CLX. - CLXI.

Pour ce que sçait bien mon entente, Jehan de Calays, honnorable homme, Qui ne me veit des ans a trente, Et ne sçait comment je me nomme, De tout ce Testament, en somme, S'aucune y a difficulté, Oster jusqu'au rez d'une pomme Je luy en donne faculté.

De le gloser et commenter, De le diffinir ou prescripre, Diminuer ou augmenter; De le canceller ou transcripre De sa main, ne sceust-il escripre; Interpreter, et donner sens, A son plaisir, meilleur ou pire; A tout ceci je m'y consens.