CHAPITRE XrX 41 I

elle de luy : tellement que comme malcontente de ce qu'il se marioit en France avec la fille (i) du roi Charles septiesme, qui de présent s'appelle la princesse de Vienne (qui estoit contre ce qu'il avoit promis), elle l'empoisonna en un bain, en luy donnant à manger d'une pomme ; et mit la poison au manche du couteau. » Telles sont ses parolles, et faut noter qu'il parle du roy de Hongrie, qui fit mettre en prison Matthias (2) qui depuis fut roy, ayant premièrement faict tuer le frère aisné d'iceluy. Or pouvons-nous penser quelles noces ceste femme eust faictes à l'espouse de ce roy, si elle l'eust eue en sa puissance.

Mais pour retourner aux très-cruelles vengeances, nous en lisons un fort notable exemple es escrits du mesme Pontanus, lequel il semble alléguer comme chose avenue de son temps. Un esclave Maure ayant esté à demi assommé de coups par son maistre (3), s'avisa de ce moyen pour se venger de tel outrage, et pareillement mettre fin à sa misérable condition. Ayant espié le temps que son maistre estoit allé assez loing de sa maison des champs, il barra la porte le mieux qu'il put ; et puis ayant lié bien estroitement la femme d'iceluy, il mena avec soy leurs trois enfans au plus haut de la maison : où les ayant, il attendit la venue de son maistre. Lequel à son retour trouvant la porte ainsi barrée, commença à menacer son esclave, qui s'estoit monstre à luy dedessus le toict. Alors l'esclave : — « Je te feray bien tantost, » dit-il, « parler autre lan- » guage. » Et sur cela luy jetta deux de ses enfans du

(i) Madeleine, mariée depuis à Gaston de Foix.

(2) Mathias Corvin, fils de Jean Hunniade, élu roi de Hongrie à l'âge de quinze ans, après la mort de Ladislas VI.

(3) Don Riviero, gentilhomme espagnol de l'île de Majorque. Voy. Simon Goulart, Histoires admirables et mémorables. Paris, 1600, 2 V. in- 12, 1. 1, p. 507. Cf. Bandello, HI, 21.

haut en bas. Le povre père ayant demouré quelque temps tout esperdu de ce spectacle, et plus mort que vit, quand il commença à revenir à soy, s'avisa de luy user de douces paroles, et de luy promettre non seulement pardon des deux meurdres jà commis, mais aussi de le mettre en liberté : à fin que pour le moins il luy sauvast son troisième fils. A quoy respondit l'esclave : — « Tu as beau me faire des promesses : je ne feray » rien pour tout cela, sinon que tu te coupes le nez. » Ce povre homme, pour sauver ce troisième fils, accepta ceste condition, et se coupa le nez. Mais il ne l'eut pas plustost coupé, que l'esclave luy jette encore du haut en bas ce troisième fils ensemble avec la mère. Et quand il eut faict tout cela, voyant son maistre se tourmenter d'une façon estrange, et l'oyant jetter des cris horribles : — « Tu as beau faire, » dit-il, « si est-ce » que je te garderay bien de te venger de moy. » Et après ces mots se précipita aussi du plus haut du toict.

Or combien que la cruauté soit très-grande en telles vengeances, si est-ce qu'ell'est comme redoublée par ceux qui en la vengeance qu'ils font de leurs ennemis, enveloppent aussi ceux qui n'en peuvent mais : comme il y a environ seize ans qu'en une ville d'Italie (à Boulongne, si j'ay bonne mémoire), se trouva un homme si furieusement désireux de vengeance, que ne trouvant autre moyen, il mit en la cave de la maison de son ennemi force poudre à canon, et puis le feu : et ainsi fit renverser la maison : où avec son ennemi furent tuées plusieurs autres personnes. Aussi sont aucuns doublement cruels qui, au lieu de se venger de ceux qui leur ont faict ou dict outrage, ou l'ont faict faire ou dire (soit qu'ils soyent morts, ou soit qu'on ne s'ose attacher à eux), exercent la vengeance sur ceux qui n'en peuvent mais, pour ce seulement qu'ils