CHAPITRE XXII
Comment le duc loga à son hostel d'Artois à Paris,
Le roy doncques loga à Tournelles, et là tint son estat, mais non ghaire grand; car dès son partement d'Avesnes, avoit-il dict que de la première année de son règne il ne croisteroit ne changeroit son estat aultre que tel que l'avoit tenu à Genappes, aveucques les meismes personnes à tel nombre et à tels gaiges. Si n'en sçauroye aultre chose conter maintenant, fors ce qui s'en poelt comprendre, et selon le cas auquel il povoit estre. Mais le duc de Bourgoingne en son hostel d'Artois, cellui y tint ung'estat magnificque, maison ouverte à tous venans, festiemens joyeulx et vins sans refus; ct dont la manière de faire et recepvoir gens par les maistres d’hostel, trois chevaliers, et par les commis ad cela commis , donroit plustost envie à aulcuns que plaisir en mon conte. Si m'en passe à légier, comme qui ne vouldroit grandir une si petitte chose, 1à où j'ay tant de haultes et pesans matières à traictier, et qui plus requièrent déclaration que ne font cestes. Touttesvoies che nonobstant, se convientil dire qu'oncques de mémoire d'homme on ne vit maison de prince en France , ne ailleurs , plus richement mise en point ne sy parée de chambres et de riches thapisseries comme ceste d'Artois ; là où le peuple de Paris, de toutte condition, dames et damoiselles , depuis le matin jusques au soir, vindrent et allèrent en telle multitude comme se che feust une procession ; non pour ung jour ne pour deux , mais incessamment jour sur
[ti61] CHRONIQUE DES DUCS DE BOURGOGNE. — I" PART.
jour , tant que le duc demoura à Paris. Entre lesquelles richesses y avoit deux choses qui publiquement se monstroient et dont on ne se pourroit ravoir et saouler.
L'une si estoit la thapisserie de Gédéon, la plus riche de la terre pour ce temps et celle qui touttes les aultres du monde jusques à ce jour passe et surmonte , tant en richesses comme d'ouvrage , et si grande que à paine salle du monde nulle ne la peut comprendre toutte pour y estre tendue.
Ÿ avoit encoire une aultre chose ammirable à regarder et non oncques veue ne concheue pareille. C'estoit ung pavillon en manière de tente, que le duc avoit fait tendre en une court soubs le cler ciel, là où tout le monde povoit venir. Et estoit ycellui pavillon si riche et si somptueulx en estoffes et en ouvrages qui le faisoient resplendir, que j'ayme mieulx la beauté de ly et sa richesse non descripre que d'en faire mention. Car il sembleroit que tousjours me vouldroye arrester plus volontiers sur les besongnes de ce duc que sur les aultres; mais sauve le gré d'ung chäscun non feroye. Mais se entre cent hommes d'ung seul se font cent haultes et glorieuses besongnes , d’ung seul aussi il eschiet à faire ce dont appertient autant de haulx et glorieux contes ; et me semble povreté à ceulx qui disent :« Tel et tel escript en faveur d'ung tel, et le collaude et blasonne. » Mais soubs correction de ceulx qui ainsi parlent, ou ils sont mal informés des besongnes et les ont mal enquis , ou ils ignorent les conditions de l'hystoriograffe, quelle elle est et doibt estre envers les choses qui à lui se présententent. Dont, et pour contenter chascun et assagir de cecy, je fais demande :« N'est l'hystriograffe et doibt estre vray délateur des choses, taiseur, s’il lui plaist, des cas honteux, non nécessaires à estre révélés , et prononcheur de touttes haultes glorieuses besongnes en chascune personne pour lui donner renommée ? » Doncques , et comme il est possible que entre cent hommes en ung assemblement , ung par dessus tous resplende et reluist, ung se monstre et magnifie par ses vertus et opérations, ung seul faict choses singulières et haultes , et obtient la fame et la voix, et l'affection des cuers ; ne doibt l’hys-
toriographe ce mettre par ung singulier compte , quant par jugement nniversel , il a esté escrié tel, et le cas meisme en soy a esté trouvé véritable? Responde ychy qui vouldra et dise que non, pour sçavoir se sa proppre raison bien examinée, ne le desjugera après, et l’accusera de son tort. Oyl voir! Et qui est le preud'homme greffyer, qui d'ung homme non clerc vouldra faire partir rais par son langaige, et qui de ce que oncques ne fut en effet par sa fiction menteresse vouldra former légende créable ? Moult certes seroit parvers celui. Et pareillement , qui est qui en équité chemine, qui par envie ou par non challoir d'aulcun grand, vouldra celer et umbroyer ce qui volle par l’ayr et par tous les élemeus magnifestement cler et plain de gloire ? Se escripvains labeurent pour relen: quir au monde la mémoire des choses passées, et que les malvaises se peuvent taire par courtoisie, et les bonnes divulguier par mérite..Quand doncques les grandes et les clères se voient en appert et se monstrent , et que les personnes sont à prisier dont elles procèdent, certes, si le nombre en est grand, il en convient tant plus faire de distinction; et s'il n’y a que ung seul sur qui tout tourne, sur ung seul aussi doncques convient - il faire sa pose et son arrest, non par faveur, non par flatterie ne par imprudence, mais par vérité droicturière qui constrainct le preud'homme d'avoir l'oeil ad ce que vray est, et laquelle voelt estre maintenue entre Dieu et les hommes ; et non celer par crémeur, ne pour doubte, ne pour nul à qui puist tourner à dueil, souverainnement quand elle touche à loyalle deservie renommée.
Dont, le prononcheur et qui la publie fait service à Dieu par magnifier ses créatures , èsquelles il a ouvré de ses vertus.
