Pantagruel · 20

doncqves ſe leua Thaumaſte & oſtant ſon bonnet de la teſte, remercia ledict Panurge doulcement. Puis dict à haulte voix à toute l’aſſiſtence. Seigneurs, à ceſte heure puis ie bien dire le mot euangelicque. Et ecce pluſquam Salomon hic. Vous auez icy vn theſor incomparable en voſtre preſence, c’eſt monſieur Pantagruel, duquel la renommee me auoit icy attiré du fin fond de Angleterre, pour conferer auecques luy des problemes inſolubles tant de Magie, Alchymie, de Caballe, de Geomantie, de Aſtrologie, que de Philoſophie : leſquelz ie auoys en mon eſprit. Mais de preſent ie me courrouce contre la renommee, laquelle me ſemble eſtre enuieuſe contre luy, car elle n’en raporte la millieſme partie de ce que en eſt par efficace. Vous auez veu comment ſon ſeul diſciple me a contenté & m’en a plus dit que n’en demandoys, d’abundand m’a ouuert & enſemble ſolu d’aultres doubtes ineſtimables. En quoy ie vous puiſſe aſſeurer qu’il m’a ouuert le vrays puys & abiſme de Encyclopedie, voire en vne ſorte que ie ne penſoys trouuer homme qui en ſceuſt les premiers elemens ſeulement, c’eſt quand nous auons diſputé par ſignes ſans dire mot ny demy. Mais à tant ie redigeray par eſcript ce que auons dit & reſolu, affin que l’on ne penſe que ce ayent eſté mocqueries, & le feray imprimer à ce que chaſcun y apreigne comme ie ay faict. Dont pouez iuger ce que euſt peu dire le maiſtre, veu que le diſciple a faict telle proueſſe : car Non eſt diſcipulus ſupra magiſtrum. En tout cas Dieu ſoit loué, & bien humblement vous remercie de l’honneur que nous auez faict à ceſt acte, Dieu vous le retribue eternellement. Semblables actions de graces rendit Pantagruel à toute l’aſſiſtance, & de là partant mena diſner Thaumaſte auecques luy, & croyez qu’ilz beurent à ventre deboutonné (car en ce temps là on fermoit les ventres à boutons, comme les colletz de preſent) iuſques à dire, dont venez vous ? Saincte dame, comment ilz tiroyent au cheurotin, & flaccons d’aller, & eulx de corner, tyre, baille, paige, vin, boutte, de par le diable, boutte : il n’y eut celluy qui n’en beuſt vingt cinq ou trente muys. Et ſçauez comment, ſicut terra ſine aqua, car il faiſoit chault, & d’auantaige ſe eſtoient alterez. Au regard de l’expoſition des propoſitions miſes par Thaumaſte, & des ſignifications des ſignes deſquelz ils vſerent en diſputant, ie vous les exoſeroys ſelon la relation d’entre eulx meſmes : mais l’on m’a dict que Thaumaſte en feiſt vn grand liure imprimé à Londres, auquel il declaire tout ſans riens laiſſer : par ce ie m’en deporte pour le preſent.