LL

Chartrier de Thouars. Original. .

1474, 1“ mai. Senlis. — Lettre du sire de Craon à maître Morelet de Museau, secrétaire du Roi.

Maistre Morelet, je me recommande à vous. J’ay recue les cinq cens francs que m'avez envoyé par Rellay, et suis tout esbahy que

ne m'avez envoyé toute la somme ; car j’entens bien que la demy année de l’une des parties est passée, de l’autre partie il en y a ung quartier escheu. Je ne le vous déclaire autrement pour ce que vous l’entendez mieulx que moy. Si vous voulez dire qu’il y a retardement, pour ce que le roy s'aide des premiers deniers, à cela je vous respons que, quant je sèroie bien seur que le receveur poyeroit au bout du terme des quartiers, ainsi qu’ilz doivent faire par raison, je n’y vouldroye autre receveur que moy-mesmes. Vous entendez bien ce que je veulx dire. Au surplus, je croy que vous entendez assez que je ne suis pas prest à partir de ce pays yci, et qu'on n'y vist pas pour néant, et aussi congnoissez la despence que je maine; par quoy je ne me puis trop esbahir que n’avez eu autre regard à m'envoyer toute la dicte somme. A ceste cause, envoye Martin devers vous, pour vous prier que vueillez monstrer la raison de vous-mesmes telle que j'ay ma fiance ; car vous porrez assez entendre que les cinq cens francs que m'avez envoyez ne sont que pour trois sepmaines ou ung moys, et je ne suis pas yci en lieu pour en recouvrer à mon aise.

Et adieu, maistre Morelet, qui vous doint ce que désirez. Au surplus, croyez Martin de ce qu'il vous dira.

Escrit à Senlis, ce premier may.

Le vostre, : CRAON.

Chartrier de Thouars. Original.

1474, 2 mai. Senlis. — A maïstre Morelet de Museau.

Maistre Morelet, je me recommande à vous ; j'ay veu voz lectres par lesquelles je congnoys ;vostre bon vouloir. J'envoye Perrinet devers vous pour m'apporter les cinq cens francs que m'avez mandé et vous asseure que si ne feust la grant nécessité que j’ay de par deça pour les afaires du Roy, comme vous scavez assez, je ne vous presasse pas si fort. Et vous dépeschez moy mon homme le plus tost que pourrez. Et adieu, maistre Morelet, qui vous ait en sa garde.

Escript à Senlis, le n° jour de may.

Le vostre,

CRAON

Chartrier de Thouüars. Original.

1474, 13 juin. Compiègne. — À maistre Morelet de Museau, notaire et secrétaire du Roy.

Maistre Morelet, je me recommande à vous. Vous savez la reste de l'argent que me devez du terme de Pasques ; il me semble qu'il

est temps que vous le m’envoyez, c’est signe que ne m'en avanceriez pas, puisque ce qui m'est deu passe à deux moys, je ne le puis avoir de vous. Je croy bien qu’il n’est plaisir que ne me voulsissiez faire sans bourse deslier. Jay appoincté de la terre que savez, et fault que je baiïlle quinze mille escus contens dedans le xxvin‘ jour de ce moys à Chartres. Et, pour ce, je vous prie, sur tout le plaisir que jamais vous me vouldriez faire, que la reste dessus dit et aussi le terme de ceste Saint Jehan soient prest au dit terme pour m'en ayder à mon grant besoing que vous congnoissez bien. Je vous prie, ne soyez point cause de me faire perdre ce grant bien yci, car si je y faults à ce cop peut-estre que je n’en recouvrerè jamais ung sol. Je ne vous requiers mon argent que au terme que m’avez promis. Je vous prie, tenez vostre promesse en telle façon que dommaige ne m'en puisse advenir, car il me seroit trop grant et inréparable, et l'argent que vous bauldrez à Pierre de Sallignac, en prenant certifficacion de luy et la rapportant à voz comptes, je vous en tiendray quicte. Et adieu, maistre Morelet, qui vous ait en sa saincte garde. Escript à Compiègne, le x jour de juing mil cccc xx. Le vostre, CRAON.

Chartrier de Thouars. Original.

1474, 28 juin. Ermenonville. — À maistre Morelet de Museaux, notaire et secrétaire du Roy.

Maistre Morelet, je me recommande à vous. Je vous prie que ne vueillez point faire de faulte que ne m'envoyez ou m'’apportez l'argent de quoy dernierement je vous ay escript, car j'ay appoincté tout mon fait et ne reste plus à faire que le poyement, et n’ay plus ralonger le terme de baïller ledit argent que jusques au vj* jour de juillet. Je ne vous en escriptz autre chose, car, par mes dernières lettres, je vous en ay escript assez au long ; toutesfoys je vous prie

‘que monstriez à ceste foy de combien vous estes mon amy. Se vous baillez ledit argent à Pierre de Sallignac, en prenant quictance de luy, je vous en tiendray quicte; et vous prie que ainsi le vueillez faire. Et adieu, maistre Morelet, qui vous doint ce que désirez.

Escript à Armenonville, le xxvin* jour de juing.

Le vostre, CRAON.

Chartrier de Thouars. Original.

1474, 5 juillet. Meaulx.— Commission par Louis XT au sire de Craon, pour informer quels octrots ont été faits aux habitants de

Joigny.

Loys, par la grâce de Dieu, roy de France, à nostre amé et féal cousin le seigneur de Craon, chevalier de nostre ordre, nostre lieutenant en Champaigne, salut et dilection.

Comme nous ayons esté advertiz que, par cy devant, ont esté par nous faiz plusieurs dons et octroiz d'aides et subcides aux manans et habitans de la ville de Joigny, pour les deniers d’iceulx dons, aides et subcides convertir et emploier à la réparacion et fortifficacion de la dite ville de Joigny, pour lesquelz deniers recevoir et les emploier en ce que dit est, ont esté commis et ordonnez aucuns habitans de la dicte ville en quoy que soit ont esté iceulx aides cueilliz et levez par iceulx habitans, montans à grant somme de deniers, sans les avoir emploiez ès dites réparacions et fortifficacions ne ès autres choses contenues ès lettres des dits octroiz, ne d’iceulx deniers rendu aucun compte ne reliqua, aincoys les détiennent et récellent et s’en aident en leurs propres et privez affaires. Pour laquelle cause, la dite ville qui est de présent en frontière des Bourgoignons, noz rebelles et désobéissans subgectz, est demeurée comme du tout désemparée et despourvue de bonne et seure fortifficacion, comme dit etremonstré nous a esté.

Savoir vous faisons que nous, ce considéré, voulans la vérité

de ceste matière estre seue et les deniers, provenuz d’iceulx aides et qui seront trouvez estre deuz par la fin des comptes de ceulx qui en ont faicte la recepte et despence, estre emploiez en toute dilligence ès dites réparacions et fortifficacions, pour obvier aux inconvéniens qui, par faulte d'icelles, pourroient avenir à nous et à la dite ville, vous mandons et commectons, par ces présentes, que vous vous informez ou faictes informer dilligemment, secrètement et bien, quelz octroiz ont esté faiz aux dits habitans de la dicte ville de Joigny, quelz deniers en sont provenuz et yssuz et par quelles personnes ilz ont esté receuz, et tous ceulx que, par la dite informacion ou autrement deuement, vous trouverez avoir eu l’administracion et mêmement des dits deniers, contraignez ou faictes contraindre, réaument et de fait par toutes voyes et manières deues et en tel cas requises, à en rendre bon compte par devant vous ou voz commis et deppuctez, et à bailler le reliqua qui sera trouvé estre deu par la fin d'icelui compte ès mains d'aucun homme notable de la dite ville, preudomme, recéant et caucionné, lequel nous voulons estre à ce par vous commis pour icelui reliqua estre par lui converti et emploié ès dites fortifficacions et réparacions et non ailleurs, nonobstant opposicions ou appellacions quelzconques, par lesquelles ne vouons estre en ce aucunement différé. De ce faire, vous donnons pouvoir, et mandons et commandons à tous noz justiciers et subgectz que à vous, £n ce faisant, soit par eulx obey.

Donné à Meauix, k cinquiesme jour de juillet, l'an de grâce mil cccc soixante quatorge et de nostre règne le XIII".

Par le Roy, AURILLAC.

Chartrier de Thouars. Original.