CHAPITRE XVIL
Comment le duc, après la remonstrance faicte par Messire Pierre de Brezé au nom de la royne!, d'ung joyeux oeil rompist le propos et mist avant devises amiables.
Le duc, après les paroles du chevalier, ‘se despeescha légièrement de y respondre; car n'accomptoit aux argumens ne aux replic-— ques qui s'en povoient faire que bien peu:
car se voyoit du tout au dessus. Mès d'ung joyeulx oeil rompit tout, et mist avant termes et devises amiables pour resconforter sa survenue , et de la quelle, fut telle comme elle disoit ou non, si en avoit il pitié, et lui desplaisoit son ennuy. Or avoit faict le duc et donné le banquet bien ricement, et avoit amené aveucques lui sans plus ceulx les quels il sentoit propres pour donner le festoy à telle dame : comme messire Adolf de Cleves, messire Jacques de Bourbon, le comte de Bryenne, le seigneur de la Roche , messire Philippe de Croy, messire Tristan de Thoulongon , le seigneur de Moreul, et plusieurs aultres ; les quels tous souppèrent au bancquet avec la royne et te duc, là où pour chief de tout le festoy estoit le séneschat, qui moult dist de joyeusetés et fit dresser vers ly tous regards par ce que tout son dire lui séoit bien sur tous aultres. Et aveucques ce que son parler estoit plaisant, si portoit-il grâce, qui en son faire estoit encore plus recommandable , et que de tels sens à tous endroits on n'avoit veu gaires sortir de plus grand effect ; car, comme j'ay dict ailleurs , gaires nul en son temps, à mectre le tout pour le tout, n’a esté trouvé pareil de luy. Moult acquit de grâce cely soir, et souverainement pour cause de la royne ; le quel fait il avoit haultement conduit en contraire fortune, et y avoit monstré vertu de hault homme, avec grosse mission à luy mal tollérable ; dont touttesvoies il ne faisoit nul regret, si non que laissié avoit environ vingt gentilshommes prisonniers de ses gens , aux quels ne povoit mettre remède pour celle heure. La royne fit chière joyeuse; et se traveilloit le duc de lui complaire en tout son pouvoir. Devisoient ensemble de plui-
Post
seurs choses , monstrans semblant de bonne amitiè, comme frères et seurs; et disoit-on lors, que comme l'ymage du duc entre toutes autres gens se monstroit seigneurieuse pour homme, où qu'oncques se trouvast, pareillement l’ymage de la royne avec son maintenir se monstra pour femme ung des beaulx personnages du monde représentant dame.
Et en effect moult estoit belle dame et entière pour lors et digne de hault regard, nonobstant que povre et austère fortune lui povoient estre cause assez ge luy amoindrir ses manières , èsquelles toutesvoies oncques ne varia ; ains venue aveucques trois femmes, aveucques ung chariot passager, se comporta et monstra telle comme quand soloit tenir le sceptre à Londres en main redoubtée, réservé qu'en honneur et devoir, selon le lieu où elle estoit, elle se monstra humble et toute plaine de sçavoir, et telle envers le duc son cousin, comme s'elle eust esté emprès le plus grand de la terre, car Le préféroit avant tous aultres.
