XVI INTRODUCTION

pies de grandes meschancetez de nostre siècle par moy alléguez. En laquelle objection ou reprehension les uns se montrent bien plus impertinens que les autres. Car les uns en parlent comme si j'avois choisi pour mon plaisir tels contes plutost qu'autres. En quoy ils se discouvrent ou fort lourdaux, ou calomniateurs manifestes : lourdaux, s'ils n'apperçoivent point que mon argument avoit besoin de tels exemples : calomniateurs manifestes, si l'appercevans, ils font semblant de n'en rien voir. Les autres confessent bien qu'ayant à traiter un tel argument, il m'en faloit venir là, mais qu'il valoit mieux ne le point entreprendre, à-fin de ne point renouveler la mémoire de telles histoires. Ausquels je respondray ce mot seulement pour ceste heure, (les renvoyant quant au reste à la response qui est où je vien de dire) qu'ils ont en ceci à disputer contre plus forte partie qu'ils ne pensent : d'autant que telles histoires esquelles est dépeinte la meschanceté du cueur humain, ne se trouvent point seulement es auteurs profanes, mais aussi sont authentiquement enregistrées es saincts et sacrez livres de la Bible. Et pourtant il-y-a bien plus d'apparence en ce qu'aucuns objectent : c'est que je n'ay-pas mal faict d'escrire telles histoires, mais que j'eusse mieux faict si j'eusse ajousté de celles qui contiennent exemples des vertus. Lesquels je prie avoir souvenance de ce que j'ay dict au commancement de cest avertissement, où j'ay accomparé mon livre à un bastiment imperfaict, voire bien peu avancé : et considérer qu'en bastissant j'ay gardé la place au corps de logis qu'ils demandent, lequel, selon mon dessein, doit nécessairement estre à part.

Il y en a qui ne se plaignent d'aucuns des points mentionnez ci-dessus, mais de cestuy-ci : c'est qu'en quelques histoires je n'ay pas esté bien informé des circonstances par le menu. Ce que je pense bien se