LA
pareille, avoit quinze pages derrière ly; des quels il faict ymaginer assez, si les aultres barons et vassaulx estoient en riche point avecques leurs pages, que ceulx icy le debvoient bien estre plus et de plus grand réputation. Et certes, par ce que on m'en rapporta et que j'en vis par escript, c'estoit une chose admirable et non veue ghaire pareille en ce royaulme.
Après le duc, vint et entra le comte de Charolois son fils, qui pareillement avecques sa noble compaignie, chevaliers et escuyers, thira les cueurs et les yeulx en admiration de son riche arroy, là où drap d'or et d'orfévrie, velours et brodures se monstroient espandus. Et avoit ycelui comte dix pages et six vingt archiers habilliés et en point à l’advenant de l'oeuvre et du cas; et estimoit-on ceste compaignie trois cens chevaulx.
Après ly entra le comte de Nevers, à tout sa noble compaignie aussi, qui autant fist selon son possible que les aultres et en telle qualité et manière. Pareillement fist son frère Île comte d'Estampes qui avoit grand foison de noblesse avecques lui, et gens de grand bruict; et dont les grandesses et puissances là monstrées requirent autant de gloire et de tiltre comme les aultres, en l’advenant chascun; et avoient ces deux frères en leur compaignie cinq cens chevaulx ou là entour.
Et darrenièrement, pour faire queue, entrèrent messire Adolfe Clèves, lui et son estat ; et fut moult richement abillié, et tout selon la condition et manière des aultres, reservé la singularité de chascun. Et après lui sieuvirent multitude de grands barons riches et puissans, et dont la pompe n'estoit riens maindre que les aultres, ains toute thirant au plus près de l'extrême et de faire admirer gens, car estoient riches et puissans gens et de grand nom; comme messire Jehan de Croyÿ , le seigneur de Crequi, messire Philippe de Croy grand bailli de Haynnau , le seisneur de Haubourdin, cely qui se nommoit le bastard de Sainct-Pol, et pluiseurs aultres, qui tous ensemble povoient avoir quatre cens chevaulx. Et à tant se passa l'entrée de ce jour , jusques à lendemain qui fut la veille de Nostre-Dame , que arriére il convenoit faire de plus belle. avee-
ques l'entrée du roy, là où tout chascun alla au devant dudict roy pour le mener en Rains, et renouvella de couvreture et de nouvel abillement , plus riche encore que le jour devant, mais n’y alla que le duc tant seullement avecques ses nobles, sans pages et sans rien.
