CHAPITRE XV

de produire un François et un Poulonnois, qui semblent pour semblables actes (c'est à dire partans de semblable hardiesse) non seulement mériter d'estre de sa cour, mais de succéder à sa couronne. Le François est un natif de Saumur sur Loire, lequel ayant la mesme industrie que celuy duquel je vien de parler, sçeut si bien contrefaire les lettres et seaux du Roy, que par ce moyen monstrant des commissions extraordinaires qu'il disoit avoir de luy, tira grans deniers de plusieurs receveurs : pareillement recueillit grand argent de la vendition de quelques biens estans du domaine du Roy, et nommeement de quelques coupes de bois : jusques à ce qu'estant descouvert, il passa le mesme pas que le roy des larrons susdict; et comme cestuy-làfut pendu en habit de cardinal, aussi cestuy-ci en habit de gentil-homme, à Paris, devant l'église des Augustins, du temps que la Cour de parlement s'assembloit en ce convent, il y a environ seize ans (i). Or ont pensé quelques-uns que cestuy-ci ait esté celuy mesme qui par le moyen d'un sien larrecin fort notable et mémorable, donna des advertissemens au roy François premier de ce nom, de ce que tramoyent l'empereur Charles et le roy d'Angleterre contre luy : et non seulement luy en donna des advertissemens, mais luy apporta les mémoires propres, les instructions et les lettres. Car ayant rencontré par le chemin un gentil-homme Flamend allant en Angleterre, et s'en estant accosté, en se disant estre du mesme pays, picqua avec luy jusques au lieu où il falloit passer la mer. Et là le Flamend s'estant mis à reposer en attendant la commodité du passage, ce François, qui en

(i) « La peste ne laissa pas de faire des progrès dans la conciergerie... et le parlement ne pouvant plus tenir ses séances en seureté au palais, ordonna le 17 aoust (1548) qu'il se transféreroit aux Augustins... » Voy. Felibien, II, 1028, et IV, 742.

avoit le premier tenu propos, et faisoit semblant d'estre bien endormi, se levant tout doucement s'en alla faire provision d'une malette pareille à celle du Flamend (laquelle il avoit laissée sur la table), et l'ayant trèsbien emplie de paquets de beau papier blanc jusques à égalité du poids de l'autre, la mit en la place d'icelle. Ce qu'ayant faict, esveilla le Flamend, luy disant qu'il avoit oublié quelque affaire, pour lequel il luy cstoit besoin de tourner bride, et qu'il le supplioit de ne prendre en mauvaise part s'il luy rompoit compagnie. Le Flamend, qui n'entroit en aucun souspeçon pour tel changement d'avis, mais pensoit qu'il y allast à la bonne foy, ne sceut faire autre chose que le remercier de sa bonne compagnie et après grandes accolades le recommander à la garde de Dieu; et de sa part se remit à dormir, ne laissant toutesfois plus sur la table sa malette (c'est à dire une malette qu'il pensoit estre la sienne), mais l'ayant faict mettre derrière son chevet. En quoy le povre homme resembloit celuy qui ferma l'estable quand les chevaux s'en furent fuys. Car le François galopoit cependant en toute diligence avec la malette, laquelle le Flamend devoit avoir mise soubs son chevet avant que commencer à dormir, ou bien encore plus seurement. Or si le François apporta un présent aggréable au roy de France, encore que ce fust un larrecin, si au contraire le Flamend apporta piteuses nouvelles au roy d'Angleterre, chacun le peut assez penser. Aucuns disent qu'il luy fit trencher la teste, disant qu'il le vouloit faire servir d'exemple à ceux qui se mesleroyent des affaires des princes, de s'y gouverner plus finement. Voilà le bon tour qu'on dit avoir esté joué par le mesme personnage duquel nous avons tantost descrit le mauvais tour, tous deux jouez à un mesme prince. Que s'il estoit ainsi, quelcun pourroit penser que ce gentil ouvrier de larrecins se