Pantagruel · 19

doncques, tout le monde aſſiſtant & eſcoutant en bonne ſilence, l’Angloys leua hault en l’air les deux mains ſeparement clouant toutes les extremitez des doigtz en forme qu’on nomme en Chinonnoys, cul de poulle, & frappa de l’vne l’aultre par les ongles quatre foys, puys les ouurit, & ainſi à plat de l’vne frappa l’aultre en ſon ſtrident, vne foys de rechief les ioignant comme deſſus frappa deux foys, & quatre foys de rechief les ouurant. Puys les remiſt ioinctes & extendues l’vne iouxte l’aultre, comme ſemblant deuotement dieu prier. Panurge ſoubdain leua en l’air la main dextre, puys d’ycelle miſt le poulſe dedans la narine d’ycelluy couſté, tenant les quatre doigtz eſtenduz & ſerrez par leur ordre en ligne parallelle à la pene du nez, fermant l’œil gauſche entierement, & guaignant du dextre auecques profonde depreſſion de la ſourcile & paulpiere. Puys la gauſche leua hault, auecques fort ſerrement & extenſion des quatre doigtz & eleuation du poulſe, & la tenoyt en ligne directement correſpondente à l’aſſiete de la dextre, auecques diſtance entre les deux d’vne couldee & demye. Cela faict, en pareille forme baiſſa contre terre l’vne & l’aultre main : finablement les tint on my lieu, comme viſant droict au nez de l’Angloys.

Et ſi Mercure, diſt l’Angloys. Là Panurge interrompt diſant. Vous auez parlé, maſque. Lors feiſt l’Angloys tel ſigne. La main gauſche toute ouuerte il leua hault en l’air. Puys ferma on poing les quatre doigts d’ycelle, & le poulſe extendu aſſiſt ſuz la pinne du nez. Soubdain apres leua la dextre toute ouuerte & toute ouuerte la baiſſa ioignant le poulſe on lieu que fermoyt le petit doigt de la gauſche, & les quatre doigtz d’ycelle mouuoyt lentement en l’air. Puys au rebours feiſt de la dextre ce qu’il auoyt faict de la gauſche, & de la gauſche ce que auoyt faict de la dextre. Panurge de ce non eſtonné tyra en l’air ſa treſmegiſte braguette de la gauſche, & de la dextre en tira vn tranſon de couſte bouine blanche & deux pieces de boys de forme pareille, l’vne de Ebene noir, l’aultre de Breſil incarnat, & les miſt entre les doigtz d’ycelle en bonne ſymmetrie, & les chocquant enſemble, faiſoyt ſon, tel que font les ladres en Bretaigne auecques leurs clicquettes, mieulx toutesfoys reſonnant & plus harmonieux : & de la langue contracte dedans la bouche fredonnoyt ioyeuſement, touſiours reguardant l’Angloys.

Les theologiens, medicins, & chirurgiens penſerent que par ce ſigne il inferoyt, l’Angloys eſtre ladre. Les conſeilliers, legiſtes & decretiſtes, penſoient que ce faiſant il vouloyt conclurre, quelque eſpece de felicité humaine conſiſter en eſtat de ladrye, comme iadys maintenoyt le ſeigneur.

L’Angloys pource ne s’effraya, & leuant les deux mains en l’air les tint en telle forme, que les troys maiſtres doigtz ſerroyt on poing, & paſſoyt les poulſes entre le doigtz indice & moien, & les doigtz auriculaires demouroient en leurs extendues : ainſi les preſentoyt à Panurge, puys les acoubla de mode que le poulſe dextre touchoyt le gauſche, & le doigt petit gauſche touchoyt le dextre. A ce, Panurge ſans mot dire leua les mains, & en feiſt tel ſigne : De la main gauche il ioingnit l’ongle du doigt indice à l’ongle du poulce faiſant au meillieu de la diſtance comme vne boucle, & de la main dextre ſerroit tous les doigts au poing, excepté le doigt indice, lequel il mettoit & tiroit ſouuent par entre les deux aultres ſuſdictes de la main gauche, puis de la dextre eſtendit le doigt indice & le mylieu les eſloignant le mieulx qu’il pouoit, & les tirans vers Thaumaſte, puis mettoit le poulce de la main gauche ſus l’anglet de l’œil gauche eſtendant toute la main comme vne aeſle d’oyſeau, ou vne pinne de poiſſon, & la meuuant bien mignonnement deczà & delà, autant en faiſoit de la dextre ſur l’anglet de l’œil dextre. Thaumaſte commencza paſlir & trembler, & luy feiſt tel ſigne. De la main dextre il frappa du doigt meillieu contre le muſcle de la vole, qui eſt au deſſoubz le poulce, puis miſt le doigt indice de la dextre en pareille boucle de la ſeneſtre : mais il le miſt par deſſoubz, non par deſſus, comme faiſoit Panurge. Adoncques Panurge frappa la main l’vne contre l’aultre, & ſouffle en paulme, ce faict, met encores le doigt indice de la dextre en la boucle de la gauche le tirant & mettant ſouuent : puis eſtendit le menton, regardant intentement Thaumaſte. Le monde qui n’entendoit rien à ces ſignes, entendit bien que en ce il demandoit ſans dire mot, à Thaumaſte, que voulez vous dire là ? De faict Thaumaſte commença ſuer à groſſes gouttes, & ſembloit bien vn homme qui feuſt rauy en haulte contemplation. Puis ſe aduiſa, & miſt tous les ongles de la gauche contre ceulx de la dextre, ouurant les doigts, comme ſi ce euſſent eſté demys cercles, & eleuoit tant qu’il pouoit les mains en ce ſigne.

Aquoy Panurge ſoubdain miſt le poulce de la main dextre ſoubz les mandibules & le doigt auriculaire d’icelle en la boucle de la gauche, & en ce poinct faiſoit ſonner ſes dentz bien melodieuſement les baſſes contre les haultes.

Thaumaſte, de grand hahan ſe leua, mais en ſe leuant fiſt vn gros pet de boulangier : car le bran vint apres & piſſa vinaigre bien fort, & puoit comme tous les diables : les aſſiſtans commencerent ſe eſtouper les nez, car il ſe conchioit de anguſtie, puis leua la main dextre la clouant en telle faczon, qu’il aſſembloit les boutz de tous les doigts enſemble, & la main gauche aſſiſt toute pleine ſur la poictrine. A quoy Panurge tira ſa longue braguette auecques ſon Floc, & l’eſtendit d’vne couldee & demie, & la tenoit en l’air de la main gauche, & de la dextre print ſa pomme d’orange, & la gettant en l’air par ſept foys, à la huytieſme la cacha au poing de la dextre, la tenant en hault tout coy, puis commença ſecouer ſa belle braguette, la monſtrant à Thaumaſte. Apres cella Thaumaſte commença enfler les deux ioues comme vn cornemuſeur & ſouffloit, comme ſe il enfloit vne veſſie de porc. A quoy Panurge miſt vn doigt de la gauche ou trou du cul, & de la bouche tiroit l’air comme quand on mange des huytres en eſcalle, ou quand on hume ſa ſoupe, ce faict, ouure quelque peu de la bouche, & auecques le plat de la main dextre frappoit deſſus, faiſant en ce vn grand ſon & parfond comme s’il venoit de la ſuperficie du diaphragme par la trachee artere, & le feiſt par ſeize foys. Mais Thaumaſte ſouffloit touſiours comme vne oye. Adoncques Panurge miſt le doigt indice de la dextre dedans la bouche, le ſerrant bien fort auecques les muſcles de la bouche, puis le tiroit & le tirant faiſoit vn grand ſon, comme quand les petitz garſons tirent d’vn canon de ſulz auecques belles rabbes, & le fiſt par neuf foys. Alors Thaumaſte s’eſcria. Ha, meſſieurs, le grand ſecret : il y a mis la main iuſques au coulde, puis tira vn poignard qu’il auoit, le tenant par la poincte contre bas. A quoy Panurge print ſa longue braguette & la ſecouoit tant qu’il pouoit contre ſes cuiſſes : puis miſt ſes deux mains lyeez en forme de peigne ſur ſa teſte, tirant la langue tant qu’il pouoit, & tournant les yeulx en la teſte comme vne chieure qui meurt. Ha, i’entens, diſt Thaumaſte, mais quoy ? faiſant tel ſigne qu’il mettoit le manche de ſon poignard contre ſa poictrine & ſur la poincte mettoit le plat de la main en retournant quelque peu le bout des doigts.

Aquoy Panurge baiſſa ſa teſte du couſté gauche & miſt le doigt mylieu en l’aureille dextre, eſleuant le poulce contre mont. Puis croiſa les deux bras ſur la poictrine, touſſant par cinq foys, & à la cinquieſme frappant du pied droit contre terre, puis leua le bras gauche, & ſerrant tous les doigtz au poing, tenoit le poulſe contre le front, frappant de la main dextre par ſix foys contre la poictrine. Mais Thaumaſte comme non content de ce miſt le poulſe de la gauche ſur le bout du nez, fermant la reſte de ladicte main. Dont Panurge miſt les deux maiſtres doigtz à chaſcun couſté de la bouche, le retirant tant qu’il pouvoit et monstrant toutes ses dentz : et des deux poulses rabaissoit les paulpiers des yeulx bien parfondement en faisant assez layde grimace selon que sembloit es assistans.