Des meurs et conditions de Panurge. xxxxx Cha. xii

ANURGE estoit de stature moyenne ny trop grand ny trop petit, et avoit le nez ung peu aquillin faict à manche de rasouer. Et pour lors estoit de l’aage de trente et cinq ans ou environ, fin à dorer comme une dague de plomb, bien galand homme de sa personne, sinon qu’il estoit quelque peu paillard, et subiect de nature à une maladie qu’on appeloit en ce temps là, faulte d’argent, c’est douleur non pareille : toutesfois il avoit soixante et troys manieres d’en trouver tousiours à son besoing, dont la plus honnorable et la plus commune estoit par façon de larrecin furtivement faict, malfaisant, bateur de pavez, ribleur s’il y en avoit en Paris : et tousiours machinoit quelque chose contre les sergeans et contre le guet. À l’une foys il assembloit troys ou quatre de bons rustres et les faisoit boire comme Templiers sur le soir, et apres les menoit au dessoubz de saincte Geneviefve, ou aupres du colliege de Navarre, et à l’heure que le guet montoit par là, ce que il congnoissait en mettant son espée sur le pavé et l’oreille aupres, et lors qu’il ouyoit son espée bransler, c’estoit signe infaillible que le guet estoit pres : à l’heure doncques luy et ses compaignons prenoient ung tombereau, et luy bailloient le bransle le ruant de grand force contre la vallée, et ainsi mettoit tout le pouvre guet par terre comme porcs, et puys s’en fuyoient de l’aultre cousté : car en moins de deux iours, il sceut toutes les rues, ruelles et traverses de Paris comme son Deus det. À l’aultre fois il faisoit en quelque belle place par ou ledict guet debvoit passer une trainée de pouldre de canon, et à l’heure que le guet passoit, il mettoit le feu dedans, et puis prenoit son passetemps à veoir la bonne grace qu’ilz avoient en s’en fuyant, pensans le feu sainct Antoine les tint aux iambes. Et au regard des pouvres maistres es ars et theologiens, il les persecutoit sur tous aultres, quand il rencontroit quelqu’ung d’entre eulx par la rue, iamais ne failloit de leur faire quelque mal, maintenant leurs mettant ung estronc dedans leur chaperons à bourlet, maintenant leur atachant petites quehues de regnard, ou des oreilles de lievres par derriere, ou quelque aultre mal. Et ung iour que l’on avoit assigné à tous les theologiens de se trouver en Sorbone pour examiner les articles de la foy, il fist une tartre bourbonnoyse composée de force de hailz, de galbanum, de assa fetida, de castoreum, d’estroncs tous chaux, et la destrampit de sanie de bosses chancreuses, et de fort bon matin engressa et oignit theologalement tout le treilliz de Sorbonne, en sorte que le diable n’y eust pas duré. Et tous ces bonnes gens rendoient là leurs gorges devant tout le monde, comme s’ilz eussent escorché le regnard, et en mourut dix ou douze de peste, mais il ne s’en soucioit pas. Et en son saye y avoit plus de vingt et six petites bougettes et fasques tousiours pleines, l’une d’ung petit deaul de plomb, et d’ung petit cousteau affilé comme une aiguille de peletier, dont il couppoit les bourses, l’aultre de aigrest, qu’il gettoit aux yeulx de ceulx qu’il trouvoit, l’aultre de glaterons empennés de petites plumes de oysons ou de chappons, qu’il gettoit sur les robbes et bonnetz des bonnes gens, et aulcunesfois leur en faisoit de belles cornes qu’ilz portoient par toute la ville, aulscunesfois toute leur vie. Aux femmes aussi par dessus leurs chapperons au derriere aulcunesfois en mettoit faictz en forme d’ung membre d’homme. En l’aultre ung tas de cornetz tous plains de pusses et de poux, qu’il empruntoit des guenaulx de sainct Innocent et les gettoit à tout belles petites cannes ou plumes dont on escript, sur les colletz des plus sucrées damoiselles qu’il trouvoit, et mesmement en l’esglise : car iamais ne se mettoit au cueur au hault, mais tousiours demouroit en la nef entre les femmes, tant à la messe, à vespres, comme au sermon. En l’aultre, force provision de haims et claveaux, dont il acouploit souvent les hommes et les femmes en compaigniez où ilz estoient serrez : et mesmement celles qui portoient robbe de taffetas armoisy, et à l’heure qu’elles se vouloient departir elles rompoient toutes leurs robbes. En l’aultre ung fouzil garny d’esmorche, d’allumettes, de pierre à feu, et tout aultre appareil à ce requis. En l’aultre deux ou troys mirouers ardens, dont il faisoit enrager aulcunesfois les hommes et les femmes, et leur faisoit perdre contenance à l’esglise, car il disoit qu’il n’y avoit qu’ung antistrophe entre femme folle à la messe, et femme molle à la fesse. En l’aultre avoir provision de fil, et d’aiguilles dont il faisoit mille petites diableries. Une fois à l’issue du Palays à la grant salle que ung cordelier disoit sa messe de messieurs il luy ayda à soy habiller et revestir, mais en l’acoustrant il luy cousit l’aulbe avecques sa robbe et chemise, et puis se retira quant messieurs de la court se vindrent asseoir pour ouyr messe. Mais quant ce fust à l’ite missa est, que le pouvre frater se voulut devestir son aulbe, il emporta ensemble et habit et chemise qui estoient bien cousuz ensemble, et se rebrassit iusques aux espaules monstrant son callibistris à tout le monde, qui n’estoit pas petit : sans doubte. Et le frater tousiours tiroit, mais tant plus ce descouvroit il, iusques à qu’ung de messieurs de la court dist. Et quoy ce beaupere nous veult il icy faire l’offrande et bayser son cul ? le feu sainct Antoine le bayse. Et des lors feut ordonné que les pouvres beatzperes ne se despouilleroyent plus devant le monde, mais en leur sacrifice, mesmement quand il y auroit des femmes, car ce leur seroit occasion de pecher du peché d’envie. Et le monde demandoit, Pourquoy est ce que ces fraters avoient la couille si longue ? mais ledict Panurge soulut tresbien le probleme, disant ce que faict les oreilles des asnes si grandes, ce n’est sinon par ce que leurs meres ne leur mettoyent point de beguin en la teste comme dit de Alliaco en ses suppositions. À pareille raison, ce que faict la couille des pouvres beatz peres tant sainct Antoine large, c’est qu’ilz ne portent point de chausses foncées, et leur pouvre membre s’estend à sa liberté à bride avallée, et leur va ainsi triballant sur les genoulx comme font les patenostres aux femmes ? Mais la cause pourquoy ilz l’avoient gros à l’equipollent, c’estoit que en ce triballement les humeurs du corps descendent audit membre, car selon les Legistes agitation et motion continuelle est cause de attraction. Item avoit ung aultre poche toute pleine de alun de plume dont il gettoit dedans le doz des femmes, qu’il voyoit les plus acrestées, et les faisoit despouiller devant tout le monde, les aultres dancer comme iau sur breze ou bille sur tambour, les aultres courir les rues, et luy apres couroit, et à celles qui se despouilloyent, il mettoit sa cappe sur le doz, comme homme courtoys et gracieux. Item en ung aultre il avoit une petite guedoufle plaine de vieille huyle, et quand il trouvoit ou homme ou femme qui luy semblissent bien glorieux, et qui eussent quelque belle robbe, il leur engraissoit et guastoit tous les plus beaulx endroictz de leurs habillemens soubz le semblant de les toucher et dire. Voicy de bon drap, voicy bon satin, bon tafetas, ma dame dieu vous doint ce que vostre noble cueur desire, vous avez robbe neufve, nouvel amy, dieu vous y maintienne, et ce disant leur mettoit la main sur le collet, et ensemble la male tache y demouroit perpetuellement, que le diable n’eust pas ostée, puis à la fin leur disoit. Ma dame donnez vous guarde de tumber : car il y a icy ung grand trou devant vous. En ung aultre avoit tout plain de Euphorbe pulverisé bien subtilement, et là dedans mettoit ung mouschenez beau et bien ouvré qu’il avoit desrobé à la belle lingiere des Galleries de la saincte chappelle, en luy ostant ung poul dessus son sain, lequel toutesfoys il y avoit mis. Et quand il se trouvoit en compaignie de quelques bonnes dames, il leur mettoit sus propos de lingerie, et leur mettoit la main au sain, demandant, et cet ouvraige est il de Flandres ou de Haynault : et puis tiroit son mouschenez disant, tenez tenez, voy en cy de l’ouvrage, elle est de Fonterabie, et le secouoit bien fort à leurs nez, et les faisoit esternuer quatre heures sans repos. Et ce pendant il petoit comme ung roussin, et les femmes se ryoient luy disant, comment : vous petez Panurge ? Non fois, disoit il, madame : mais ie accorde au contrepoint de la musicque que sonnez du nez. En l’aultre ung daviet, ung pellican, ung crochet, et quelques aultres ferremens dont il n’y avoit porte ny coffre qu’il ne crochetast. En l’aultre tout plain de petitz goubeletz, dont il iouoit fort artificiellement : car il avoit les doigs faictz à la main comme Minerve ou Arachné. Et avoit aultrefois cryé le theriacle. Et quand il changeoit ung teston, ou quelque aultre piece, le changeur n’eust esté plus fin que maistre mousche, si Panurge n’eust faict evanouyr à chascune fois cinq ou six grands blancs visiblement, appertement, manifestement, sans faire lesion ne blesseure aulcune, dont le changeur n’en eust senty que le vent. Ung iour ie le trouvay quelque peu escorné et taciturne, et me doubte bien qu’il n’avoit denare, dont ie luy dys. Panurge vous estes malade à ce que ie voy à vostre physionomie, et ientens le mal, vous avez ung fluz de bourse : mais ne vous souciez. Iay encores six sols et maille, qui ne virent oncques pere ny mere, qui ne vous fauldront non plus que la verolle, en vostre necessité. À quoy il me respondit. Et bren pour l’argent. ie n’en auray quelque iour que trop : car iay une pierre philosophalle qui me attire l’argent des bourses, comme l’aymant attire le fer. Mais voulez vous venir gaigner les pardons ? dist il. Et par ma foy ie luy respons, Ie ne suis pas grand pardonneur en ce monde icy, ie ne sçay si ie le seray en l’aultre : et bien allons au nom de dieu, pour ung denier ny plus ny moins. Mais (dist il) prestez moy doncques ung denier à l’interest. Rien rien, dis ie, Ie vous le donne de bon cueur, grates vobis dominos, dist il. Ainsi allasmes commençant à sainct Gervays, et ie gaigne les pardons au premier tronc seulement : car ie me contente de peu en ces matieres, et puis me mis à dire mes menuz suffrages, et oraisons de saincte Brigide : mais il gaigna à tous les troncz, et tousiours bailloit argent à chascun des pardonnaires. De là nous transportasmes à nostre Dame, à sainct Iehan, à sainct Antoine, et ainsi des aultres esglises ou avoit bancque de pardons, de ma part ie n’en gaignoys plus : mais luy à tous les troncz, il baysoit les relicques, et à chascun donnoit. Brief quand nous fusmes de retour il me mena boire au cabaret du chasteau et me montra dix ou douze de ses bougettes plaines d’argent. A quoy ie me seigny faisant la croix, disant. Dont avez vous tant recouvert d’argent en si peu de temps ? A quoy il me respondit, que il l’avoit prins des pardons : car en leur baillant le premier denier (dist il) ie le mis si soupplement, que il sembla que feust ung grand blanc, par ainsi d’une main ie prins douze deniers, voire bien douze liards ou doubles pour le moins, et de l’aultre troys ou quatre douzains : et ainsi par toutes les esglises où nous avons esté. Voire mais (dis ie) vous vous damnez comme une sarpe et estes larron et sacrilege. Ouy bien, dist il, comme il vous semble, mais il ne me le semble pas quand à moy. Car les pardonnaires me le donnent, quand ilz me disent en presentant les relicques à bayser, centuplum accipies, que pour ung denier ien prene cent : car accipies est dit selon la maniere des Hebrieux qui vient du futur en lieu de l’imperatif, comme avez en la loy, dominum deum tuum adorabis et illi foli servies, diliges proximuum tuum, et sic de aliis. Ainsi quand le pardonnigere me dit, centuplum accipies, il veult dire, centupluim accipe, et ainsi l’expose rabi Quimy et rabi Aben Ezra, et tous les Massoretz. Et davantaige le pape Sixte me donna quinze cens livres de rente sur son dommaine et tresor ecclesiasticque, pour luy avoir guery une bosse chancreuse, qui tant le tourmentoit, qu’il en cuyda devenir boyteux toute sa vie. Ainsi ie me paye par mes mains : car il n’est tel, sur ledict tresor ecclesiasticque. Ho mon amy disoit il, si tu sçavoys comment ie fis mes choux gras de la croysade, tu seroys tout esbahy. Elle me valut plus de six mille fleurins. Et où diable sont ils allez ? dis ie, car tu n’en as pas une maille. Dont ilz estoient venuz (dist il) ilz ne firent seulement que changer de maistre. Mais ien employai bien troys mille à marier non pas les ieunes filles : car elles ne trouvent que trop marys, mais de grand vieilles sempiternelles qui n’avoient dentz en gueulle. Consyderant, ces bonnes femmes icy ont tresbien employé leur temps en ieunesse et ont ioué du serrecropiere à cul levé à tous venans, iusques à ce qu’on n’en a plus voulu. Et par dieu ie les feray saccader encores une foys devant qu’elles meurent. Et par ainsi à l’une donnoit cent flourins, à l’aultre six vingtz, à l’aultre troys cens, selon qu’elles estoient bien infames, detestables, et abhominables : car d’autant qu’elles estoient plus horribles et execrables, d’autant il leur failloit donner davantaige, aultrement le diable ne les eust pas voulu besoigner. Incontinent ie m’en alloys à quelque porteur de coustretz gros et gras, et faysois moy mesmes le mariage, mais premier que luy monstrer les vieilles, ie luy monstroys les escuz, disant. Compere, voicy qui est à toy, si tu veulx fretinfretailler ung bon coup. Des lors les pouvres hayres arressoient comme vieulx mulletz, et ainsi leur faisoys bien aprester et bancqueter, et boire du meilleur et force espiceryes pour mettre les vieilles en appetit et en chaleur. Fin de compte ilz besoignoient comme toutes bonnes ames, sinon que à celles qui estoient horriblement villaines et defaictes, ie leur faisoys mettre ung sac sur le visaige. Davantaige ien ay perdu beaucoup en proces. Et quelz proces as tu peu avoir ? disoys ie, tu ne as ny terre ny maison. Mon amy (dist il) les damoiselles de ceste ville avoient trouvé par instigation de diable d’enfer, une maniere de colletz ou cachecoulx à la haulte façon, qui leur cachoient si bien les seins, que l’on n’y povoit plus mettre la main par dessoubz : car la fente d’iceulx elles avoient mise par derriere, et estoient tous clos par devant, dont les pouvres amans dolens contemplatifs n’estoient pas bien contens, ung beau iour de Mardy ien presentay resqueste à la court, me formant partye contre lesdictes damoyselles et remonstrant les grans interestz que ie pretendoys protestant que à mesme raison ie feroys coudre la braguette de mes chausses au derriere, si la court n’y donnoit ordre, somme toute les damoiselles formerent syndicat et passerent procuration à defendre leur cause, mais ie les poursuivy si vertement que par arrest de la court y fut dist, que ces haulx cachecoulx ne seroient plus portez, sinon qu’ilz feussent quelque peu fenduz par devant. Mais il me cousta beaucoup. Ieuz ung aultre proces bien ord et bien sale contre maistre Fify et ses suppotz, à ce qu’ilz n’eussent point à lire clandestinement les livres de Sentences de nuyct, mais de beau plain iour et ce es escholles de Sorbonne, en face de tous les theologiens, ou ie fuz condemné es despens pour quelque formalité de la relation du sergeant. Une aultre foys ie formay complaincte à la court contre les mulles des Presidens, Conseilliers, et aultres : tendant à fin que quand en la basse court du Palays l’on les mettroit à ronger leur frain, que les Conseilleres leur feissent de belles baverettes affin que de leur bave elles ne gastassent point le pavé en sorte que les paiges du palays peussent iouer dessus à beaulx detz, ou au reniguedieu à leur ayse, sans y rompre leurs chausses aux genoux. Et de ce en euz bel arrest : mais il me couste bon. Or sommez à ceste heure combien me coustent les petitz bancquetz que ie fays aux paiges du palays de iour en iour. Et à quelle fin ? dis ie. Mon amy (dist il) tu ne as nul passetemps en ce monde. Ien ay moy plus que le roy. Et si tu vouloys te rallier avecques moy, nous serions diables. Non non (dis ie) par sainct Adauras : car tu seras une foys pendu. Et toy (dist il) tu seras une foys enterré, lequel est plus honorable ou l’air ou la terre ? He grosse pecore, Iesuchrist ne fut il pas pendu en l’air. Mais à propos ce pendant que ces paiges bancquettent ie garde leurs mulles, et tousiours ie couppe à quelqu’une l’estriviere du cousté du montouer qu’elle ne tient que à ung fillet. Et quand le gros enflé de Conseillier ou aultre a prins son bransle pour monter sus, ilz tombent tous platz comme porcs devant tout le monde : et aprestent à rire pour plus de cent frans. Mais ie me rys encores davantaige, c’est que eulx arrivez au logis ilz font foueter monsieur du page comme seigle vert, par ainsi ie ne plains point ce que m’avoit cousté à les bancqueter. Fin de compte il avoit (comme ay dit dessus) soixante et troys manieres de recouvrer argent : mais il en avoit deux cens quatorze de le despendre, hors mis la reparation de dessoubz le nez.