CHAPITRE LXXXI

Comment la ville de Meaulx fut également délivrée au roy anglois. |

Or avoit-il eu long machinement sur la ville de Meaulx, dont le marchié souverainement estoit une place de grand force à avoir, et luy donnoit de l'annuy assez pour ce qu'elle se tenoit en son contraire. Si disposa de son ost à tirer là envers et d'employer la saison en y mectre siège, nonobstant que le temps approchoit jà sur l’yver et estoit la fin de septembre. Toutesvoies, pour exécuter ce que delibéré avoit, vint logier à Laïgny sur Marne qui se tenoit pour luy; et là par aulcuns jours fit sa résidence, pendant les quels fit faire et charpenter plusieurs engins dont grever pensoit la dicte ville , et par especial engins volans, comme plus nécessaires à son intencion. Tousjours certes besoingneit et employoit temps en fruit et necessités ; il y pourvéoit et subtilloit en ses aflaires les plus convenables et surtout avoit l'oeul. Par quoy, pensant que ses ennemis dedens Meaulx ne se doubtassent d'estre assiégiés, et que à ceste cause ne boutassent le feu en leurs faulbours, premier que y arriver, envoya son oncle le duc de Cestre avecq quatre mille combatans devers ladicte ville , affin de soy bouter dedens les dits faulbours et de les garder; car moult luy eust porté dommaige leur destruction. Le duc de Cestre ne demoura gaires après ceste ordonnance qu'il ne se mist ès champs et qu'il n’allast exécuter le commandement de son roy, dont il viendroit bien à chief, ce luy sembloit. Et de faict y alla, et la print soubdainement sans barguigner; et lagarda tellement que ses ennemis en eurent deul et luy joye, combien toutesvoies que, à l’abborder, assez s y opposèrent. Les menassés s'assaièrent à defendre le logeis; mais ce ne leur valut riens; car trop puissans estoient les Angloiset les aultres trop foibles, qui n'avoient deffence que de leurs lances pour venir joindre au corps , et les Anglois fiers et horribles de traict pour les en chasser de loing sans main mise. Les faulbours doncques demourèrent saisis du duc de Cestre, dont

le roy son nepveu estoit bien joyeux. Lequel, après avoir ses besoingnes bien apprestées, party de Laigny, luy ettout ost, en nombre environ de vingt mille combattans ; et le sixième d'octobre vint planter son ost tout à l'entour de la dicte ville et du marchié ; et de celle heure en avant tousjours labouroit en faire foruflier son siège de hayes et de bons fossés par derrière luy, pour non estre surprins par nuyt d'aventure par ses ennemys, dont, comme saige guerroier, il redoubtoit les agües et les machinemens, disant qu'il n'est nul petit ennemy, mais assez se doivent peser. De ceulx cy me deporteray, et tant de ce siège un petit encoires, et de la manière deses approches et puissans apprestemens à tous lez de l'artillerie qui se dressoit, jusques jà tost que j'en reprendray à parler tout au plain, là où la vaillance des deux parties et le long persévérer mais, doit estre cause d'en escripre; et recherrai à parler maintenant du duc bourguingnon et de l'appoinctement qui fust fait entre ses prisonniers et luy , eulx estans dedans le fort chastel de Lille.