CHAPITRE LIL

Quel dommage importa aux pays la rendicion des terres sur Somme.

Par ceste rendicion vindrent hors des mains du duc de Bourgongne toutes les terres de deça Somme , comme : Sainct - Quentin , Amiens, Abbeville, Dourdens Monstruel, Rue, Sainct-Vallery, Crottoy, Crievequeur en Cambresis, et Mortaigne. Et ce qui plus estoit et de plus grand perte pour ,£'estoit la noblesse du pays, la quelle y perdoit, et de la quelle en temps de ses affaires s'estoit servi tousjours jusqu'à celle heure. Mès maintenant , pour cause que le roy les reprenoit en sa main comme propriétaire , il leur estoit force de eulx rendre à ly arrière et de ly faire hommage, combien que multitude d'iceulx avoient cuer fixe et rassis en leur dilection première , là où infailliblement se fussent rendus en l'estroit de l'affaire s'ils s'y feussent trouvé. Entre les quels le seigneur de Moreul, ung jour mandé pour ceste cause devant le roy, après que le roy luy avoit dist que desormès il estoit et seroit constraint de le servir envers tous et contre tous, quand besoing’ seroit, le dict de Moreul, respondit : « Sire, je cognois bien que mes terres se tiennent de vous nuement, et que vous estes mon souverain seigneur, et est bien raison que je vous serve et obéisse ; mès je ne tins oncques que ung parti, et ne congnois que ung prince par service, à qui me suis donné. Si me seroit chose estrange, si demain ou après me convenoil estre contre cely là où mon affection est as-

contes couvertement par chambres et salles, | sise. — Par la Pasque Dieu! ce dist le roy,

toutesfois conviendroit-il que vous lès feissiez, et vous et pluiseurs aultres ! — Saint- Jehan! ce dist le sire de Moreul alors, nous ne sommes pas là. Alors comme alors! mès d'ici jusques que l'on soye là, je m'y sens aultre. » Et en disant ce, partit tout murmurant, en disant entendamment à aultres: « Je renoncerai plustost à tout ce que j’ay vaillant, si à cela venoit, que je serve, contre ma nourriture, Franchois ne aultre. » Se en fust prisé à tous lez d'ung costé et d’aultre ; et notoit-on en ly signe de fermeté non muable par dissimulacion ne flatterie. En y avoit aussi des aultres qui pareillement disoient comme cely de Moreul. Mès nulluy si baudement devant le roy comme 1y; car estoit homme pour le faire et dire tout ainsy qu'il le pensoit. Le seigneur de Saveuse en dit et en pensa bien autre-tant. Et ly et beaucop d’aultres eussent bien volu que le rachat fust demouré à faire cent ans encore davantase, Car n’y sentoient riens que dommage, traveil de leurs subjects, gast du povre peuple et servitude de leurs personnes, point de refuge d'amour, de consolacion , ne de quelconque stabilité envers eulx, ne de nulle chose en quoy ils peussent avoir attente de repos, fors que d'estre à voulenté et à molestacion non aprises à avoir. Et par ainsy, sachans quel prince ils laissoient et perdoient, et qui leur avoit esté père et familier, craingnoient et doubtoient cely que trouveroient, et dont l'exemple quel il estoit envers les aultres leur donnoit peur du meismes de leurs voisins.