Comment Pantagruel vint a Paris. xxxxx Cha. vii

PRES que Pantagruel eut fort bien estudie a Orleans il se delibera de visiter la grande universite de Paris, mais devant que partir il fut adverty quil y avoit une grosse et enorme cloche a sainct Aignan dudict Orleans, qui estoit en terre pres de troys cens ans y avoit : car elle estoit si grosse que par nul engin lon ne la pouvoit mettre seulement hors de terre, combien que lon y eut applicque tous les moyens que mettent Vitruvius de architecture, Albertus de re edificatoria, Euclides, Theon, Archimenides, et Hiero. de ingeniis, car tout ny servit de rien. Dont voulentiers encline a lhumble requeste des citoyens et habitans de ladicte ville : delibera de la porter au clochier a ce destine. Et de faict sen vint au lieu ou elle estoit, et la leva de terre avecques le petit doigt aussi facillement que feriez une sonnette desparvier. Et devant que la porter au clochier voulut en donner une aubade par la ville, et la faire sonner par toutes les rues en la portant en sa main. Dont tout le monde se resiouyst fort, mais il en advint ung inconvenient bien grand : car en la portant ainsi, et la faisant sonner par les rues, tout le bon vin dOrleans poulsa, et se gasta. De quoy le monde ne se advisa point que la nuyt ensuyvant : car ung chascun se sentit tant altere davoir beu de ces vins poulsez, quils ne faisoient que cracher aussi blanc comme cotton disant, nous avons du Pantagruel, et avons les gorges sallees. Ce faict vint a Paris avecques ses gens. Et a son entree tout le monde sortit hors pour le veoir, comme vous scavez bien que le peuple de Paris est sot par nature : et le regardoient en grand esbahyssement, et non sans grande peur quil nemportast le Palais ailleurs en quelque pays a remotis, comme son pere avoit emporte les campanes de nostre dame, pour attacher au col de sa iument. Et apres quelque espace de temps quil y eut demoure et fort bien estudie en tous les sept ars liberaulx, Il disoit que cestoit une bonne ville pour vivre, mais non pas pour mourir : car les guenaulx de sainct Innocent se chauffoient le cul des ossemens des mors. Et trouva la librairie de sainct Victor fort magnifique, mesmement daulcuns livres quil y trouva, comme Bigua salutis, Bragueta iuris, Pantoufla decretorum, Malogranatum viciorum, Le Peloton de theologie, Le Vistempenard des prescheurs, compose par Pepin, La Couillebarine des preux, Les Hanebanes des evesques, Marmoretus de babouynis et cingis cum commento Dorbellis, Decretum universitatis Parisientis super gorgiasitate muliercularum ad placitum, Lapparition de saincte Geltrud a une nonnain de Poissy estant en mal denfant, Ars honeste petandi in societate per M. Ortuinum, Le moustardier de penitence, Les houseaulx, alias les bottes de patience, Formicarium artium, Le cabatz des notaires, Le pacquet de mariage, Le creziou de contemplation, Les Faribolles de droict, Laguillon de vin, Lesperon de fromaige, Decrotatorium scholarium, Tartarerus de modo cacandi, Bricot de differentiis soupparum, Le Culot de discipline, La Savatte de humilite, Le Tripiez de bon pensement, Le Chaudron de magnanimite, Les Hanicrochemens des confesseurs, Les Lunettes des romipetes, Maioris de modio faciendi boudinos, La cornemuse des prelatz, Beda de optimitate tripatum, Le Maschefain des advocatz, Le Ravasseux des cas conscience, Sutoris adversus quendam qui vocaverat eum friponnatorem, et quod fripponatores non sunt damnati ab ecclesia, Cacatorium medicorum, Le Ramonneur dastrologie, Le tyrepet des apotycaires, Le Baisecul de chirurgie, Antidotarium anime. M. Coccaius de patria diabolorum, dont les aulcuns sont ia imprimez, et les aultres lon imprime de present en ceste noble ville de Tubinge.