CHAPITRE XV

mesme interrogation qu'aux autres, il luy raconta que le plus meschant tour qu'il avoit jamais faict, estoit d'avoir coupé la teste à son frère, qui estoit pris aux laqs dedans le cabinet du thrésor du roy; mais le plus cauteleux, estoit, qu'ayant enyvré les gardes, il avoit despendu le corps de sondict frère. Elle ayant ouy ces nouvelles, jetta la main sur luy, le pensant prendre : mais le galand luy présenta la main du mort, d'autant qu'on n'y voyoit goutte ; de sorte que cependant qu'elle cuidoit luy avoir empoigné la main et la tenir, il s'enfuyt par la porte, luy laissant faire de ladicte main ce que bon luy sembleroit. Ceci estant pareillement rapporté au roy, il fut estonné tant de la finesse comme de la hardiesse de l'homme, et finalement envoya messagers par toutes les villes, faisant crier de par le roy que non seulement il donnoit la grâce au larron, mais luy promettoit grans présens s'il se venoit présenter à luy. A quoy le larron se confiant, le vint trouver. Rampsinit l'ayant en grand' admiration, luy donna sa fille en mariage, comme au mieux avisé de tout le monde : d'autant que les Égyptiens emportoyent l'honneur pardessus tous autres hommes (en cas de bon esprit), mais luy l'emportoit pardessus tous les Egyptiens. Voilà l'histoire telle qu'elle est racontée par Hérodote, autant qu'il m'a esté possible d'approcher de ses paroles, en retenant la propriété et la grâce de nostre language, qui est une chose autant malaisée qu'en aucun autre auteur Grec, pour plusieurs raisons lesquelles il n'est pas besoing de déduire pour le présent. Mais cecy ne dissimuleray-je pas, c'est qu'en traduisant ce passage, j'ay pris garde à plusieurs fautes commises en la traduction d'iceluy par Laurent Valle, lesquelles toutesfois je n'ay point corrigées en l'édition d'icelle. Dequoy on ne se doit beaucoup esbahir, veu que j'ay confessé en la préface mise au devant de la-

dicte édition que J'avois laissé grand nombre de fautes à corriger : veu aussi que la diligence est sans comparaison plus grande à csplucher un texte quand on le veut traduire soy-mesme, que quand on corrige tellement la traduction d'autruy, qu'on s'efforce de luy sauver son honneur le plus qu'on peut : et mesmement quand on le fait à la haste, comme plusieurs sçavent qu'il m'est advenu. Et toutesfoys je ne nie pas qu'il n'y ait quelques endroits de ceste histoire en la traduction desquels je n'ay peu me satisfaire : et sçay bien qu'encore moins satisferay-je à ceux ausquels Dieu a faict la grâce d'entendre l'auteur en son language naturel. Mais je me fie en une chose, c'est que ceux qui y seront le mieux versez, et par conséquent appréhenderont mieux les difficultez contre lesquelles il a falu combattre, seront les plus aisez h contenter. Au demeurant, quant à l'argument de ceste histoire, il est tel qu'il m'a semblé que place luy estoit deue et quasi jh faicte en ce lieu : car nous voyons qu'elle est escrite d'un larron auquel l'auteur attribue ces deux singularitez qui nous ont esté jà monstréesès exemples précédents en ceux de nostre temps, à sçavoir trèsgrande finesse avec très-grande hardiesse. En quoy nous pouvons congnoistre combien sert de conférer les histoires ensemble, et notamment celles d'un temps avec celles de l'autre. Car au lieu que de prime face la finesse et la hardiesse de ce larron ancien pourroyent sembler incroyables : en les conférant avec ce qui a esté dict des fins et hardis larrons de nostre temps, elles se trouveront n'estre dignes de grande admiration. Et au regard de ce qu'il raconte du roy qui eut bien le courage de. prostituer sa fille, je confesse que c'est une narration fort estrange : mais pour laquelle toutesfois on ha grand tort de blasmer tant Hérodote comme j'ay ouy plusieurs s'attacher à ce passage prin-

cipalement), veu que luy-mesme proteste qu'il n'y adjouste pas foy, mais qu'il la donne pour telle qu'on luy a donne'e. Et toutesfoy en un besoing j'espérerois pouvoir alléguer des histoires lesquelles ou il faudroit. tenir pour mensongères, au lieu qu'on les tient pour véritables, ou confesser ceste-cy estre pareillement vraysemblable.

Or en mettant par escrit ceste histoire d'Hérodote, m'est venue en mémoire un' autre, d'un larron ou plustost brigand, plus hardi sans comparaison que celuy qui est mentionné par ledict auteur, et autant pour le moins qu'aucun de ceux de nostre temps dont les actes ont esté récitez parcidevant. Voici donc que raconte Dion l'historien (i) d'un larron ou capitaine de larrons qui fut du temps de l'empereur Sévère, environ cent nonantecinq ans après la nativité de nostre Seigneur. Un Italien nommé Bulas, ayant amassé une troupe de sixcents larrons, fit grans brigandages par le pays d'Italie, l'espace de deux ans, nonobstant les empereurs et le grand nombre de gendarmerie qu'on y avoit. Car plusieurs le cerchoyent, d'autant que l'empereur Sévère avoir fort à cueur ceste poursuite : mais luy faisoit en sorte qu'en le voyant on ne le voyoit point, en le trouvant on ne le trouvoit point, en le tenant on ne le tenoit point : tant par le moyen de la libéralité de laquelle il usoit, que des finesses qu'il sçavoit jouer. Car il avoit advertissemens touchant un chacun de ceux qui sortoyentde Romme, etabordoyent à Brunduse (qu'aucuns appellent aujourd'huyBrendis), combien et de quelle qualité ils estoyent, et quelles facultez ils avoyent : tellement qu'il donnoit inconti-

(i) Ou plutôt Xiphilin, son abréviateur du xi« siècle ; voy. Epitome. liv. LXXVI, ch. 10, éd. Dindort, ou bien: E Dione excerptœ historiœ ab J. Xiphilino. exe. H. Stephanus, 1592, p. 237. Le récit doit être placé à l'année 204.

nent congé à aucuns d'eux, après leur avoir pris une partie seulement de ce qu'il leur trouvoit : et quant aux artisans, il les retenoit quelque temps, et après s'estre servi d'eux, leur donnant quelque récompense, les laissoit aller. Et une fois ayant entendu que deux de ses gens devoyent estre exposez aux bestes, s'en vint au geôlier, et luy ayant faict a-croire qu'il estoit le prévost du lieu, et pourtant avoit besoin de quelque nombre de tels hommes, se fit mettre entre les mains ces deux. Et puis estant venu trouver le capitaine qui avoit la charge de desfaire luy et toute sa troupe, s'accusa luy-mesme, comme estant un autre, et promit s'il le vouloit suyvre, de luy livrer le larron. Et ainsi l'ayant amené en une certaine vallée sous espérance de luy faire prendre Philix (car ce Bulas estoit ainsi surnommé), se saisit aiseement de luy-mesme; et puis s'estant assis en un siège judicial, contrefaisant le prévost, et ayant appelé ce capitaine, le tondit, et luy dict : « Adverti tes maistres qu'ilz nourrissent leurs I) serfs, afin qu'ils ne soyent point larrons. » Car il avoit grand nombre des serfs de l'empereur, les uns sans gages, les autres à petits gages. Lesquelles choses le dit empereur Sévère entendant par le menu , se choléroit fort de ce qu'emportant la victoire de ses ennemis en Angleterre par autres, luy estant en Italie en personne, estoit vaincu par un brigand. Et en la fin donna ceste commission à un de sa garde, envoyant avec luy grosse cavalerie, et le menaçant bien fort s'il ne l'amenoit vif. Cestuy-ci ayant telle charge, après avoir entendu que ledict brigand entretenoit une femme, la fit persuader par son mari de leur vouloir aider, avec toute asseurance. Et par ce moyen fut pris ce brigand pendant qu'il dormoit en une caverne. Lors Papinian, qui estoit gouverneur de la province, l'ayant interrogué pourquoy il brigandoit : — « Et vous » (dict-