CHAPITRE XV

vouloit autant porter de proufit aux despens du Roy par ses larrecins derniers, comme il avoit porté de proufit audict seigneur par l'un de ses premiers. Mais plusieurs ont opinion que les deux tours soyent de deux boutiques. Quoy qu'il en soit, je n'ay pas voulu faire moins d'honneur à l'un qu'à l'autre. Je vien maintenant au Poulonnois, nommé Florian, lequel ne doit rien h cestuy-ci en matière de hardiesse : car, par la mesme industrie que nous avons attribuée aux deux susdicts, ayant contrefaict les lettres et seaux du roy de Pouiongne, s'en alla en Angleterre comme embassadeur du roy : où il demoura assez long temps, estant respecté et honoré selon que méritoit celuy qui tenoit un tel lieu ; et là il n'oublia d'employer le crédit dudict roy (qui le faisoit cercher pour le faire pendre) à divers larrecins : comme aussi il avoit faict devant, et fit encore depuis, à l'endroit de plusieurs personnages d'autorité.

J'adjousteray encore un exemple de larrecin (combienque j'eusse délibéré de faire fin), non pas comme estant conforme aux trois derniers ou à quelcun des autres précédens, mais au contraire, comme n'ayant rien de commun avec aucun d'iceux, et pour çeste raison estant d'autant plus nécessaire : à-fin qu'on voye que nostre temps ne se peut pas vanter seulement de plusieurs nouveaux tours de larrecins, mais aussi de tous ceux desquels les histoires font quelque mention. Car ici nous verrons un exemple d'un larron desrobbant l'autre. Il y a un an et quelques mois qu'en une hostelerie de Paris un marchand, ayant mis en un buffet une grosse somme d'argent, qu'il avoit eue de la vente de sa marchandise, fut apperceu par un serviteur du logis. Lequel ayant espié l'occasion, l'ouvrit, et luy desrobba deux sacs, l'un plein d'or, l'autre d'argent. Et d'iceux estant chargé, s'en alla environ deux

lieues pardelà Paris, sur le chemin de Montargis. Estant arrivé le soir en une hostelerie bien las, pria l'hoste de luy pourvoir d'un cheval pour le lendemain matin. A quoy l'hoste luy ayant faict response qu'à grand' difficulté on en trouveroit, après plusieurs offres promit jusques à un escu pour le louage d'un cheval Jusques à la disnée seulement. Laquelle offre si libérale donna souspeçon à l'hoste, joinct qu'il apperceut les sacs : tellement qu'il l'asseura lors d'un cheval pour le lendemain matin. L'ayant donc mis à cheval dès le point du jour, et d'avantage l'estant allé accompagner jusques 'au lieu qui luy sembla le plus propre pour l'arrester, luy donna sur le chignon du col une telle bastonnade, qu'il le renversa par terre tout estourdi : puis composa tellement avec luy (ne criant que miséricorde) qu'ayant pris telle part du larrecin qu'il luy pleut, s'en retourna ramenant son cheval. Or advint-il que l'un de ceux qui avoyent pris la poste pour courrir après ce larron, sitost qu'on se feut apperceu du larrecin, trouva cestuy-ci avec le reste de son argent, tirant contre Montargis, et l'ayant recongnu fit en telle sorte par douces paroles qu'il le fit venir jusques en un village prochain : auquel il le mit entre les mains de la justice, pour estre mené à Montargis. Auquel lieu estant constitué prisonnier, confessa le faict, et accusa ledict hoste, lequel on fit venir pour estre confronté : mais déniant le faict, et ayant esté condamné à la géhenne, en appela à Paris : où depuis on dit qu'il fut mis sur la roue, le serviteur ayant eschappé à meilleur marché, car il ne fut que pendu. Après avoir assemblé tant d'exemples de la subtilité et de la hardiesse des larrons de nostre temps, il m'est venu en fantasie d'alléguer aussi un exemple ancien pris de celuy, à l'apologie duquel (c'est-à-dire pour lequel) ce traicté sert de préparatif. Il est vray qu'en ce