Pantagruel · 30

este deſconfite gigantale paracheuee, Pantagruel ſe retira au lieu des flaccons & appela Panurge, & les aultres, leſquelz ſe rendirent à luy ſains & ſaulues, excepté Euſthenes lequel vn des Geans auoit egraphiné quelque peu au viſaige : ainſi qu’il l’eſgorgetoit. Et Epiſtemon qui ne ſe comparoit poinct. Dont Pantagruel fut ſi dolent qu’il ſe voulut tuer ſoymeſmes, mais Panurge luy diſt. Dea, ſeigneur, attendez vn peu, & nous le chercherons entre les mors, & voirons la verité du tout. Ainſi doncques comme ilz cherchoyent, ilz le trouuerent tout roidde mort & la teſte entre ſes bras toute ſanglante.

Lors Euſthenes s’eſcria. Ha, male mort, nous as tu tollu le plus parfaict des hommes ? A laquelle voix ſe leua Pantagruel au plus grand deuil qu’on veit iamais au monde. Et diſt à Panurge. Ha, mon amy, l’auſpice de vos deux verres & du fuſt de iaueline eſtoyt bien par trop fallace. Mais Panurge diſt. Enfans, ne pleurez goutte, il eſt encores tout chault, ie vous le gueriray auſſi ſain qu’il fut iamais. Ce diſant print la teſte & la tint ſus ſa braguette chauldement affin qu’elle ne print vent. Euſthenes & Carpalim porterent le corps au lieu ou ilz auoient bancquetté : non par eſpoir que iamais gueriſt, mais affin que Pantagruel le veiſt. Toutesfoys Panurge les reconfortoit, diſant. Si ie ne le guery ie veulx perdre la teſte (qui eſt le gaige d’vn fol) laiſſez ces pleurs & me aydez. Adonc nectoya treſbien de beau vin blanc le col, & puis la teſte : & y ſynapiza de pouldre de diamerdis qu’il portoit touſiours en vne de ſes faſques, apres les oignit de ie ne ſçay quel oingnement : & les afuſta iuſtement veine contre veine, nerf contre nerf, ſpondyle contre ſpondyle, affin qu’il ne feuſt tortycolly (car telles gens il haiſſoit de mort) ce faict, luy fiſt alentour quinze ou ſeize poincts de agueille, affin qu’elle ne tumbaſt de rechief : puis miſt à l’entour vn peu d’vn vnguent, qu’il appelloit reſuſcitatif. Soubdain Epiſtemon commença reſpirer, puis ouurir les yeulx, puis baiſler, puis eſternuer, puis fiſt vn gros pet de meſnage. Dont diſt Panurge, à ceſte heure il eſt guery aſſeurement, & luy bailla à boire vn voirre d’vn grand villain vin blanc auecques vne rouſtie ſuccree. En ceſte faczon fut Epiſtemon guery habillement, excepté qu’il feut enroué plus de troys ſepmaines, & eut vne toux ſeiche, dont il ne peut oncques guerir, ſinon à force de boire.

Et là commencza à parler, diſant. Qu’il auoit veu les diables, auoit parlé à Lucifer familierement, & faict grand chere en enfer. Et par les Champs Eliſees. Et aſſeuroit deuant tous que les diables eſtoyent bons compaignons. Au regard des damnez, il diſt, qu’il eſtoit bien marry de ce que Panurge l’auoit ſi toſt reuocqué en vie. Car ie prenois (diſt il) vn ſingulier paſſetemps à les veoir.

Comment ? diſt Pantagruel. L’on ne les traicte (diſt Epiſtemon) ſi mal que vous penſeriez : mais leur eſtat eſt changé en eſtrange façon. Car ie veis Alexandre le grand qui repetaſſoit de vieilles chauſſes, & ainſi gaignoit ſa vie.

Xerces crioit la mouſtarde.

Romule eſtoit ſaulnier.

Numa clouatier.

Tarquin tacquin.

Piſo paiſant.

Sylla riueran.

Cyre eſtoit vachier.

Themiſtocles verrier.

Epaminondas myrallier.

Brute & Caſſie agrimenſeurs.

Demoſthenes vigneron.

Ciceron atizefeu.

Fabie enfileur de patenoſtres.

Artaxerces cordier.

Eneas meuſnier.

Achilles teigneux.

Agamenon lichecaſſe.

Vlyſſes fauſcheur.

Neſtor harpailleur.

Darie cureur de retraictz.

Ancus Martius gallefretier.

Camillus gallochier.

Marcellus eſgouſſeur de febues.

Druſus trinquamolle.

Scipion Africain cryoit la lye en vn ſabot.

Aſdrubal eſtoit lanternier.

Hannibal cocquaſſier.

Priam vendoit les vieulx drapeaulx.

Lancelot du lac eſtoit eſcorcheur de cheuaulx mors.

Tous les cheualiers de la table ronde eſtoient pauures gaignedeniers tirans la rame pour paſſer les riuieres de Coccytus, Phlegeton, Styx, Acheron, Lethé, quand meſſieurs les diables ſe veulent eſbattre ſur l’eau comme font les baſtelieres de Lyon & gondoliers Venize. Mais pour chaſcune paſſade ilz ne ont que vne nazarde, & ſus le ſoir quelque morceau de pain chaumeny.

Traian eſtoit peſcheur de Grenoilles.

Anton lacquays.

Commode gayetier.

Pertinax eſchalleur de noys.

Luculle grillotier.

Iuſtinian bimbelotier.

Paris eſtoit pauure loqueteux.

Hector eſtoit fripeſaulce.

Achilles boteleur de foin.

Cambyſes mulletier.

Ataxerces eſcumeur de potz.

Neron eſtoit vielleux, & Fierabras eſtoit ſon varlet mais il luy faiſoit mille maulx, & luy faiſoit manger le pain bis, & boire le vin poulſé, luy mangeoit & buuoit du meilleur.

Iulles Ceſar & Pompee eſtoient guoildronneurs de nauires.

Valentin & Orſon ſeruoient aux eſtuues d’enfer, & eſtoient ragletorelz.

Giglan & Gauuain eſtoient pauures porchiers.

Geoffroy à la grand dent eſtoit allumetier.

Godeffroy de Billon dominotier.

Iaſon eſtoit manillier.

Don Pietre de Caſtille porteur de rogatons.

Morgant braſſeur de byere.

Huon de bordeaulx eſtoit relieur de tonneaulx.

Pirrhus ſouillart de cuiſine.

Antiochus eſtoit ramonneur de cheminees.

Romulus eſtoit rataconneur de bobelins.

Octauian ratiſſeur de papier.

Nerua houſſepaillier.

Le pape Iules crieur de petitz paſtez, mais il ne portoit plus ſa grande & bougrifique barbe.

Ian de Paris eſtoit greſſeur de bottes.

Artus de Bretaigne degreſſeur de bonnetz.

Perceforeſt porteur de couſtretz.

Boniface pape huytieſme eſtoit eſcumeur des marmites.

Nicolas pape tiers eſtoit papetier.

Le pape Alexandre eſtoit preneur de ratz.

Le pape Sixte greſſeur de verolle.

Comment ? diſt Pantagruel, y a il des verollez de par delà ? Certes, diſt Eſpitemon. Ie n’en veiz oncques tant, il y en a plus cent millons. Car croyez que ceulx qui n’ont eu la verolle en ce monde cy, l’ont en l’aultre.

Cor dieu, diſt Panurge, i’en ſuis doncques quite. Car ie y ay eſté iuſques au trou de Gylbathar, & remply les bondes de Hercules, & ay abatu des plus meures.

Ogier le Dannoys eſtoit frobiſſeur de harnoys.

Le roy Tigranes eſtoit recouureur.

Galien Reſtauré preneur de taulpes.

Les quatre filz Aymon arracheurs de dentz.

Le pape Calixte eſtoit barbier de mauioinct.

Le pape Vrbain crocquelardon.

Meluſine eſtoit ſouillarde de cuyſine.

Matabrune lauandiere de buees.

Cleopatra reuendereſſe d’oignons.

Helene courratiere de chambrieres.

Semyramis eſpouillereſſe de beliſtres.

Dido vendoit des mouſſerons.

Panthaſilee eſtoit creſſonniere.

Lucreſſe hoſpiraliere.

Hortenſia filandiere.

Liuie raclereſſe de verdet.

En ceſte façon ceulx qui auoient eſté gros Seigneurs en ce monde icy, gaingnoyent leur pauure meſchante & paillarde vie là bas. Au contraire les philoſophes, & ceulx qui auoient eſté indigens en ce monde, de par delà eſtoient gros ſeigneurs en leur tout. Ie veiz Diogenez qui ſe prelaſſoit en magnificence auec vne grand robbe de pourpre, & vng ſceptre en ſa dextre, & faiſoit enrager Alexandre le grand, quand il n’auoit pas bien repetaſſé les chauſſes, & le payoit en grans coups de baſton. Ie veiz Epictete veſtu gualentement à la françoyſe, ſoubz vne belle ramee auecques force Damoizelles ſe rigolant, beuuant, danſant, faiſant en tous cas grande chere, & aupres de luy force eſcuz au ſoleil. Au deſſus de la treille eſtoient pour ſa deuiſe ces vers eſcriptz.

Saulter, dancer, faire les tours,
Et boyre vin blanc & vermeil :
Et ne faire rien tous les iours
Que compter eſcuz au ſoleil.

Lors quand me veit il me inuita à boire auecques luy courtoiſement, ce que ie feiz voluntiers, & chopinaſmes theologalement. Ce pendent vint Cyre luy demander vn denier en l’honneur de Mercure pour achapter vn peu d’oignons pour ſon ſouper. Rien, rien, dict Epictete, ie ne donne poinct deniers. Tien, marault, voy là vn eſcu, foys homme de bien. Cyre feut bien aiſe d’auoir rancontré tel butin. Mais les aultres coquins de Royx qui font là bas, comme Alexandre, Daire & aultres, le deſroberent la nuyct.

Ie veiz Pathelin, theſaurier de Rhadamanthe, qui marchandoit des petitz paſtez que cryoit le pape Iules, & luy demanda combien la douzaine ? Troys blancs, dit le pape. Mais, diſt Pathelin, troys coups de barre, baille icy, villain, baille, & en va querir d’aultres. Le pauure pape alloit pleurant, quand il feut deuant ſon maiſtre patiſſier, luy dict, qu’on luy auoit oſté ſes paſtez. Adonc le patiſſier luy bailla l’anguillade ſi bien que ſa peau n’euſt rien vallu à faire cornemuſes.

Ie veiz maiſtre Iean le maire qui contrefaiſoit du pape, & à tous ces pauures roys & papes de ce monde faiſoit baiſer ſes piedz, & en faiſant du grobis leur donnoit la benediction, diſant. Gaignez les pardons, coquins, guaignez, ilz ſont à bon marché. Ie vous abſouz de pain & de ſouppe, & vous diſpenſe de ne valoir iamais rien, & appela Caillete & Triboulet, diſant. Meſſieurs les Cardinaulx, depeſchez leurs bulles, & chaſcun vn coup de pau ſus les reins : ce que fut faict incontinent. Ie veiz maiſtre François Villon qui demanda à Xerces. Combien la denree de mouſtarde ? Vn denier, diſt Xerces. A quoy diſt ledict de Villon. Tes fieures quartaines, villain, la blanchee n’en vault q’vn pinart, & tu nous ſurfaictz icy les viures. Adonc piſſa dedans ſon bacquet comme font les mouſtardiers à Paris.

Ie veiz le franc archier de Baignolet qui eſtoit inquiſiteur des heretiques. Il rencontra Perſeforeſt piſſant contre vne muraille en laquelle eſtoit painct le feu de ſainct Antoine. Il le declaira heretique, & le euſt faict bruſler tout vif, n’euſt eſté Morgant qui pour ſon proficiat & aultres menuz droicts luy donna neuf muys de biere. Or diſt Pantagruel. Reſerue nous ces beaulx comptes à vne aultre foys. Seullement dis nous comment y ſont traictez les vſuriers ?

Ie les veis, diſt Epiſtemon, tous occupez à chercher les eſpingles rouillees & vieulx cloux parmy les ruiſſeaux des rues, comme vous voyez que font les coquins en ce monde. Mais le quintal de ſes quinqualleries ne vault qu’vn bouſſin de pain, encores y en a il mauluaiſe depeſche : ainſi les pauures malautruz ſont aulcunesfoys plus de troys ſepmaines ſans manger morceau ny miette, & trauaillent iour & nuict attendant la foyre à venir : mais de ce trauail & de malheureté y ne leur ſouuient tant ilz ſont actifz & mauldictz, pourueu que au bout de l’an ilz gaingnent quelque meſchant denier. Or, dict Pantagruel, faiſons vn tranſon de bonne chere, & beuuons, ie vous en prie, enfans : car il faict beau boire tout ce moys. Lors degainerent flaccons à tas, & des munitions du camp feirent grand chere. Mais le pauure roy Anarche ne ſe pouoit eſiouyr. Dont diſt Panurge. De quel meſtier ferons nous monſieur du roy icy ? affin que il ſoit ia tout expert en l’art quand il ſera de par delà à tous les diables ? Vrayement, diſt Pantagruel, c’eſt bien aduiſé à toy : or, fais en à ton plaiſir : ie le te donne. Grand mercy, diſt Panurge, le preſent n’eſt de refus & l’ayme de vous.

Follemus gueriſſanteo,
Prenez pour vn double de ſens
Et vne once dyamerdo.

A Paris on crie tres hault
Ieunes ou vieux, lye, lye.

(Cris de Paris)