CHAPITRE LXXIIL
Comment le roy Loys envoya à Bruxelles devers le dut lui requérant trois choses.
Il a esté dict devant comment le roy Loys avoit envoyé le seigneur de la Barde en Angleterre pour trouver appointement entre les deux roys, soubs couleur d'ung voyage à faire sur les Turcs, et en quoy, parce que les deux parties estoient directement en volunté incompatible et en contendement contradictoire l'ung sur l'aultre, chascun pour régner et possesser, le dict de la Barde n’y pourfitta se peu non, et s'en revint sans fruict ; et estoit dict lors que celle volunté que le roy Loys avoit lors, thirant à paix, se mueroit temprement en aultre condition , car le contourneroit à guerre eflorcée, comme chy appert, parce que la royne d'Angleterre, fille au roy Régnier, son oncle, estoit venue devers lÿ pour secours allencontre de Édouart, qui jà par moult de batailles vaincues ävoit le royaulme entre mains aveucque couronne en teste. Si lui promist le roy secours. Et à ceste cause fist grand mandement, et ban et arrière-ban sur tout son réalme, comme se grand faict voulsist emprendre et
GEORGE CHASTELLAIN
mettre à effect. Et disoient les ungs , que ce faisoit à intention de descendre en Angleterre ; et les aultres disoient que c’estoit pour aller mettre le siège à Calaix ; laquelle chose consonoit plus à vérité que l’aultre, et parce que pour ceste meisme matière, le seigneur de Nantoullet, ré;rent de Melun, avoit esté de par ly à Bruxelles faire requeste au duc, lui requérir de trois choses:
l'une que , pour mettre le siège à Calaix, il voulsist souflrir que son fils , le comte de Charolois, feust chief de l’armée; la seconde que Hollande et Zellande puissent servir de leur navire ; la tierce que son armée peust passer par ses pays en payant leurs escots et estre furny et soustenu de vivres. Parquoy doncques il appert mieulx, que c'estoit pour mettre le siège à Calais que pour descendre en Ansleterre pour celle première fois. Car au vray dire, pendant la division en Angleterre entre ces deux roys, et à la cause desquels d'un costé et d'aultres estoient ‘mors et péris presque tous les grands du royaulme , et les chiefs de guerre , il sembloit que c'estoit droictement l'heure et le point des Franchois pour envayr ceste ville et pour la thirer hors des mains des Anglois, quand par l'empeschement de leur division, le povoir n’eust esté en eulx de leur deffendre, synon que tous deulx les roys se feussent joings en ung accord, qui estoit cas impossible. Touttesvoies ne leur siège ne se mist, comme il appert, ne se fist aussi pour ycelle beure; et tout à cause que le duc de Bourgoingne estoit en trèves aveucque eulx ad cause de ses pays ; lequel, de ce que avoit scellé et prommis ne vouloit faire revocation ne enfrainte pour faveur de nulluy, comme en Paris apparu bien, là où le roy le cuida faire rompre et renonchier à l'aliance qu'avoit aveucque les Anglois, et le duc lui respondy que pour mort ne pour vie ne le feroit; et que ses devanchiers qui n'estoient point sy puissans que ly l'avoient eu tousjours; et ly tant qu'il viveroit, peur le bien de ses pays ly aroit aussi, car estoit chose opportune. Si en furent les parolles haultes entre le roy et ly.comme il a esté conté cy devant. Et maintenant encoire , parce que point ne se veult mesler de la guerre pour mettre le siège,
peult estre que l'entreprinse du roy touchant ce mandement ne sortissoit point à effect pour celle cause ; mais trop bien prommist soucours à la royne sa cousine encontre Edouart; laquelle avoit promesse du roy d'Escosse, semblablement du roy de Danemarche, d'estre servie et assistée de tout leur povoir contre le dict Edouart, et l'assail'ir de tous lez quand il seroit heure et point, aveucque l'ayde des Franchois.
Si est vray que le roy après avoir tenu en prison quatre mois messire Pierre de Brezé en son chasteau de Loches, et que riens n’avoit trouvé sur ly que toutte bonneur et vaillanche , quoy que sanchié s'en estoit par ung appétit vindicalif , disant qu'il lui feroit peur comme aultresfois la lui avoit faicte, maintenant, voyant la royne sa cousine estre en dangier et que soucours lui convenoit prester, soubs aulcune vaillant main, délibera d'en donner la charge à cestui messire Pierre, mis jà hors de prison et recheu en grâce. Et devant tous les chevaliers de France en faict de hardièce et de vaillant emprinse le réputa digne de cestui affaire, combien que aulcuns povoient ymaginer lors, pour le petit nombre de gens que lui bailla, et pour le dansyier mortellement estroit et dificille en quel il l'envoya, il l'envoyoit ainsi que, Peleus Jason en Colcos, pour en estre quitte. Jà-soit-ce que bien en prist à Jason contre le cuidier de son oncle, si fit-il ad ce chevalier aultre tel, qui d'ung destroict inopinable à rompre et à passer, pour la fraulde et la lachesté des Escos, se thira hors, le plus notable chevalier et le plus honoré qui oncques mist pieds en terre estrange. Dont, posé ores que le roy n'eust ceste ymaginacion , come je croy, si avoit-il deux causes grandes par lesquelles il devoit choisir che chevalier devant tous aultres en .ceste commission ; dont l'unesi estoit : que c'estoit celly de France devant tous qui mieulx congnoissoit les Anglois, et mieulx les sçavoit manier. Et l'aultre si estoit, que c'estoit cely seul du royaulme qui plus avoit manié et conduict les affaires de la royne et de son mary, de tout loing temps, pour et en faveur du roy Regnier, son père, dont il estoit oncle ; et lequel avoit de léal ardent amour, comme son
CHRONIQUE DES DUCS DE BOURGOGNE.—I" PART
naturel seigneur le duc d'Anjou. Et par ainsi, il, devant tous aultres du monde, estoit plus agoréable à la dicte royne et à son mary, et meismes à tous les aultres. Che party n'est touttesvoies d'oublier, que le roy, encoire pour faire tant plus secours à la royne sa cousine, ou pourtant plus esparguier ses deniers, envoya en Liège pryer qu'on lui voulsist prester cinq cens combatans payés pour six sepmaines, pour aller servir la royue d'Angleterre sa cousine , leur promettant, se tant vouloient faire pour |y, il le recongnoisteroit en temps et en lieu, et ne leur fauldroit une aultre fois en leurs affaires. Mais de sa demande ne sortit point d'effect , parce que les Liégeois s'excustrent et le contentèrent par une aultre voye, peult estre d'argent, ou par aultre don. Et comme le roy encoire avoit l'oeil dreschié en Angleterre et regardoit, che sembloit, à secourir sa cousine, néantmoins aveit aussi l'oeil envers Gennes, là où les Spinneles tenoient son parti contre les Frégouses, mais les moins fers, et l’atendant à mettre Gennes en sa main par le moyen des favourissans à lui. Si y envoy le comte de Dunrois , tout pareillement, ce disoit-on, comme le séneschal en Angleterre, pour en estre quitte. Et peulton chela insputer non tant seullement au roy, faict bon à croire, mais à ceulx d'emprès ly, aulcuns grans qui ne quéroieat point à l'avoir emprès eulx ne entour du roy, ceulx qui estuient du gouvernement et monde passé du père, gens de grand estofle; mais volloient avoir leur monde à leur thour et à leur maniance, que point n’eussent eu par adventure les aultres estans dechà; combien que le roy de ly meismes estoit pelittement enclin envers nul des serviteurs de son père, comme bons ne comme grans feussent, ne utiles pour ly, ains les avoit tous déboutés, et n'en recepvoit ung seul, si non deux auxquels avoit assis dilection ferme : Joachim Roault , lequel il fit mareschal de France, et Prigent de Melun, le fils du seigneur de la Barde , gentil chevalier aussi et homme de bonne mise.
