les bons parroiciens
Ainſi que chiens mettez au capulaire.
Voſtre ſalaire eſt au patibulaire.
Allez y braire : icy n’eſt faict exces,
Dont en voz cours on deuſt mouuoir proces.

Proces & debatz
Peu font cy d’ebatz,
Ou l’on vient s’esbatre.
A vous, pour debatre
Soient en pleins cabatz
Proces & debatz.
Cy n’entrez pas vous vſuriers chichars,
Briffaulx, leſchars, qui touſiours amaſſez,
Grippeminaulx, aualleurs de frimars,
Courbez, camars, qui en vos coquemars
De mille marcs ia n’auriez aſſez.
Poinct eſgaſſez n’eſtes, quand cabaſſez
Et entaſſez, poiltrons à chiche face.
La male mort en ce pas vous deface.
Face non humaine
De telz gens, qu’on maine
Raire ailleurs : ceans
Ne ſeroit ſeans.
Vuidez ce dommaine
Face non humaine.
Cy n’entrez pas, vous raſſotez maſtins,
Soirs ny matins, vieux chagrins, & ialoux :
Ny vous auſſi, ſeditieux mutins,
Larues, lutins, de Dangier palatins,
Grecs ou Latins, plus à craindre que Loups ;
Ny vous gualous verollez iuſqu’à l’ous :
Portez vos loups ailleurs paiſtre en bonheur,
Crouſteleuez, remplis de deshonneur.
Honneur, los, deduict,
Ceans eſt deduict
Par ioyeux acords.
Tous ſont ſains au corps.
Par ce, bien leur dict
Honneur, los, deduict.

Cy entrez, vous, & bien ſoyez venus
Et paruenuz, tous nobles cheualiers.
Cy eſt le lieu ou ſont les reuenuz
Bien aduenuz : affin que entretenuz,
Grands & menuz, tous ſoyez à milliers.
Mes familiers ſerez & peculiers,
Friſques, gualliers, ioyeux, plaiſans, mignons,
En general tous gentilz compaignons.
Compaignons gentilz,
Serains & ſubtilz,
Hors de vilité,
De ciuilité
Cy ſont les ouſtilz,
Compaignons gentilz.
Cy entrez, vous, qui le ſainct euangile
En ſens agile annoncez, quoy qu’on gronde :
Ceans aurez vn refuge & baſtille
Contre l’hoſtile erreur, qui tant poſtille
Par ſon faulx ſtile empoizonner le monde :
Entrez, qu’on fonde ici la foy profonde,
Puis, qu’on confonde, & par voix, & par rolle,
Les ennemys de la ſaincte parolle.
La parolle ſaincte
Ia ne ſoit extainte
En ce lieu treſſainct.
Chaſcun en ſoit ceinct,
Chaſcune ayt enceincte
La parolle ſaincte.
Cy entrez, vous, dames de hault paraige
En franc couraige. Entrez y en bon heur,
Fleurs de beaulté, à celeſte viſaige,
A droit corſaige, à maintien prude & ſaige.
En ce paſſaige eſt le ſeiour d’honneur.
Le hault ſeigneur, qui du lieu fut donneur

Et guerdonneur, pour vous l’a ordonné,
Et pour frayer à tout prou or donné.
Or donné par don
Ordonne pardon
A cil qui le donne,
Et tres bien guerdonne
Tout mortel preud’hom
Or donné par don.

Ils ſont de chaude rencontree
Bigots, cagots, godz & magodz,
Fagotz, escargotz & margotz.