Pantagruel · 31

pres celle victoire merueilleuſe Pantagruel enuoya Carpalim en la ville des Amaurotes dire & annoncer comment le Roy Anarche eſtoit prins, & tous leurs ennemys defaictz. Laquelle nouuelle entendue, ſortirent au deuant de luy tous les habitans de la ville en bon ordre & en pompe triumphale, auecques vne lieſſe diuine, & le conduirent en la ville. Et furent faictz beaulx feuz de ioye par toute la ville, & belles tables rondes garnies de force viures dreſſees par les rues. Ce feut vn renouuellement du temps de Saturne, tant il y fut faicte lors grand chere. Mais Pantagruel, tout le ſenat enſemble, diſt. Meſſieurs, ce pendent que le fer eſt chault il le fault batre, pareillement deuant que nous debauſcher d’auantaige, ie veulx que allions prendre d’aſſault tout le Royaulme des Dipſodes. Pourtant ceulx qui auecques moy vouldront venir, ſe apreſtent à demain apres boire : car lors ie commenceray marcher. Non qu’il me faille gens d’auantaige pour me ayder à le conqueſter : car autant vauldroit que ie le tinſe deſia : mais ie voy que ceſte ville eſt tant pleine des habitans qu’ilz ne peuuent ſe tourner par les rues. Docnques ie les meneray comme vne colonie en Dipſodie, & leur donneray tout le pays, qui eſt beau, ſalubre, fructueux, & plaiſant ſus tous les pays du monde, comme pluſieurs de vous ſçauent qui y eſtes allez aultrefoys. Vn chaſcun de vous qui y vouldra venir ſoit preſt comme i’ay dict.

Ce conſeil & deliberation fut diuulgué par la ville, & le lendemain ſe trouuerent en la place deuant le palais iuſques au nombre de dixhuyct cens cinquante & ſix mille & vnze, ſans les femmes & petitz enfans. Ainſi commencerent à marcher droict en Dipſodie en ſi bon ordre qu’ilz reſſembloyent es enfans d’Iſraël quand ilz partirent d’Egypte pour paſſer la mer rouge.

Mais dauant que pourſuyure ceſte entreprinſe ie vous veulx dire comment Panurge traicta ſon priſonnier le roy Anarche. Il luy ſouuint de ce que auoit raconté Epiſtemon, comment eſtoient traictez les Roys & riches de ce monde par les champs Eliſees, & comment ilz gaignoient pour lors leur vie à vilz & ſalles meſtiers. Pourtant vn iour habilla ſondict Roy d’vn beau petit pourpoint de toille tout deſchiquetté comme la cornette d’vn Albanoys, & de belles chauſſes à la mariniere, ſans ſouliers : car (diſoit il) ilz luy gaſteroient la veue, & vn petit bonnet pers auecques vn grand plume de chappon. Ie faulx, car il m’eſt aduis qu’il y en auoit deux, & vne belle ceincture de pers & vert, diſant que ceſte liuree luy aduenoit bien, veu qu’il auoit eſté peruers.

En tel poinct l’amena deuant Pantagruel, & luy diſt. Congnoiſſez vous ce ruſtre ? Non certes, diſt Pantagruel. C’eſt monſieur du Roy de troys cuittes. Ie le veulx faire homme de bien : ces diables de roys icy ne ſont que veaulx, & ne ſçauent ny ne valent rien, ſinon à faire des maulx es pauures ſubiectz, & à troubler tout le monde par guerre pour leur inique & deteſtable plaiſir. Ie le veulx mettre à meſtier, & le faire cryeur de ſaulce vert. Or commence à cryer, Vous fault il poinct de ſaulce vert ? Et le pauure diable cryoit. C’eſt trop bas, diſt Panurge, & le print par l’aureille, diſant. Chante plus hault, en g ſol ré vt. Ainſi, diable, tu as bonne gorge, tu ne fuz iamais ſi heureux que de n’eſtre plus roy. Et Pantagruel prenoit à tout plaiſir. Car ie auſe bien dire que c’eſtoit le meilleur petit bon homme qui fuſt d’icy au bout d’vn baſton. Ainſi feut Anarche bon cryeur de ſaulce vert. Deux iours apres Panurge le maria auecques vne vieille lanterniere, luy meſmes fiſt les nopces à belles teſtes de mouton, bonnes haſtilles à la mouſtarde, & beaulx tribars aux ailz, dont il en enuoya cinq ſommades à Pantagruel, leſquelles il mangea toutes, tant il les trouua appetiſſantes, & à boire belle piſcantine & beau cormé. Et pour les faire dancer, loua vn aueugle qui leur ſonnoit la note auecques la vielle. Apres diſner les amena au palais & les monſtra à Pantagruel, & luy diſt monſtrant la mariee, Elle n’a garde de peter. Pourquoy ? diſt Pantagruel. Pource, diſt Panurge, qu’elle eſt bien entamee. Quelle parole eſt cela ? diſt Pantagruel. Ne voyez vous, diſt Panurge, que les chaſtaignes qu’on faict cuire au feu, ſi elles ſont entieres elles petent que c’eſt raige : & pour les engarder de peter l’on les entame. Auſſi ceſte mariee eſt bien entamee par le bas, ainſi elle ne petera poinct.

Pantagruel leur donna vne petite loge aupres de la baſſe rue, & vn mortier de pierre à piller la ſaulce. Et firent en ce point leur petit meſnage : & feut auſſi gentil cryeur de ſaulce vert que feuſt oncques veu en Vtopie. Mais l’on m’a dict deſpuis que ſa femme le bat comme plaſtre, & le pauure ſot ne ſe auſe defendre, tant il eſt nies.

Et bon jour, Monſieur du Corbeau.