INTRODUCTION XV

très) : mais que ceux qu'ils sçavent, soient beaucoup plus esmerveillables, je ne leur accorde point. Car entr'un grand nombre de contes appartenans à chacun point que j'avois à traiter, j'ay choisi ceux qui par l'opinion de plusieurs juges competens se trouvoyent les plus admirables (j'excepte seulement quelques endroits où je n'avois si bien à choisir.) Mais qui eust voulu contenter telles gens, il eut falu tout mettre, au lieu qu'au gré de quelques autres je scay en avoir trop mis, et trop au long. Et toutesfois, pour abbreger, j'ay serré en demie page tel conte qu'on avoit estendu en deux entières. J'ay regret toutesfois que je n'ay esté encore plus bref et plus retenu en quelques contes de lubricité, et que je me suis laissé porter si avant au fil du propos. Mais j'ay depuis changé la plus grand'part de tels passages par le conseil de quelques miens bons seigneurs et amis, en rimprimant les fueilles où telles choses se trouvoyent.

J'ay aussi entendu que certains médecins et chirurgiens avoyent esté offensez de quelques contes que j'ay faicts d'aucuns de leur art : mais je les prie considérer que quand on dit qu'il y-a quelques médecins ignorans, et autrement malversans en leur vacation, on donne à entendre que tous ne sont pas tels, ains qu'il y-en-a d'autres au contraire qui ont bon sçavoir et en usent bien. Et qu'ainsi soit que je ne vueille point de mal à l'art de médecine, et que je n'ay entendu de parler en gênerai de ceux qui en font profession, je leur en donneray de bonnes enseignes en peu de temps (au plaisir de Dieu) par un ouvrage, lequel, comme j'espère, pourra aiseement faire ma paix avec eux : et cependant je me contenteray de trêves.

Je scay qu'il y-a d'autres objections qu'on fait contre mon livre : la principale desquelles ayant bien preveue, j'y ai respondu amplement en quelques endroits d'iceluy : à-sçavoir à celle qu'on fait touchant aucuns exem-